好多車主都會揸車返工或代步，日對夜對，揀得好當然可為自己趨吉避凶。就算今年命犯太歲都唔使驚，今日搵來方海閱師傅，為大家講齊十二生肖兔年駕車忌宜，準車主要留意喇！記者：徐影龍攝影：林栢鈞鳴謝：玄學家方海閱（ 2144 1514）
四大犯太歲生肖肖兔： BMW Z4流水行雲 放大圖片 
■ Z4最具流水行雲 Feel，淨係開篷同性能表現已叫人心醉。
有利顏色為藍、灰及黑，車身或廠徽均可，車款最好如水般啲波浪形。肖兔人士大可考慮藍色 BMW，由車身到 Logo都充滿藍色，想再夾啲可揀埋夠晒流線嘅 Z4，襯到咁絕，就算犯太歲都可放心啦！忌諱方面，今年有機會出現交通事故，愛驅會有所破損，尤其范姓人士，跟當年太歲范寧同姓，揸車應更為小心，唔好心急，盡量慢駛。方師傅教肖兔人士一個破解方法，就係花錢為愛驅改裝，如換音響喇叭及胎軨等，情形等同捐血及洗牙一樣，平安「應」劫之餘，亦可乘機換埋心儀已久嘅 Parts，一舉兩得。
肖雞： VW Polo又黃又方 放大圖片 
■ 16萬幾買到全新歐洲車，所以 Polo可以咁 Hit。
要避開渾圓外形，最好揀番偏向方形同起角嘅車，有利顏色有金、黃同啡色。推薦福士嘅熱門小車 Polo，方形得嚟外表相當討好，的的骰骰好啱女仔揸，最重要係馬力柔順易操控，避免路上出事嘅機會。
肖龍： Lotus尖得有型 放大圖片 
■橙色算冷門顏色，但拉花就較靈活，下年換過都無問題。
有利顏色可揀選橙、紅或紫，車形要揀開篷或尖形，咁 Lotus嘅低矮車身同傾斜車頭，一定啱晒，代理最新嘅 Europa Cup Edition，更以螢光橙作拉花，入晒橙運喇。
肖鼠： MINI銀色細車 放大圖片 
■銀色車身兼有大量電鍍邊框，啱晒肖鼠人士。
雖犯太歲，但只需小心駕駛就得，人反倒平安無事。車款應揀選偏圓一點，有利顏色則為金同銀，男士唔想太 Cutie，不妨考慮銀色 MINI，想有更多駕駛樂趣，大可揀埋有 Turbo嘅 Cooper S。
其他生肖肖蛇：豐田 Prius綠色靈蛇 放大圖片 
■ Prius內櫳闊落，不過唔知新版仲有無綠色。
有利顏色為綠、紅、紫同橙，車身要偏向長方形，推薦 Prius原因，除操控如靈蛇般矯捷外，仲夠慳油同環保。
肖馬： BMW M3熱鬥小馬 放大圖片 
■紅色寶馬 M3 Coupe，高性能亦可作代步房車之用。
大致跟肖蛇一樣，可揀綠、紅、紫或橙色車，車廠最好跟番生肖，如寶馬或拉利（躍馬），最緊要全年都夠勁度。
肖羊： Mazda2的骰溫馴 放大圖片 
■新 Mazda2屬的骰細車，但改款後增加不少有型度。
有利顏色跟龍一樣，以橙為主，馬力要如羊般溫馴，勿大火氣，要扮羊牯，新款 Mazda2啱晒，渾圓橙好搶眼。
肖猴： X1如猴敏捷 放大圖片 
■朱古力色為 X1主題顏色，操控亦如靈猴般敏捷。
跟雞一樣有利啡色，但本身無犯太歲，可揀性能表現高點嘅車款。增高咗嘅寶馬 X1，市區中可如猴子般靈活穿梭。
肖狗： Mito可愛小狗 放大圖片 
■ Alfa好大機會有新代理，亦可在二手市場搵到。
應揀選番紅或橙色車，馬力亦不宜太過剛猛，心水車款有 Alfa Mi.To，揭背車仔易揸又實用，賣相亦如狗仔般可愛。
肖豬： VW Beetle最圓係佢 放大圖片 
■肖豬者想揀渾圓車款，似乎無乜車圓得過甲蟲。
有利顏色有黑、金、灰及藍色，馬力不要太猛，外形要夠圓，點揀都係福士架新甲蟲，賣相復古得嚟仍然相當潮氣。
肖虎： Golf R靈活穿梭 放大圖片 
■揭背細車已夠靈巧， Golf R更具高性能表現。
跟肖豬一樣有利藍色，但車款要偏向細小，可靈巧穿梭大小街道，論人氣當然揀番 Golf R，夠晒熱血。
肖牛： Benz E仔操控銳利 放大圖片 
■ E300 Elegance步大力雄，外表相當沉穩具氣派。
新 E-Class銷售成績極好，其中朱古力色更係啱晒肖牛人士。操控銳利細緻，呈尖形頭燈更跟肖牛者入晒型格。 
留言列表
