撐高清拍片靚　嘟嘟激玩 iPhone 4 明星 Phone 潮 @ 明星靚相大分享☆

風靡全球的iPhone 4面世，立即掀搶購潮。7月尾行貨正式在全球17個國家與地區同步發售，淨機價4,988（16GB）及5,888（32GB）。但香港唔少藝人，早已等唔切以天價入水貨，如應采兒及袁詠儀等，萬幾二萬蚊入貨一樣面不改容。
明星有機到手，即急不及待影相上微博晒命。而電訊公司亦趁機以明星效應力谷，連圈中大姐大嘟嘟都來趕「Phone」潮，更大讚iPhone 4一機多用，方便佢拍片上微博喎！

嘟嘟鄭裕玲獲贈特別版iPhone 4，成為首位官方途徑擁有的藝人，「我係iPhone嘅die hard fans，如果唔係今晚都唔會嚟。我由第一代已經用，一直用行貨，經驗話俾我知，行貨有保養。」
嘟嘟還興奮大讚iPhone 4好用：「佢上網check email好快。我之前有Palm、記事簿同call機，依家全部取消，成個人潮咗。另外，同人傾偈亦多咗話題，iPhone 4快咗好多，個screen好靚，影相比之前靚好多，方便我upload啲相上微博，有時用Apps嘅效果嚟整吓啲相，幾得意o架！」

滕麗名　粗微粒效果
滕麗名因拍劇集《怒火街頭》同李璨琛成為好友，今次出iPhone 4都事先問過對方。周六（7日），出席《女人最痛》活動的她，亦機不離手，拎住部新寵周圍玩。

應采兒　萬7蚊入貨
7月6日陳小春牛一，陳太應采兒透露率先買咗部iPhone 4水貨送給老公：「我6月尾已經買咗一部iPhone 4俾老公做禮物，要1萬7千蚊！今日買多部，拉勻冇咁貴。」
收到禮物的小春，則在微博貼上iPhone 4相晒命：「甚麼東西，原來是，啊啊，嘻嘻！生日禮物呢！」丁丁（應采兒）即時回應：「『傻子』才現在買，而我就是那個傻子。」

孫耀威　爆「芒」心痛
孫耀威事先張揚會買iPhone 4俾女友陳美詩，早前更一次過買了四部。他說：「自從買咗iPad之後，佢（陳美詩）都有『詐型』投訴我少理佢。不過知道iPhone 4有視像功能，可拉近人與人距離，所以決定買一部俾自己，一部俾佢。」
不過孫耀威用唔夠一個月，即跌爆屏幕，難怪他於微博心痛形容：「愛瘋（iPhone）4不能摔的，看看我的心跟這屏幕一樣的……碎了。」

Edison契弟潘世亨，一樣有iPhone 4在手，不過同老孫同一命運，用了個多禮拜就爆「芒」而亡！

周秀娜　buy閃燈
向來愛自拍的周秀娜，大讚iPhone 4的閃燈功能：「我最鍾意佢新加嘅LED閃光燈，係暗嘅地方一樣可以影到靚相，仲有前面新加嘅鏡頭，啱晒我自拍放上微博。依家新嘅功能，可以將啲Apps分類改名，唔使好似之前咁多版，搵嘢快好多。」

劉浩龍　貪新忘舊
劉浩龍收到iPhone 4後，即與老死何韻詩互Chat，更攞埋舊嗰部iPhone 3（左）出嚟比較。

洪卓立　當相機用
洪卓立坦言鍾意上網同打機：「iPhone 4行得快啲，玩遊戲或者download一啲嘢會快好多。另外，新機個屏幕解像好高，又清又靚，加上佢快過3GS好多，有佢喺身，我見到咩想影就影，唔使擔心啲相嘅質素，仲可以即刻放上網同人share。」

鬥快騷機
7月尾，iPhone 4行貨正式於香港發售，不過為了證明自己係潮流達人，唔少藝人不惜天價入手，鬥快上微博騷機！

6月28日　濱崎步
早於6月底來港的濱崎步，率先試用iPhone 4。當時甫出香港機場的她，即用出爐僅僅4日的iPhone 4，為接機fans與工作人員拍照，然後全程以Twitter直擊，即時與fans分享。

7月5日　陳敏之
7月初已經有iPhone 4在手，陳敏之急不及待在微博晒命，證明自己係潮人一族。

7月6日　袁詠儀
屬早批用iPhone 4的靚靚，之前講明炒價太貴，自己唔捨得買，不過最後有老公張智霖贊助，7月頭成功到手。

7月13日　關楚耀
關楚耀一收到iPhone 4，即時上載自拍相上微博騷quali。之後仲拎住新寵周圍同人合影，羽翹係其中之一。

7月21日　余文樂
潮人余文樂又點少得最新潮物iPhone 4。7月中有機到手的他，即騷傾電話相上微博。
7月30日　鍾舒漫
她說：「iPhone 4嘅畫面好清晰。除咗可以用嚟影多啲相外，就算收到整份劇本也可即時睇到，非常方便。」

7月30日　李璨琛
李璨琛出席完網絡商活動，即晚上載iPhone 4去微博，仲赤膊上陣，夠晒搶鏡。他猛讚部機影相靚㖭！

8月5日　李嘉誠
早前李嘉誠於記者會結束後，拎出iPhone 4邊按動熒光幕，邊向傳媒展示手機的黑色外殼，並大讚iPhone 4的Data幾好用。