明星靚相大分享☆

「剩女」一詞意指冇人要嘅中女，近日喺內地互聯網大hit。楊千嬅早前就喺微博留言，大談「剩女」，引起網民熱烈討論。

被封為「鑽石級剩女」嘅容祖兒，指閱歷可以令女性更有魅力，順道賣花讚花香：
寶物沉歸底，可能最筍嗰個就係我。
但難聽啲，可以講係「賣剩蔗」、「籮底橙」。個個人睇法唔同，最緊要自己開心就得啦。

楊千嬅已結婚，唔再係「剩女」，但認為字眼有歧視成分，日前出席活動更反問：
點解淨係講女人，唔講男人？
唔使咁激，男人都有「毒男」、「光棍」去形容，世界好公平嘅。

陳法容亦喺微博留言撐千嬅，表明自己如果要結婚，
只為愛情不為年紀。
至怕遲多幾年，佢仲結唔成婚嘅原因係「不因愛情，只因年紀」囉。

出爐港姐陳庭欣被指「豬扒」，佢連聲否認，
我唔會俾自己有呢個稱號。
喂，稱號唔係你自己俾，而係人哋俾你o架。講嘢咁都冇邏輯，港姐喎！

有團體投訴《港男》歧視男性，本來係司儀嘅周秀娜因檔期問題而冇緣主持，但仍然力撐《港男》：
唔好成日反乜反物。
咁又係，被人反嘅滋味一啲都唔好受。周秀娜梗係感同身受嘞。

黃宗澤喺新劇《摘星之旅》同林峯爭女，但現實中佢只會知難而退，因為林峯有樣有家底，
我唔會撼頭埋牆。
咁冇信心？不過冇所謂啦，媽咪姐從冇聽過林峯鍾情「囧」字，對胡杏兒應該冇興趣。