夏天一到，女生個個愈着愈薄，不過iPhone換季新look，就啱啱相反，愈着愈「大件」！因為大熱卡通人物出新iPhone新品，個個都唔再求其印個嘜頭上去就算，好似史迪仔，唔只有立體觸鬚同耳仔，仲連成架太空船都出埋。另一邊鬆弛熊都唔弱，將支觸控筆整成立體模樣，好唔好用其次，淨係賣相都加晒分！咁多新品，冇理由仲由得部iPhone造型咁呆板，快手換新look啦！
史迪仔太立體
唔講幾乎唔記得，其實史迪仔係隻太空怪物，用呢個新嘅太空造型出iPhone case，極之正常。不過最搶分，都係有埋佢部太空船手機座，有去迪士尼玩過「幸會史迪仔」嘅都會記得，呢架就係最尾佢着草架太空船，好有親切感！$298，連手機座 $498（a）
吉蒂出耳
咁多大角出新品，點會少得精品界元祖吉蒂貓？凸出一對貓耳之餘，新加豹紋pattern，更有「貓」味，襯衫一流。嫌唔夠爆，仲有螢光粉紅款，sharp爆夏天。各$208（c）
凸耳熊套
市面上鬆弛熊立體殼原來通通都係老翻貨，只得呢款耳仔凸出嘅軟膠殼至係正貨。其實呢隻有耳版雖然熟口熟面，但都係近期先出，忠實粉絲就知以前喺街邊檔見到嘅都係老翻貨。$168（b）
揸實鬆弛筆
夏天對手唔使再畀手套遮實，整完靚gel甲，篤芒真係唔太方便，難得終於有支觸控筆用成隻立體鬆弛熊打造，唔再係悶爆筆形，女生最buy！拎上手，原來唔只得個樣，立體熊造型凹凸有致，拇指剛好扣喺肚腩上面，好睇好用。$88（b）
熊頭塞耳
呢排7仔大力谷鬆弛熊，唔買番一、兩隻喺身，真係覺得跟唔實個trend。呢款新出防塵塞，大大個熊頭cute到暈，比起上代打橫瞓喺度嘅造型毫不遜色，但價錢就平足一半，夠抵玩！$28（b）
俄羅斯娃娃殼
近排行精品店，成日見到呢類圓碌碌嘅俄羅斯娃娃，線條簡單兼走樸素色系，有別傳統華麗鮮色設計，感覺親切得多，好多女user見到都猛叫kawaii。變身做iPhone殼，一樣保持圓碌碌設計，成隻立體俄羅斯娃娃套住部iPhone，造型滿分！$238（a）
Shop list
(a)Gadget Gallery（2578 1826） (b)熊仔主人 荃灣南豐中心A120E（2499 2383） (c)Winner Concept（2407 1118） ####
銀河艦隊好叻咩？我夠有太空船同iPhone周圍去！
太空版立體史迪仔殼除咗有飛船跟，個look仲變番隻太空怪物，有番觸鬚同4隻手彈出嚟！
太空船嘅座位內，可以穿番條充電線上去，方便放部機喺太空船內充電。
船底有預留電線位，穿過電線後都可以平放喺枱面。
鬆弛熊立體筆身較軟，揸上手幾舒服。
好似史迪仔個立體殼設計咁，開機掣會造得較深，就算圓形頭殼都無損操作反應。
鏡頭設有推蓋位，拎住個殼都唔會見到個窿咁樣衰。
留言列表
