兩年一度的北京車展正式開幕，踏入第十一屆的車展剛好成為新的里程碑，因為無論面積、規模定係參展商數目都全面升級，就連擺攤位的成本費亦傳聞漲價百倍，睇見亞洲首展的 M.Benz鷗翼 SLS於會場大鵬展翅，正好寓意中國市場急劇起飛的步伐。記者、攝影：許維維鳴謝： Mercedes-Benz HK
其他副刊影片 平治多方面夾擊 放大圖片 
■ M.Benz以今年重頭戲 SLS AMG打頭陣，展示一系列多架亞洲首展的新車，開拓呢個充滿無限金錢的中國市場。
2010北京車展於中國國際展覽中心天竺新館舉行，分開東西兩翼各 5大展館的會場，如各界之前所料，人太多、車太多、少少混亂等問題，但一樣無損各大頂級車廠傾巢而出，於國內展示實力、進一步打響品牌的決心。其中當然唔少得今年重頭戲多多的平治，好似超跑界新焦點的 SLS AMG、豪華與休閒兼備的 E-Class Cabrio等，加埋富貴大佬 Maybach及年輕活潑細佬 smart攜手坐鎮 W4場館，輕易成為人流最多的展區之一。
Maybach緊貼潮流添 LED燈 放大圖片 
唔好以為頂級豪房一定同 Trendy呢個字無關係， Maybach今年將推出小改款版本，參照 E-Class以大熱 LED燈代替霧燈，換上新款鬼面罩及車頭泵把，用上紫藍襯金的新色配搭演繹，要歷久常新就係咁簡單。
E-Class Cabrio豪氣休閒 放大圖片 
E-Class自推出新款後，憑豪華舒適風格令人氣一直高企，今年輪到開篷版上場，重新改良的低風阻設計大大改善開篷車的舒適，不失 E仔行車寧靜本色，號召力可算僅次 SLS AMG。
SLS AMG超跑融合古今魅力 放大圖片 
為了向經典車系 300 SL致敬的 SLS AMG，將一對鷗翼門、復古車頭等經典元素一概保留，融合在這部備有 6.3 V8引擎、最高達時速 317公里的超級跑車之上。今次正式於亞洲首次展出並於車展內開始接受預訂，讓中國成為亞洲首發的第一個國家。
Concept成員Shooting Break完美揭背 放大圖片 
可能深明揭背近年大行其道的熱潮，全新概念車 Shooting Break加入大量創新元素，將房跑與揭背相融合，打造一架型格十足的揭背車，大有可能取代 CLS。
F800零排放新世代 放大圖片 
多年來投放了大量資源研發零排放的平治，備有充電式及 F-CELL氫燃料電池兩種引擎選擇的 F800，係最佳代表作，首次來到亞洲展出一顯平治科技研發的實力。
國產女模升呢 放大圖片 
早知國內車展女模的數目及質素向來數一數二，就連剛升任吳太的 Lisa S.亦係保時捷嘉賓女模之一，美女如雲永遠都係車展的另一大亮點。
放大圖片 
放大圖片 
放大圖片 
放大圖片 
同場加映：超跑角力
那邊廂用超跑 SLS招客，作為超跑界頂級品牌一分子的 Porsche及 Ferrari又點會輕易讓它專美，齊齊各自使出看家本領跟 SLS一拼。
Porsche 918 Spyder Concept 放大圖片 
環保車未來事在必行，就連超跑車廠亦開始陸續推出混能跑車的 Concept car，今次保時捷展出的新傑作就係 918 Spyder，有 Plug-in充電式 Hybrid系統的 V8引擎，同樣可以輸出 714匹馬力，無損車主追求速度上的快感。
Ferrari 599 GTO 放大圖片 
以真正開始投入生產計，被譽為地上最強的法拉利 599 GTO終於一現真身，揀北京車展成為正式首次公開曝光的地方，當然亦代表即日開始接受預訂，限量發行 599部。由靜止到時速 100公里只需 3.35秒、 670匹馬力的頂級拉利可以話係今次車展的另一大焦點。
花絮： Cute版國產鷗翼贈興
國內品牌級數雖同歐日仍有距離，不過勝在創意十足，設計擁有獨特的中國風格。
放大圖片 
■ IAT跑車開門之後一樣有一大對鷗翼喺車頂，但大嘴巴的車頭設計似乎可愛多過型。
放大圖片 
■國產有唔少體積細小的迷你車作品，車身滿佈竹葉圖案的竹風亦係其中之一，令我立刻省起竹葉青。
第十一屆北京車展日期：即日至 5月 2日地點：北京市順義區天竺地區裕翔路 88號中國國際展覽中心查詢：http://www.china-autoshow.com 
留言列表
