明星靚相大分享☆

「惡婆」喺楓葉國做完騷返嚟之後，因為冇得再做「大聲嗌」嘅評判，於是都好得閒吓。早嗰排，有個細路歌舞劇表演，「惡婆」帶埋細女去睇騷。當晚大婆台嘅二線小生「守信用」同埋老婆「陳皮」都有到，兩公婆四圍同熟人打招呼，「陳皮」仲好主動埋去同「惡婆」say hi。「惡婆」喺外國踎咗咁多年，娛樂圈嘅人識得冇幾多個，但見到有人同自己打招呼，佢雖然「惡」啫，基本禮貌都有嘅，於是好客氣咁回應「陳皮」。

「陳皮」同「惡婆」話好欣賞佢，又鍾意聽佢唱歌，跟住又話想俾個女跟佢學唱歌。「惡婆」單係聽到最後嗰句，已經眉開眼笑啦，有生意送上門喎，鬼咁開心同「陳皮」講：「好呀，睇幾時得閒你帶埋囡囡上嚟學校搵我啦！」之後佢隨口問：「係呢，你囡囡幾歲呀？」「陳皮」話個女依家歲幾。嘩，玩咩，得個一歲點學唱歌呀！「惡婆」面口即黑一黑，熱情冇晒，跟住冇厘表情，用好敷衍嘅語氣同「陳皮」講：「咁遲啲再傾啦！」講完即轉頭行咗去。媽咪姐肯定「惡婆」個心入面已經藐爆「陳皮」。

插圖：Wendy