時裝設計師施熙瑜（Lucy）等了十三年，終於等到亞姐再次不設年齡限制，以四十七歲高齡一圓選美夢，「我自小好想參加香港小姐，但媽咪唔畀，她覺得選美的女仔是貪慕虛榮，直至她認識我好朋友陳法蓉，開始改觀，覺得選美的女仔都可以好好，無再反對我選美。」

信心十足的施熙瑜成功過了亞姐初選，周日（9日）進行複試前，她努力備戰，日日做gym、跑步收身，自製健康有機餐，更為自己度身訂做兩套衫，務求以最fit狀態過關，「我預了有人會指指點點，初選嗰日，聽到有個女仔話我『嗰個咁老的女人係邊個？都唔知入唔入到圍。』

「其實我無打算入娛樂圈，只志在參與。十年前，好多負面新聞令我好唔開心，男友又一腳踏幾船，我曾經想過自殺，直至返了教會信了主，我的人生才改變。人要活在當下，我一直不結婚，就是為等這個選美機會。」

施熙瑜在九龍塘又一村的馬路旁，緩步跑三十分鐘，主力收腿部的線條。

有心唔怕遲

神采飛揚的施熙瑜，行步路都行得快過人，大概是持之以恒，一星期做足三日運動的原故。這天她在九龍塘來回跑了大半小時，臉不紅氣不喘，體能好過好多十八歲的後生女。為選亞姐，她更開始做健身，令線條可以收得更好，「我其實唔使減肥，因為我塊面好削，只要收一收腰、肚、手臂和大腿，令着衫好睇啲。我買了一部十萬元的微電機，三日做一次，對拉皮好好，朋友都話我無皺紋。」

人到中年的施熙瑜，坦言選美是有心唔怕遲，「唔遲，當年宮雪花都是四十七歲，嗰年是我負責做形象顧問，花姐嗰時好靚、身材好好，只是她言行舉止招人話柄，唔關年紀事。」

施熙瑜坦言曾參選二○○○年的健美小姐，結果落選，屢敗屢戰今次再參選，「我現在的狀態好過當年選健姐，以前我想贏，今次我只是志在參與，無想過要得到名次。一般女仔參選是想入娛樂圈，我唔係，以前盼盼姐（楊盼盼）叫過我拍嘢，我又做過主持，我唔適合入娛樂圈，選美只是我好想做的事。」

施熙瑜設計環保衣服，外銷至瑞士、澳洲和法國等地，當中的服飾可變出最少三種款式，如外套，帽等。