明星靚相大分享☆

莊思明同陳慧琳細佬陳司翰拍咗年幾拖，最近因為思明頂唔順男友花弗，終於分咗手，分手後思明一直好傷心，周不時都眼濕濕，反而司翰好快就拖住其他女，其中一個係台灣混血女模貝兒。前日思明喺微博上載咗張相，左眼包住紗布，仲感慨留言話：「如果我真的有事，我最想有甚麼人在身邊？想到這裏我哭了，因為我知道那個人都不在乎了！」似乎佢嘅情傷仲未好番。

互當透明
馮仁昭噚日八到，原來思明係眼發炎，仲要關司翰事，話說佢哋雖然分咗手，但仍然有共同朋友，日前佢哋分別獲朋友邀請去銅鑼灣CEO唱K，事前都唔知大家會出現，司翰去先，冇幾耐思明就到，當時氣氛確實幾尷尬，佢哋兩個就互當透明，完全冇打招呼。不過，司翰冇因思明出現而影響心情，依然滿場飛，但思明就好唔開心，成晚死撐扮冇事。聽聞思明返到屋企之後喊天光，之後隻眼擘唔大，仲要朋友車佢去睇醫生。思明噚日喺電話度承認有同司翰喺同場合出現，但否認喊天光：「唔係大家講到咁樣喊法，我哋唔係小朋友，唔會咁肉酸。」不過佢都認冇刻意坐埋傾偈，問佢有冇覺得難受？佢話有好多朋友都好照顧佢。

陳司翰同莊思明分手後，男嘅好快有女伴，但女嘅仍然活喺傷痛中。《FACE》圖片

莊思明噚日左眼仍未消腫，化妝時都擘唔大隻眼。微博圖片