揸F1出街超級跑車車主－明星靚相大分享☆

超級跑車車主，十之八九都是一級方程式（Formula 1）賽車粉絲，亦一定幻想過自己是「東廊舒密加（Schumacher）」、「屯公阿朗素（Alonso）」、又或者「三號幹線咸美頓（Hamilton）」……
回到現實，想買部近似方程式賽車駕駛感的超跑，好多人第一時間都會想起法拉利，因為車廠營運F1車隊同製作超跑經驗超過六十年，有往績有名氣有保證，外形靚引擎勁又保值，揀拉利，無衰。
拉利雖好，不過，當擁有過一部、兩部，甚至好多部之後，總希望有點新嘗試，轉玩同呢對手？選擇其實只得一個，正是同時贏過多次F1冠軍兼有生產超級跑車的英國麥拿侖（McLaren）。
特別找來擁有過多款超級跑車、經常為汽車刊物試新車的著名賽車手關兆昌（Charles），評一評麥拿侖新作：MP4-12C。

操控
「在街道上揸，懸掛濾震表現好，部車亦好夠grip（抓着力）。不過，如果揸得快（例如要落賽道），就會嫌懸掛未夠硬。」

坐姿
「好多右軚超跑都有pedal（指油門及制動踏板）偏左情況，司機坐姿不自然，MP4-12C刻意收窄中槽，讓司機更貼近全車中心點，雙腳放得平直，踩pedal反應更快。」

引擎
「MP4-12C配600匹渦輪增壓引擎，加速好快！不過，渦輪滯遲（turbo lag）現象明顯，on and off throttle（踩踏或放鬆油門），動作要好仔細先會揸得順。」

與關兆昌談超跑
Charles（49歲）在1984年踏足賽車界，先後贏得多個國際性賽車殊榮，包括1993年澳門東望洋大賽冠軍、1997至1999年東南亞地區房車挑戰賽總冠軍及2003年亞洲保時捷盃總冠軍。2005年底，Charles退下火線，不過，對超跑及駕駛的熱情依舊不減。

復出大計
「早前，有朋友邀請我今年底復出參加十二小時耐力賽（三位車手輪流駕駛），近來亦多做運動，評估自己體能是否足以應付賽事，若果重返賽道，我不是想遊車河，我會好認真。預計一個月內會有最後決定。」

開篷拉利
曾有計劃買一部MP4-12C，不過兜兜轉轉之下，又重投法拉利懷抱，「正等待458 Spider（開篷版458）交車」。平日，Charles以平治S-Class代步，理由好簡單，因為夠舒服。

難忘經典
「其實我不愛揸舊超跑，今時今日，再揸法拉利348、355，總覺得部車好慢。揀超跑亦只着重性能表現，不計較外形。」唯獨忘不了廿年前的麥拿侖F1（車廠首部街車），當時以準買家身份去馬來西亞試車，覺得部車好輕好快，中置式駕駛座位好獨特，不過，售價太高（港幣600萬），同期的法拉利旗艦F50，只不過450萬！」 *車價未包括首次登記稅，因F1及F50並非右軚車輛，不能在港登記出牌。

試車後話
上揭雙翼廿年前麥拿侖首部超級跑車F1，採用上揭式車門設計，靚絕車壇，MP4-12C沿襲家族優良設計，同樣值得俾個Like。不過，上落車或泊位時，就要左右各預留至少兩呎空間。

六百強心 3.8公升V8雙渦輪增壓引擎，600匹，1波盡油起步，加速力接近癲狂。不過，引擎低轉渦輪遲滯（turbo lag）現象頗明顯，塞車時俾油要陰柔漸進一點。

風洞影子無論是普通車迷，抑或賽車迷，一睇冷氣出風口造型，即時聯想到設計汽車/賽車常用的風洞（wind tunnel）實驗室內的超大型扇葉，既華且實。

功能至上中控台、中槽設計玩簡約，冷氣掣放在門板上，布局清晰。車廂空間感不俗，方便身形高大用家。

左右三級兩個旋鈕（H和P），分別控制Handling（操控 / 懸掛）及Performance（性能 / 引擎），另再分三個模式（mode）：N（Normal，普通）、S（Sport，運動）及T（Track，賽道）

淨重千三車重1301kg，望落不算標青數字，與時下德國家庭掀背車差不多。不過，引擎力大，車重分布又夠平均，直路加速同掟彎，都覺得部車異常輕巧，感覺上比實際重量數字至少輕百零二百kg。

認識麥拿侖
有留意體育新聞，麥拿侖一名，似曾相識，不過，要你講多兩句其二、三事，即時啞口無言，為你快速搜畫麥拿侖威水史。

三個名字
麥拿侖（Bruce Leslie McLaren）生於1937年，1963年在英國創立自己的賽車隊。McLaren在七十年代末曾被本地傳媒譯作麥拉倫，後來TVB改譯麥拿侖，香港車迷亦跟住叫，2004年，McLaren正式將中文譯名改作邁凱輪。不過，香港車迷始終改不到口。

紅白年代
麥拿侖在1970年因撞車離世，其下屬將車隊發揚光大，七十年代中起得到煙草商贊助，及後F1車神冼拿（Ayrton Senna）加盟，又配備馬力強勁的本田賽車引擎，水頭充足，人強馬壯，四奪（1988至1991）F1車隊全年總冠軍。

首次民用
F1四連冠，麥拿侖乘勢推出道路型汽車，在1992年發表處女作超跑「F1」，配備一台627匹寶馬V12引擎，極速可達372km/h，車廂3個座位採用品字形排列（司機坐中間），車壇首創。1993年廠方曾經在淺水灣及石崗機場跑道舉行試車會，可惜天價600萬，令不少有心人卻步。

擺明單挑
麥拿侖MP4-12C在驅動布局，馬力輸出數字，引擎、波箱規格，以至售價，都與法拉利458 Italia有多處相似，擺到明要對撼。

facebook群組創立
壹號幹線特別設立Facebook群組，網羅最新汽車資訊及新車情報，只須在Facebook以「壹號幹線」為關鍵詞搜尋，或以手機的「QR code」app掃描就搵到。想睇現場試車片段，可以到上述群組、http://hk.next.nextmedia.com或瀏覽壹號幹線YouTube專頁（http://www.youtube.com/NextOneCar）。 ####