美聯中原兩大地產代理巨人喺市場競爭係家常便飯，但牽涉到有員工要對簿公堂就唔係常見。早幾個星期，美聯入稟高院，控告前山頂南區助理董事羅文駒過檔中原，涉及違約，中原就表示會力撐羅文駒。

美記指羅文駒喺辭職後未足六個月，即轉去競爭對手陣營，又使用任職美記時啲資料，仲指他教唆其他美記僱員一齊跳槽。羅文駒曾係美記Top Sales，高峰時年薪加佣金高達千萬，點解咁好搵都要過檔？經紀老友通天就跟一言講，事件除咗係人事問題外，其實亦揭示美記有啲經紀長期抱怨，話公司佣金較中原低，員工想賺多啲，於是蟬過別枝。

美記兩年前金融海嘯後，為咗削減開支，將前線員工做一手樓嘅佣金降至百分之二十五，相反中原就冇郁，仍然維持百分之三十五。與此同時，美聯又為區域董事設立賺錢上限，舉例假設本來佣金可以分到一千萬，但公司限定最多係八百萬，咁樣變相減薪。相反，中原佣金就冇咁多限制，結果兩間行嘅高層一比較，自然係中記賺多過美記。

面對有前線員工接連過檔，美聯都要應變，喺上個月決定將佣金提升，一手最高拆佣由百分之二十五調高至百分之三十二，二手拆佣由百分三十四升至百分之三十五。

美聯主席黃建業（右）因為員工過檔問題而大發雷霆，左為中原主席施永青。

向左走向右走

九龍站上蓋豪宅係國內同胞心頭好，有錢嘅內地人唔喺嗰度置業好似冇乜Face，於是乎爭相搶購，其中凱旋門更加受到熱捧。炒開樓嘅「玩具鄭」鄭躬洪，早前跟一言傾開偈時話，最近因為山頂大屋要裝修，就搬去凱旋門住一排，佢發覺每次出電梯時，啲內地住客永遠係向左邊走。

一言奇怪，難道內地人真係要政治正確，住屋都鍾意靠左？鄭躬洪就解釋，佢話凱旋門啲設計，出電梯後向左的單位，一般都係最靚海景，內地人鍾意威，要買最正嘅嘢，所以專揀呢類單位。至於出電梯後向右的單位，主要係內園景，多數係香港用家買嚟自住，於是就出現內地人向左走，香港人向右走嘅現象。

鄭躬洪話凱旋門啲國內業主都係鍾情海景。

大行分析師價值何在？

曾經係最佳分析員，又有民企之父稱號嘅張化橋，舊年轉咗做投資銀行家，最近出咗本新書，叫做《投行分析師的叛逆宣言》，為咗推銷本書，張化橋近日經常公開講嘢。

作為昔日嘅金牌分析員，張化橋竟然話預測係好危險嘅事情，依家佢都唔做短期同中期預測。聽完佢呢番話，一言好驚訝，事關佢老哥以前做咗好多年分析員，對好多公司做咗無數咁多預測，好似公司值幾錢，一年目標價幾多等等，對「預測」一定感受良多，連佢都話預測無用，咁依家大行啲推介或者投資報告價值何在？再諗深一層，大行嘅分析師，每年年薪隨時幾百萬，好景時甚至以千萬計，若以過來人張化橋，「預測係好危險」的肺腑之言，咁點解要畀咁多錢啲分析員，佢哋又有乜貢獻？

張化橋（左）做咗十年分析員，竟然話預測係危險事情

高永文係長興主席好兄弟

賣男裝嘅長興國際（0238）終於上市，早前喺個上市儀式度，有朋友竟然見到曾經做過醫管局署理行政總裁高永文醫生！朋友奇怪，點解一個骨科醫生會出現喺呢啲場合，佢又跟一家男裝上市公司有乜關係？

原來高醫生係長興嘅獨立非執行董事，高醫生話，佢跟長興嘅主席陳育明都係潮州人，仲係識咗十幾年嘅兄弟，既然好兄弟叫到做非執董，當然要畀面啦。

其實今次都唔係高醫生第一次做上市公司董事，佢○五年就入咗前行政會議成員陳智思嘅亞洲金融（0662）做獨立非執董。依家佢做多一間公司嘅獨立非執董，莫非係想鋪路從商？高醫生話「唔係，只係嚟學吓嘢啫」！

高永文（左）跟長興主席陳育明（中）係好兄弟，自然要拔刀相助。