《鐵馬尋橋》早前已經大結局，家陣重講好姨都怕俾人話Out，不過戲中男主角之一嘅馬國明，同佢嘅緋聞女友胡定欣，感情瓜葛就亂晒籠，精采過電視劇，一時話胡定欣黐上內地富豪，一時又話馬國明嫌胡定欣有公主病，馬國明頂佢唔順提出分手，至於兩位當事人，對於兩年戀情更大耍太極，話一直都係朋友，又點可以分手，事件鬧出幾個唔同嘅版本，睇怕搵神探伽俐略落場查，都未必知道真相。
胡定欣雖然極力否認識得內地富豪，但佢生活就無端端升呢，以往少有行名店嘅佢，突然一反常態，日前拉埋兩個老友到中環Shopping，架上墨鏡嘅胡定欣，十足闊太一樣，其後見佢入咗專賣名牌手袋嘅巴黎世家，揀咗一輪之後，佢哋都大有斬獲，胡定欣同朋友重拎住一大袋戰利品，懶理其他人繼續話佢黐富豪，心情靚爆嘅胡定欣，離開時重同好姨講Bye Bye，胡定欣忽然富貴，但又未見佢嘅工作量提升，真係財來自有方。
女友富貴逼人，馬國明卻明顯未能受惠，繼續為生活奔波，日前好姨見佢喺銅鑼灣拍嘢，拍攝時拎住部手提電腦嘅佢，被身邊嘅大茄拖累頻頻NG，雖然馬國明好有風度咁冇怪個女仔，但見佢托機都托到有啲手軟，後尾導演一嗌Cut，個女仔順手整理下衣衫，好姨見馬國明望都冇望一眼，真係正人君子嘅典範，馬國明咁好仔，胡定欣真係要好好珍惜呢段感情。 
胡定欣對名牌袋情有獨鍾，重猛叫店員拎出嚟俾佢試吓。 
巴黎世家一個袋閒閒哋都要兩萬蚊以上，唔知胡定欣睇中呢個又值幾多錢？ 
喺名店裏面「採礦」，胡定欣真係失禮街坊。 
胡定欣睇完名牌袋，又揀名牌衫，工作量唔見增加嘅佢，唔通真係有條神秘水喉射住。 
心情勁靚嘅胡定欣，見到好姨不但冇黑面，走時重同好姨Say Good Bye。 
唔少人話馬國明好仔，好姨本來半信半疑，但睇佢望都唔敢望隔籬個靚女一眼，好姨想唔信都唔得。 
馬國明冇女友咁富貴，繼續要為生活奔波，日前就喺銅鑼灣幫TVB拍嘢。
留言列表
