之前班藝人玩微博，就話興自拍素顏照晒清純，而結咗婚嘅就鍾意上載啲sweet相晒幸福，但最近大家齊齊轉咗口味，變咗鍾意「晒B」
而率先加入呢種「晒B」風氣嘅就有蔡少芬同張晉兩夫婦，佢哋兩公婆平時有幾肉麻，唔洗好姨多講喇，早前呢對恩愛夫婦就盛傳即將為人父母，後嚟經Ada極力澄清，件事先至告一段落。但呢幾日佢哋又唔避嫌咁拎個BB喺微博到晒，個BB就當然唔係張氏所出，只係拍戲嘅「道具」之一。不過張生張太抱住個B嗰陣，個樣鬼咁慈祥，直頭當人哋係自己親生仔咁，所以睇佢嗰個恨仔樣，就算Ada今次唔係真係有喜，都應該唔會係好耐之後嘅事。
其實借人哋個B嚟晒吓，又點止Ada兩公婆呢，原來阿嬌都有呢種嗜好，先後借咗對孖仔同契女影相。但阿嬌都算喇，勢估唔到已經有個女嘅「Eason嫂」徐濠縈，都要借人哋個B嚟合照，真係唔知康堤見到，會唔會呷醋添。
計好姨話，最正常嘅都應該係張智霖同袁詠儀兩公婆，就算晒吓，都係晒番自己個「私伙」魔童。不過佢哋心情好矛盾，又想拎囝囝耀武揚威，但又擔心魔童容顏曝光會惹嚟麻煩，所以相入面嘅魔童，唔係九一面，就淨係得個背脊，好似「賭神」咁充滿神秘感。依家連小朋友都拎埋出嚟晒，真係唔知之後班藝人會拎啲咩出嚟炫耀喇。 
又話未生住，但點解Ada 同張晉又會抱住個B嘅？原來呢位小朋友係佢哋兩公婆套新劇嘅「小道具」。 
除咗「晒B」又點少得「晒幸福」，Ada重周不時上載同老公嘅劇照，同埋劇中呢張超大結婚相，繼續肉麻當有趣。 
阿嬌都嚟趕趕呢股「晒B」風氣，借咗好友個孖生BB同埋契女嚟炫耀，原來阿嬌都幾有慈母相。 
勢估唔到有個康堤都唔夠，徐濠縈都要借人個B嚟合照，小心康堤呷醋喎。 
「晒B」嘅又點少得靚靚一家，但魔童永遠只係得九一面或者係Back Shot，真係充滿神秘感。
留言列表
