何佩瑜 Jeana 飽受歧視：同學笑我大陸妹！－明星靚相大分享☆

Jeana飽受歧視：同學笑我大陸妹！

把口幾寸都好，何佩瑜（Jeana）從來不會寸家人！北京姑娘提起父母也有柔情一面，每人都有自己的故事，Jeana的故事就是自新移民開始。

我係一個北京女仔，大部分親戚都喺北京，比起香港，北京先係我嘅家。由我讀小學開始，爸爸已經成日去香港做生意，為咗方便照顧我哋，舉家搬嚟香港。

初到貴境，唔使講梗係人生路不熟，最慘係我連廣東話都未識聽，電視都睇唔明，帶來好多唔方便。喺學校仲受盡歧視，畀同學仔笑我大陸妹，成日捉我講唔正嘅說話係咁笑，又試過無啦啦扯我條辮，嗰時我會諗大家都係中國人，點解要咁對我？當時真係驚到連手冊都唔敢寫自己喺北京出世，一直都驚畀人睇唔起，到我完全識講廣東話之後，都一直係咁做！係，我認，我鍾意自己呃自己！

父母的驕傲

但其實我係一個既幸福又幸運嘅女仔，喺北京生活時，因為我係長孫女，所有姑姑、叔叔都圍住我轉，從來都係最多人錫嘅一個，直情可以講係萬千寵愛在一身。嚟到香港，爸爸媽媽對我愛護如昔，爸爸一個人養起成頭家，喺一個雞同鴨講嘅地方打拚，仲要照顧埋北京啲親戚，簡直係我偶像！媽咪就係一個典型嘅家庭主婦，亦係我哋心靈支柱，令一家大細後顧無憂。

我一出道就做Model，當時辛辛苦苦儲咗十萬蚊，當時諗都冇諗就用六萬蚊買咗隻錶畀爸爸，三萬蚊買咗條鏈畀媽媽，自己就所剩無幾，真係唔緊要！只要見到兩老開心，就乜都值番晒，親情係唔可以用錢衡量嘅！到依家，爸爸媽媽都好支持我嘅工作，佢哋講過：「女，我好Proud Of（引以為傲）你，我哋以你為榮！」唔知點解一聽到呢句，我就淚如泉湧。爸爸媽媽，我唔只呢一世要做你哋個女，下一世都要做，永永遠遠都咁愛你哋！（全文完）

重遊舊居

小記與Jeana一起返回土瓜灣舊居看看，樓房依舊鱗次櫛比，可惜人面全非！臨走時，有個士多老闆娘婆婆目不轉睛望着Jeana，Jeana好奇地問：「乜嘢事？」婆婆說：「冇事，只係好熟面口！」婆婆一句好熟面口，似有千言萬語！

口述：何佩瑜　筆錄：專案組