蔡少芬（Ada）雖已為人婦，但原來她一度擁有典型港女自以為是的性格，可幸老公張晉成熟包容，令她逐漸戒除港女習性，向賢良淑德好老婆目標進發。
Ada曾因「公主病」發作，差點搞到同老公分手。
Ada在劇集《飛女正傳》中演一名典型港女，她笑道：「其實我自己都係好有自信，覺得好多男仔都鍾意我，所以就算拍拖分手會好傷心，但知道只係過程，重新上路就會搵到個更好嘅。」不過Ada覺得造成有港女性格，港男也有責任，她說：「香港男女平等，女仔上進啲男仔就唔敢追，女仔Head住自己又唔鍾意，其實女仔喺生理、心理上都比男仔早熟，所以成日覺得男仔蠢，根本最蠢嗰個就係自己，啲女仔應該扮蠢呀！」
Ada讚老公好功夫，是個打得之人。（資料圖片）
嫌唔夠細心
過去Ada總要保護家人或另一半，她有所解釋：「嗰時老公喺香港冇人識，我被迫講晒，其實佢係武術家、大男人，喺佢家族裏面男人係一家之主。」兩個不同地方長大的人走在一起，難免有合不來的地方，幸經婚姻輔導及得老公成熟包容，令夫婦更磨合。
Ada承認，以往不時「公主病」發作，更差點搞到分手：「總覺得佢應該送啲小禮物畀我至係錫我，但佢好粗心大意唔夠主動，結果搞到嗌交先嚟氹我；老公每次來港都只得幾日，但我就自作主張將佢啲行程排密晒，令佢唔多開心，我覺得『有乜問題啫！』有次佢認為我講嘢好大聲，我唔覺得咁係唔尊重，佢就再大聲啲同我講嘢，令我自我反省。」
諗後果先講
若要人似我，除非兩個我，Ada與張晉，就連休息的定義也不同，Ada放假要周圍見朋友，而張晉則喜歡躲在家靜靜休息或跟Ada二人世界，在婚姻輔導下Ada明白二人要有自己的空間：「老公又教我講說話時要先諗後果、對方嘅感受、有冇益處。」原來有次嗌交，Ada說了些傷害的話，張晉一氣之下替她執行李拖篋送她到機場，跟在後面的Ada哭個不停，後來張晉不忍心就攬着她，嚇得Ada以後不敢再亂叫分手：「婚姻係冇後門嘅，唔好做啲傷害大家關係嘅嘢，好彩佢夠成熟處理，女人應該愛惜、尊重男人，令男人去保護自己。」
蔡少芬在老公的開解下，改掉自以為是的性格。
嗌交當樂趣
以前自以為是的Ada，現在最大改變是更戀慕老公，尤其她年前腰受傷，一度誤以為會癱瘓，但張晉不但細心相伴，還正面地為她找其他醫生，她還說：「我同父母有拗撬，老公會引導我睇到父母可愛嘅地方，佢畀好大空間我，我亦睇到佢好多優點。」在Ada口中幾乎100分的老公，亦有令她激氣時候，上年她生日兩小口在家慶祝，Ada想攬攬浪漫下，但張晉堅持要去打機，最終嗌交收場，不過Ada謂這正是他們相處、溝通的方法與樂趣。
三俊男唔及老公好咀
Ada在《飛女正傳》中飾演一個年過三十的職業女性，性格挑剔高傲，但又渴望愛情，是名副其實的「港女」，一次神奇經歷令她「咀」過男人之後變身成女超人。就劇情需要，Ada要經常咀男人，除陳豪、黃德斌、曹永廉外，她還要咀路人甲、看更等，不過真咀的就只有三位男主角。咀勻三位俊男，Ada忍不住要評一評：「陳豪個嘴太大，黃德斌嘴唇太薄，曹永廉個嘴太細，都係我老公最好咀，咀得最舒服！」
至於與三人合作，Ada也有不同感受：「同陳豪合作咗幾次，一埋位就有默契，係一個幾得心應手嘅拍檔。黃德斌唔多講嘢，我成日同佢玩逗佢開心，佢做嘢好認真，合作有火花。曹永廉雖然好住家男人，但把口衰到死，勁搞笑，腦轉得好快又識搞氣氛，同佢幾合拍。」
蔡少芬說還是覺得老公張晉咀得最舒服。
蔡少芬（右起）咀完陳豪、黃德斌及曹永廉逐個評。
留言列表
