與周秀娜（Chrissie）拍拖五年的髮型師陳偉成（Avis），繼早前做柴可夫司機接載傅穎斷正後，又有傳他搞大前度個肚，一鑊比一鑊甘，迫得不時要周圍飛的娜姐下令男友夜蒲要申請行街紙。感情暗湧不斷，但事業方面，周秀娜穩步發展，最近為內地品牌La Miu設計內衣褲兼做代言人，有指品牌老闆借合作為名，掟錢自製機會，追求娜姐。
首選喱士
周秀娜上月中到日本為自己設計的內衣品牌影相，短短幾日，袋走百萬酬勞。「我第一次幫佢哋（品牌）行騷，北京老闆已經好鍾意，所以之後就搵我合作，幫佢哋設計內衣款。我早排都飛北京好多次，同佢哋開會諗構思，諗咗二十款唔同嘅pattern，我本身好鍾意著喱士內衣褲，其次就係波點同豹紋，揀咗呢三款做主打。我覺得內衣褲最重要係舒服，同埋突出到女仔嘅身材，所以出嚟嘅內衣褲款，都好周秀娜，希望啲姊妹鍾意啦。」周秀娜說。
老闆嗒糖
據了解，今年七月，品牌老闆睇過娜姐在北京為品牌行騷後，即提出合作建議，主動開一條以周秀娜設計的全新內衣褲系列，之後更不時以開會為名，爭取跟娜姐在北京見面。醉翁之意不在酒，娜姐抱開放態度。「其實呢間公司唔只一個老闆，仲有日本人同美國人，我哋都有見過面，只係同北京老闆容易溝通啲啫，我覺得出嚟做嘢，識多啲朋友冇壞。我去北京拍戲，或者去開會，老闆都會帶我周圍去食好嘢，我本身好鍾意食，難得有人唔怕肥肯陪我食，我真係唔介意，呢啲朋友絕對交得過。」
派定心丸
有人追，周秀娜唔落閘，但向男友派定心丸，公開話揀男友等如揀鞋，首要條件要舒服，她更專登為男友設計一款充滿女人味的喱士內衣。「Avis同我一樣，都鍾意喱士，平時如果我著啲有喱士嘅衫，佢都會讚我好睇。今次難得有咁嘅機會，我咪特別為佢設計一款囉！不過，其實我著咩，佢都一樣咁鍾意。」
撈多瓣
人靠衣裝，但時裝觸覺唔係人人有，圈中潮人一旦成為潮流i-con，無論開鋪賣衫或創立自家品牌，隨時賺到笑。
徐濠縈
得老公陳奕迅泵水100萬，09年3月與拍檔Dorothy合作於銅鑼灣白沙道開設樓上時裝店Liger Store。榮升老闆娘後，Eason嫂不時到歐洲、日本入貨，順道取經，又定時在blog上每日一貼，hard sell自家品牌「Oh My God」，連囡囡康堤都要做生招牌。 Liger開業近兩年，去年在尖沙咀新港中心開新店，捧場客有甘比、何超儀、容祖兒等。
少爺占
瓣數多多的商台DJ少爺占，今年4月投資近七位數字，於銅鑼灣開時裝店Meeh。品牌店每季款式限量30款，打頭炮的有與EASTPAK玩crossover推出Returnity背囊。少爺占不時抽空巡鋪，落手落腳執貨，開店不足五個月歸本，已計劃擴充開新鋪。
陳冠希
04年，陳冠希（Edison）開設潮流時裝店Juice，翌年他推出個人品牌Clot。一向小動作多多的Edison不時高舉C字手勢為品牌宣傳，唔少著名品牌包括Nike、Levi’s、Disney等，都主動邀請Edision合作，玩crossover設計。06年於上海開設Juice分店，去年又成功進駐台灣及北京，生意越做越大。 ####
呢件豹紋係咪好正！（設計對白）
紅黑喱士設計內衣不單上身有睇頭，底褲仔尤其性感，不過要好似娜姐身形咁弗先唔「唧肉」。
娜姐設計的底褲仔原來以see-throug嚟做賣點，前後都有睇頭。
宣傳相由日本攝影師操刀，在拍攝現場，娜姐跟日本髮型師齊齊睇相，但就唔見北京老闆在場。
揀取影宣傳相的多套內衣中，多以喱士、波點為主。
因為要影內衣，平日有大胃王之稱的娜姐唔敢食太多，晚餐只係一碗拉麵。
女人要shopping總抽到時間，雖然影相影唔停，不過娜姐依然爭取到時間行鋪買帽。
專登為男友設計的喱士內衣，娜姐著得性感又有型。
出現強勁對手，睇怕男友Avis都要醒定啲，唔好再有緋聞傳出。
七月首次為La Miu行騷，雖然短裙仔冇乜睇頭，但娜姐在台上十分風騷，難怪連老闆都嗒糖。
留言列表
