旅行旅遊法國巴黎村上隆踩入凡爾賽宮　撩交打－明星靚相大分享☆

幻想界人物村上隆在凡爾賽做個人作品展，鬧得滿城風雨。記者會上說：「我想我可以（同路易十四）分享我的幻想世界，並將之推到極致，將巴洛克時期同戰後日本風格來個面對面，帶來美感同衝擊。」衝擊堅大，搞到法國人以為佢有辱太陽王，倡議開幕日刑場示威，究竟有幾激呢？記者、攝影：陳慧敏鳴謝：卡塔爾航空

諗太多?神話眾神 vs千手觀音

Mr. Pointy（ 2003-2004）位置： The Hercules SalonThe Hercules Salon放了個黑面神千手觀音，響應天花上的眾神壁畫。唯恐天下不亂的陰謀論者：「大膽！支避雷針直指天神宙斯喎！」咁掛番個八卦辟邪囉。

誤會啫~我只係藝術家放大圖片

同 LV合作完花花袋後揚名國際的村上隆，啲人睇完佢十幾年前至今的作品，有人話其「太幼稚太 cheap」，「入宮」展覽有辱家聲；另一批仲話其別有用心政治踩場。面對一堆指摘，村上隆由網上講到記者會都係嗰句：「一場誤會啫。我只係個藝術家。」咁你話呢？

十年情債　咬住唔放

記者會上一直沉靜，悶。直至終於有人再追住根本無入宮的露弟弟《 My Lonesome Cowboy》（ 1998）同彈彈波《 Hiropon》（ 1997）係色情作品來問，意思係村上隆低俗趣味，他回應其所謂色情作品只係少數（畢竟都成十幾年前嘅事啦）。而且「女性胴體喺藝術界不嬲都係美嘅象徵。」「我只係想做一些可愛，令人開心的塑像給大家看。佢哋唔係好可愛，見到會令人想笑咩？」都係嘅，路易十四鍾意嚴肅嘛，喺皇宮的雕塑、畫像都木口木面，眼定定望實你，實在幾恐怖的。又有人唔放口，咁你整到人露弟弟超大胸都係色情呀！「啲（宮裏神話壁畫）都有 penis o架喎！仲好多㖭！你哋睇清楚啦！ Don't push me！」我以為這兩個作品都搬到凡爾賽宮展覽，否則都有其他更爆的新作登場。唓！原來無。場內最性感不過係胸大過頭，着住超短裙的 Miss Ko
，到底係本來就無諗住俾佢兩個展出，還是因為「俾人鬧」所以「收番埋」？回應話從無此意，個牛仔「人」在意大利，而且佢都太露骨，不宜在這展出。咁仲嘈乜呢？

拿破崙 vs國王的新衣放大圖片

The Emperor's New Clothes（ 2005）位置： The Coronation Room在畫有拿破崙一世壁畫的 Coronation Room，放了個光脫脫肥波卡通國王。暈陀陀的雙眼顯然是儍瓜國王，題名「 The Emperor's New Clothes」，好難話你不是撩交打。

掟虱乸!太陽王 vs金河童放大圖片

Oval Buddha（ 2007-2010）位置： Water Parterre當年沒電燈，只能靠些微弱燭光或月光照明，所以金碧輝煌的皇宮除了用來晒身家還藉其反光照明。不嬲用色可愛的村上隆都將其幾件作品變了金色銀色就番。咁又死。話說路易十四生日之時，日出之光將透過花園 Water Parterre，直射入他的房間，那條花園通道代表了太陽王。今日這個日本人竟以一隻矇眼金河童閃閃令壓在路中間，仲唔係踩到上眼眉？

現場直擊：日本人都插

上星期記者會當日展區已開放任遊人參觀影相。當地導遊將村上隆完全跳過睇唔見，越過避雷針、可愛狗仔人仔，繼續望穿皇后桂冠，尋其母愛一面；遊客口講唔對路，但一路聽一路對大笑兔仔逐格影。都係嘅，山長水遠來到，遙遙走過那仆親大理石之路，都係為感受皇室奢華，扮幾個鐘凡爾賽玫瑰自我陶醉。才在豪華睡房「入戲」，出來被 Miss Ko
打醒確係精神錯亂。連村上隆 fans都話：「整體嚟講都幾得意嘅，但擺喺呢個歷史地方就唔係咁好。」

反對!日本人（左至右）放大圖片

Yuko、 Kyoko：「我哋都好鍾意村上隆。不過唔鍾意佢擺雕塑喺度，太唔夾喇。」Harada：「覺得好邪惡。」

德國放大圖片

Laura：「太性感，跟這嚴肅的環境不配合。」Eva：「會破壞氣氛。」

意大利放大圖片

Antoniocarilos：「我唔明佢想點， 17世紀同 21世紀放在一起，完全睇唔明。」

支持!拿坡里放大圖片

Maria：「我好鍾意 Miss Ko2，佢好靚。」Mars：「我都鍾意，佢好似我細妹。」

巴黎放大圖片

Guillanme：「位置是陽光照耀皇帝的通道，佢望住皇帝反射金光，簡直完美！」

巴黎放大圖片

Tom：「我覺得好好喎！啲雕塑好可愛好有活力。放在宮裏可以帶來新的氣氛。」

凡爾賽玩嘢有前科放大圖片

2008年及 2009年，凡爾賽宮分別邀請過美國「俗艷王子」 Jeff Koons及法國當代藝術家 Xavier Veilhan來出展，加埋村上隆三個，都係比較新生代同商業化的藝術家。凡爾賽宮的總裁 Jean-Jacques Aillagon都話，當年路易十四同繼任者都鍾意最前衞的藝術作品，甚至拆牆重建都要將最 hit最潮收入宮，「凡爾賽宮是活的，不是死的。需要尊重，但不是塵封式的膜拜。於是今次的展品都經過嚴格挑選，其實很老少咸宜。」但家人哋嘈緊嗰對係「高跟鞋」還是「拖鞋」喎！還是根本就專登找些對比強烈，多人爭的商業藝術家作展覽，新衝擊之餘又有話題。

村上隆@凡爾賽放大圖片