講到 XB360大作，當然係全球賣過幾百萬嘅《 Halo》！三部曲完咗，仲想繼續添食？最簡單方法就係出前傳，今次呢隻《 Halo： Reach》，主角將會同幾個隊友去到一個叫「 Reach」嘅星球齊齊殺敵，和以往操作士官長 Master Chief單拖感覺大不同。文：阿洛
跟大隊搵食 放大圖片 
■極多新型武器，手槍可以配上不同部件，切合自己需要同性格。
《 Halo》之所以成功，因為故事性強，唔 Online、單打故事模式都過癮。今次故事係前傳性質，話說西元 2552年，阿超級戰士主角因為表現優異，被派到外太空移民星球「 Reach」，將要跟隨聯合國太空指揮部（ UNSC）所屬、久經戰陣嘅貴族小隊，同其他生化改造嘅斯巴達戰士合作，成為第 6名隊員。繼承系列作風格，世界觀又闊又大，而且今次有隊友幫拖，更考合作性，唔使自己死衝、爛衝，就以第一個任務為例，就係恢復通訊站功能，要分工合作先可以搞得掂。另外，因為係前傳故事，所以隨住故事發展，預計中後期士官長登場嘅機會都相當大。
放大圖片 
■今次有幾個隊友同你合作，轟天猛將咁款，戰略性倍增。
放大圖片 
■戰車大炮場面不時出現，單靠把槍似乎唔多夠使。
新角色新敵人
睇畫面嚟講，今次遊戲採用強化 3D引擎開發，畫面明顯靚過之前，背景同敵我嘅光影表現好靈活真實，而超大陣仗又飛機又大炮嘅戰役，都好有殺戮氣氛，打起上嚟份外投入。而且今次有新角色、武裝、道具、場景及技能之外，更加有新敵人，而且敵人好怪物 Feel，又識隱形又凶神惡煞，仲有巨大頭目咁款，全部都好生面口，證明廠方落過心思，唔係求其就話係前傳。另外，玩者喺遊戲內亦都可以繼續揸飛機、戰車，而且玩過都知空戰場面亦都更加壯觀。
放大圖片 
■古靈精怪嘅敵人好多，咁矮可能冇咁容易爆佢頭。
放大圖片 
■今次大量新敵人登場，感覺和前作截然不同。
放大圖片 
■仲有識得隱形嘅敵人，但半透明就叫隱形？
放大圖片 
■論畫面，都睇得出有進步，但又未去到大躍進咁誇張。
自己打造個人空間 放大圖片 
■新一集，唔少得係新武器，有多種唔同功能嘅新武器，保證有新鮮感。
玩得《 Halo》，一個人操得咁 Fit，難免都想要上網打吓「人」、露幾手，大幅強化嘅「 Forge World」模式，多人戰役中除有合作、對戰等玩法外，亦提供超多地圖，有山有島有平台，有排都唔會厭。而且玩家仲可以喺呢個連線世界，打造自己專屬嘅多人對戰地圖同規則，入嚟玩就要跟我規矩，咁樣應該可以拉近同西人們嘅技術上差距。
Profile
《 Halo： Reach》主機： XB360開發廠商： Bungie Software類型：射擊遊戲人數： 16人售價：$359發售地點： i-Game（ 2725 3338）深水埗福華街 165-171號福仁商場地下 16號舖 
留言列表
