林莉縱功夫貓踢咪咪－明星靚相大分享☆

林莉縱功夫貓踢咪咪

【我得寵】現任名模的05年港姐季軍林莉，行貓步出色，備受國際品牌重用，但她笑指自己行貓步，也比不上家中小貓走得美妙可愛。靠樣搵食，但愛貓如命的林莉，被家中功夫小貓腳踢咪咪也在所不計，盡顯「母愛」偉大。撰文：張俊銘

香港越來越多愛貓如命的人，05年港姐季軍林莉（Carrie）便是其一。養貓經驗一年多的她，上年4月在寵物店遇上現在養的小貓Sofia，開始嘗試做小貓主人。

合眼緣越睇越靚
Carrie說：「我想養貓好耐，貓嘅形態好靚，性格獨立、高傲，一舉手一投足都好吸引我。」Carrie回想一次與友人逛街，朋友話隻布偶貓好似我，我唔覺得似，但係小貓白色毛、藍眼睛，好似洋娃娃咁，好溫馴。」Carrie認為養寵物要講眼緣：「雖然係我第一次養貓，但係我好謹慎揀擇，覺得寵物性格好緊要，越睇佢越靚，相處越耐，佢就越黐我。」 Carrie指小貓靚得像蘇菲亞公主，所以將牠命名為Sofia。至於血統，沒深究過，Carrie說：「無論佢血統係點，都會係全世界最靚嘅貓，我覺得佢係可以參與選美嘅香港小貓。」Carrie自言視Sofia如親女，照顧起居飲食之餘，陪玩陪瞓，拍攝當日Carrie帶着大量Sofia的玩具、食物，甚至搬來一大盤貓沙，照顧周到，Sofia在家中更有三層高的活動室，爽死！

甘願趴地做阿四
Carrie趴低擒高，只為「乖女」影張靚相，穿上deep V裙的Carrie，溫柔地抱着Sofia，卻被Sofia狠狠抓住胸口的肌膚，但Carrie只輕輕對Sofia說：「真係好痛！不過唔緊要。」然後溫柔地將Sofia的爪拿開，隨之當然是看到Carrie被抓得紅紅的胸口，Carrie說：「我當佢BB咁錫，投放好多感情，我相信佢feel到。可能佢知我錫佢，所以成日蝦我，好似功夫熊貓咁，一腳伸埋嚟。」 Carrie繼續甜絲絲地分享，指Sofia是她的快樂泉源，能讓她在工餘後減壓：「除咗佢嘅高傲性格之外，佢其實好似一隻狗，我行去邊佢跟去邊，我返到屋企，佢會企喺屋企門口等我，我去冲凉，佢又會企喺浴室門口等我，我當佢係BB女。」

一隻夠晒數
寵物主人每遇上「仔女」受傷或有病痛，內心也折騰一番，花盡精力照顧，林莉回想：「一晚深夜我同佢喺走廊玩捉迷藏，佢走咗上鄰居架單車扯住隻腳，仲夾住向前衝，搞到成個地板都係血，隻腳流血不止，即刻同佢睇急症，嚇到我死。」

「可能會呷醋」
當主人確實有點像為人父母，初時想找個伴，讓家中有點活力生氣，當寵物呆在家中，又擔心牠悶，要為牠找個伴侶或新朋友，對於會否考慮加入新成員，林莉有堅定想法，她說：「唔會，唔係暫時唔會，我唔會諗番轉頭，成日都諗好唔好養多隻，我都有出去睇過，但睇唔啱。養小動物好講緣份，有時退一步諗，如果養多隻，Sofia可能會呷醋。基本上，我當係寶，一隻就夠。」場地提供：The palace,prince & princess 攝影：陳俊強

林莉視愛貓Sofia如掌上明珠，就算貓咪抓她胸留紅痕，她只輕聲呼痛。