每年看《香港電影金像獎》，心情都是挫強扶弱，尤其是影帝、影后，總希望是一些默默耕耘的上一代演員得獎，像2000年的羅蘭姐、去年的鮑起靜，所以今年影后寶座儘管是吳君如、惠英紅之爭，儘管吳君如在《歲月神偷》演出精彩；儘管吳君如亦只贏過一次影后，但我還是希望惠英紅得獎。惠英紅上一次得獎，是第一屆《香港電影金像獎》，28年前的事。 
一套低成本的《心魔》，為小紅姐先帶來了台灣《金馬獎》的「最佳女配角」（下），但最叫小紅姐窩心的，還是這個恨了28年的《香港電影金像獎》影后殊榮。（上）
「我唔怕四圍同人講，我係好恨拎呢個獎！得到第一屆影后之後，28年都未再提名過『最佳女主角』，我覺得自己好醜！」
凡事可以兩面睇，從另一個角度看，小紅姐兩次提名都奪后而回，命中率是百分之一百，比起劉嘉玲、鄭秀文提名五次都未贏過，絕對是香港影壇一個紀錄。
小紅姐聽完後哈哈在笑，再一臉認真地說：「但我都係覺得自己醜……冇提名即係話我嘅戲唔得啦，連提名都唔配！」 
小紅姐是影后，也是女中豪傑。
80年代紅遍中港台的一代打女，外表剛強硬淨，斷腳、脊椎移位濕濕碎，拍戲遇咗黑社會當食生菜。只是這個「女中英紅」，說自己內心可以很溫柔、也會小鳥依人，其實我沒有懷疑過，因為她是真真正正的影后。 
如果不是小紅姐再得影后殊榮，這個在《前輩》中的造型，都幾難可以再見天日。 
小紅姐的「打女形象」深入民心，亦為她帶來了名成與利就。
很愛笑，恭喜她贏得金像獎影后，她笑得燦爛；談到自己過去五年備受抑鬱症困擾，她笑得苦澀；對以往的不快樂戀情，她笑得瀟灑。但無論是那種笑容的背後，小紅姐卻不停活在自我審查、自我QC 的生活中，壓力大得叫她抖不過氣來。
「我係一個超認真、超介意人哋點睇我嘅人，好似幾日前有報道，話我要添哥（李添勝）加重我喺《巾幗梟雄2》嘅戲份去爭視后，我可以對燈火發誓，冇做過任何小動作，換轉其他人可能一笑置之，但我唔得。所以我噚日打咗兩個電話，一個係打俾雯女（鄧萃雯）同佢解釋，結果俾佢鬧，話大家識咗咁多年，使乜打電話解釋；第二個電話係打俾添哥助手，同佢解釋清楚，添哥後來覆我，叫我唔好諗咁多，大家會明白。我就係咁樣一個人，明知人哋唔介意，但我一定要講清楚，因為我唔想人哋誤會。」
所以，訪問前一日，小紅姐打電話過來，說因為大家是第一次合作，想知道大約的訪問內容，讓她有所準備。可能有人會覺得這個影后太麻煩，不過我很buy，好過來到後才詐型，這個問題唔答，那個問題唔答，結果只會不歡而散。
要做靚女人的影后
世事就是現實和殘酷，無論小紅姐如何努力，演技如何出神入化，在憑《心魔》提名本屆《金像獎》影后前，有幾多人知道她是香港的首個影后，又有幾多人記起她是第一個影后級女星拍露點寫真集。只是人紅翻舊帳，呼聲越高的她，就越多舊帳被翻，除了陳年戀情外，就連已成為櫃底珍藏的寫真集亦被翻摷出來。
「有人翻登其實不知幾開心，當年拍寫真集係話想俾人聽，惠英紅都可以好靚女，好有女人味，唔係醜女。其實冇嘢嘅，最好係過多十年、廿年後，有人睇完本寫真集，之後同我講：『惠英紅，原來你後生咁正、咁索嘅！』咁就乜都值得。」 
當年小紅姐的露點寫真集，銷量達到25萬本，每本分紅港幣5元，為小紅姐帶來125萬元進帳。 
這本寫真集還有另一個意義，就是當年麥當雄的經典電影《口靚妹仔》中，林碧琪演出的角色，本是屬意小紅姐演出，因為當時電影公司要小紅姐貫徹「打女形象」而推卻，結果金像獎第二屆影后由林碧琪贏得。小紅姐想告訴大家，她都可以好口靚妹。 
凡事超緊張的影后
年少輕狂過的小紅姐，現在對每件事都很緊張，就像頒獎禮前數天，除了忙化妝、衣着外，還要為劇集《公主嫁到》趕戲，頒獎禮前夕要拍通宵，以至當日精神不佳，入場後不久就要食藥舒緩心臟負荷。
當晚上到台，腦海真係一片空白，我冇準備定多謝邊個邊個嘅台詞，因為我好驚到時冇獎攞會好瘀。上到台話自己食咗藥後，已經好驚有人會以為我濫藥、吸毒，又驚人哋以為我有心臟病。
其實只係我身體狀況一直都唔係咁好，好似《金像獎》當日，我成日都冇食過任何嘢，只係手袋入面有包朱古力，係醫生叫得閒就食朱古力，可以補充能量。點知食完之後冇乜幫助，越坐就越驚，個心就越跳越快，所以最後都係食咗醫生俾我嘅藥，要俾自己變得輕鬆，等個心唔好跳得咁快。」 
《心魔》是低成本的作品，小紅姐的片酬更是入行後的新低，但對小紅姐而言，片酬不及一部好電影的重要，減片酬而讓一部好電影成功誕生，絕對值得。
在台上的小紅姐，腦海一片空白，以至頻頻出錯，但最叫她不安的，是她多謝恩人許鞍華時，竟說錯了她的電影名。翌日一起床，她即時致電許鞍華，儘管只是留言信箱，小紅姐仍留下一大段道歉說話，直至第二日收到許鞍華的安慰電話，她才安心。
「我就係一個咁固執嘅人，有事我一定要講出口，你聽完之後點諗我冇辦法，但我一定要解釋清楚。」
不苟言笑的影后
很久以前，曾有一位正在上位的花旦跟我說，在片場最怕小紅姐，因為她基本上是不苟言笑，埋位時坐在一旁不作聲，令不少演員感到很大壓力。小紅姐承認這是她一貫的工作模式，但她絕不是不苟言笑之人，一樣愛玩愛笑，只是玩樂的地方，不是在片場。
「我都知好多後生仔、後生女同我合作會好大壓力，好似我同羅蘭姐合作，我一樣好大壓力，加上我一入到片場我就唔會講笑，因為我尊重演員呢份工作，我要培養情緒，我會坐埋一邊唔出聲，諗吓點將個角色做好。其實我都知我有呢個問題，因為我唔出聲個樣真係幾cool，冇乜人敢埋身，所以埋位前，我都會同哋後輩傾吓偈、講吓笑，等佢哋可以輕鬆吓，又好似好多時拍完一場戲，我都會出去抖吓氣，大家圍埋一齊『打邊爐』（圍着煙灰缸抽煙）講吓笑輕鬆吓。」
不恨做視后的影后
年青一輩的讀者，對小紅姐的印象可能停留在《巾幗梟雄》的「三奶奶」，或者是《宮心計》中好大喜功的「譚司膳」，但其實小紅姐在80年代紅極一時，最高峰同時有8部電影、兩套電視劇在身，一日72小時也不夠用，所以小紅姐未夠18歲已經買定寶馬，22歲已經做業主，有名有利的同時，亦同時周身傷痛，斷腳後變了長短腳、脊椎移位引致頸梗膊痛等等，令她終日周身骨痛，不過，小紅姐從未後悔。
「點解要後悔？的士司機都可能捱到生痔瘡，你打得稿多都可能會有網球肘，行行都有問題出現，邊避得咁多！我鍾意做戲，第一份工就係做戲，有幾多人可以做自己鍾意嘅工，又搵到食先？」
拍打戲已經拍到厭，小紅姐現在熱愛演戲，當年簽部頭約加入TVB，亦說明不會拍武打劇，只望過足戲癮。「要打可以搵第二個人去打，使乜搵我！搵我係因為我識得做戲。」 
小紅姐已不再演出武打場面，不過高難度的動作，仍舊非小紅姐莫屬，就像早年上《獎門人》節目，便與同樣身手了得的元華，一齊表現騎膊馬接食物。
正所謂「人紅是非多」，再奪影后的小紅姐，即時帶來得獎後第一單是非，有說她要求加重《巾幗2》的戲份，好讓她一次過得到影后與視后殊榮。對小紅姐來說，視后的吸引力應該不會少，雙喜臨門更是錦上添花。
「我真係冇諗過爭視后，今年我嘅戲一定冇可能選視后，就算佢哋叫我選，我都一定打返公司say no。唔係唔想做視后，而係如果有一日，有監製俾個好劇本叫我做女主角，我會好樂意，但如果夾硬叫我上，我一定唔會。我要得到一個人人認同嘅獎項，唔係名不副實嘅虛銜。」
活在抑鬱的影后
80年代事業如日中天的小紅姐，始終敵不過女人最大的心理關口—年老色衰，加上電影市道不振，雖然中途曾經轉型經商，賺得盤滿砵滿，生活無憂的她卻變得更消沉，甚至走上自毀之路。最終證實患上抑鬱症的小紅姐，在醫生治療及朋友的鼓勵下，終於走出人生谷底。
「當時個人好暴躁，乜事都睇唔過眼，好唔鍾意自己，試過照鏡指住鏡入面嘅自己鬧：『你睇吓你自己似乜嘢樣？去死啦你！』一直都唔知自己乜嘢事，只係好多人怕咗我，最後終於入廁所一次過食80粒安眠藥，好彩細妹救番我，睇醫生先知自己有抑鬱症，於是就接受治療，又醫生又催眠師，終於都叫醫番好……不過嗰診費真係好金，一個鐘要2千蚊，一個星期見三次，每次兩個鐘，你自己計喇！」
錢固然重要，但身體健康更重要，否則我們就見不到第一屆影后小紅姐再次奪獎。
一個恨嫁的影后
雖然小紅姐已年屆50，但戀愛無分年齡，已有十多年沒有拍拖的她，坦言希望搵到一個靠得住的男人，但恨還恨，卻寧缺莫濫。奪獎後的小紅姐除不斷被翻舊帳，就連對上一次「遇人不淑」的戀情亦再次被數落。對於與前男友黃子揚的「姊弟戀」，小紅姐坦言已經沒有太大感覺，忿忿不平的，是外界對她的評價。
「我都唔明點解一定要話我蝕底，又話我人財兩空。首先我哋一直以來都財政獨立，我同每一個人拍拖，都一定唔會牽涉錢銀，咁又何來財失？至於人失就更加好笑，兩個人一齊，大家都有付出過，大家都有感覺，咁點解係失？點解一定係女人蝕底？我只可以講，冇嘢就係冇嘢，唔係話邊個有着數、邊個有蝕底。」
對於愛情，小紅姐坦言很渴望有個靠得住的膊頭，讓她再嚐戀愛滋味。
「邊有人唔恨拍拖，但我唔會話因為想拍拖而隨街搵一個，愛情事好難講，或者我一陣間走嘅時候跣一跣，有個男人扶一扶我，咁就搵到個嘅。呢啲嘢都係隨遇而安，我好信命，有嘅時候就會有，冇嘅時候，點求點追都唔會有，咁又何必操心。結婚，可以講係一個女人嘅心願，遇到啱嘅我都想嫁。至於小朋友就一直都冇諗過生，香港、中國咁多孤兒，不如去領養重好。最大問題係，我對小朋友冇乜感覺。」 
堅持
貴為80年代當紅打女的小紅姐，忙拍戲亦當然忙於應酬，但小紅姐一向不愛應酬總是推得就推，在推無可推下，小紅姐亦有一份堅持，就是滴酒不沾，理你是高官片商還是大有錢佬，不飲就是不飲。
「我一向都唔飲酒，最多都係大家高興開心就飲少少啤酒，但我唔會俾自己飲酒，唔係怕自己會做錯事，而係唔明點解要俾機會自己去飲酒！」
小紅姐又說，她最不健康的習慣，就是食煙。曾經戒了九個月的她，最終還是再次成為煙民一族。
「我試過戒煙九個月，但一入廠拍劇就唔得，過場、換景就成班同事出去圍住個煙灰缸『打邊爐』，最後都係食返。不過呢次我醒，入廠就一定唔帶煙，想食就問人要，始終『伸手牌』食得多都會唔好意思，變相食少啲，依家我幾日先至食一包。」
這個方法，我也曾試過，唯一不同的是沒有不好意思的感覺，還給同事臭罵一頓。可見這個方法，應該只適用在地位祟高或者是好打之人，凡人莫試。 
留言列表
