葉翠翠：我有諗過死！

對於葉翠翠來說，08年是既上天堂、又下地獄的一年，她與內地富商黃有龍（趙薇老公）拍拖，享受童話式愛情，卻因突然坐擁兩幢豪宅，換來「港姐股神」稱號，遭袁彌明及吳文忻圍插及傳被包等負面新聞，之後更遭無綫雪藏。事隔三年，翠翠首度剖白箇中始末，她強調當年因不能公開與黃有龍情侶關係才連孑貝黑鑊，最後又因拒絕生仔而分手，種種沉重壓力令她一度有想死的念頭：「每日都過得生不如死！」如今，翠翠由地獄重回人間，將一連五日分享她的感情、工作、人生點滴。

翠翠經歷08年的傷痛後，她說望番轉頭都值得，因改變了她往後的人生。
翠翠經歷08年的傷痛後，她說望番轉頭都值得，因改變了她往後的人生。

08年上半年其實係好開心，簡直好似上咗天堂，識到前男友黃有龍，當時以為自己係全世界最開心、最幸福嘅人。佢為咗識我，搵我拍一個度假村廣告，但印象中廣告最後好似冇出過街。當時覺得佢好真誠，從來冇識過一個人咁有誠意，就係咁畀佢打動咗，嗰陣好似活在童話故事中，佢會為咗想見我一面，喺我家樓下等六、七個鐘，呢啲嘢只會喺中學時發生，冇諗過一個事業有成嘅人都會咁做，佢對我及屋企人無微不至，好多人把口會講、真係做到就唔容易，好難搵到一個咁有承擔嘅。

葉翠翠
葉翠翠

自己講得衰遭老作

想不到08年下半年自己就好似跌咗落地獄，秘密拍拖冇耐就畀雜誌話我被人包，面對指摘每一日過得生不如死，但係自己又唔能夠講我係同黃有龍拍拖、打算結婚，因為內地做生意嘅人唔想出名，所以唔可以公開我哋嘅關係，佢只係大我兩年，點可能包我呢？為佢喊到淚水都乾晒，係真感情嚟嘅，嗰時孭晒所有罪名上身，最痛苦係唔可以將事實全部講晒出嚟，只可以講部分，自己又講得衰，畀人有創作空間，自己當時係做錯咗，以為遇到人生最重要嘅人，好想保住呢段感情，其實公司都有叫我將真相講出嚟，但係我冇咁做到。

8月份做緊奧運主持工作，受盡千夫所指，觀眾誤解、男朋友唔支持，自己有口難言冇得解釋，日子真係過唔到，唔只想退出娛樂圈，我仲有諗過死、諗過自殺，每日好似抖唔到氣咁，覺得好唔公道，日日喺屋企喊，因為自己真係冇被人包。畀狗仔隊跟蹤，每日都好驚，唔敢出街，就算同朋友食飯，都周圍望有冇人影相，朋友問我發生咩事，知唔知自己好似個傻婆。朋友一個個咁離開我，嗰一刻覺得呢個地方容納唔到我，支持唔住，即刻買機票去英國搵讀書時嘅監護人，見到佢就攬住喊，去嘅時候係負自信，一個月後佢令我重拾自信。好多得監護人每日聆聽、陪伴，無微不至地照顧我，起碼冇咗輕生念頭，但依然好大壓力，去咗英國一個月之後好番啲，亦想多謝樂小姐、陳志雲嗰刻嘅支持、鼓勵，好多謝佢哋。

遠走英國<BR>翠翠飽受輿論壓力，遠走英國。
遠走英國
翠翠飽受輿論壓力，遠走英國。
四面楚歌<BR>因負面新聞不斷，翠翠做奧運節目主持亦遭批評。
四面楚歌
因負面新聞不斷，翠翠做奧運節目主持亦遭批評。
寸嘴圍插<BR>袁彌明（右）與吳文忻曾圍插葉翠翠。
寸嘴圍插
袁彌明（右）與吳文忻曾圍插葉翠翠。

拒生仔三個月玩完

愛情來得太快、走亦走得快，期間我亦提出過分手，但係佢用咗好多方法去挽救，可惜呢段感情最後只係維持咗三個幾月。原因係大家除咗性格唔夾感情亦出現問題，文化亦有差異，當時佢想我生仔，我唔想生，呢個係分手導火線之一，我當時只得26歲太細個喇，結婚生仔係一生一世，唔想將來後悔，自己唔係想生一個BB就會得到咩嘢嘅人。之後大家分開咗，其實亦冇正式講分手，只係大家冇聯絡。冇幾耐就知道佢同趙薇一齊，好快仲有埋BB，我當然唔開心，但打擊唔算好大，亦冇憎恨感覺，一路以嚟唔想講趙薇，係怕畀人話借佢宣傳，只可以話大家感情基礎尚淺，所以佢咁快轉軚，自己都明白拍拖唔一定開花結果，今日睇番覺得當時冇選擇同佢結婚、生仔，係揀得啱，同時亦祝福佢哋。

經歷08 改變人生

08年係難過嘅一年，錯在唔夠人生經驗、自己年少氣盛唔聽人講，以為自己啱晒，才搞到咁大件事，但係呢啲係人生經歷，依家諗起都想喊，亦因為有咁嘅經歷，改變咗我嘅人生，磨晒啲稜角，多咗好多朋友，同我傾心事，我變得開心、快樂，總結我覺得賺咗，時間可以證明一切……

口述：葉翠翠

筆錄：影視組

攝影：李柏儒

http://stacy4life.pixnet.net/blog

服裝、場地：Ted Baker

港姐股神錯在冇講真話

講到港姐股神，唉！嗰陣有雜誌問我買咩股票投資，我就答其中一隻係中國人壽，但出嚟就變咗話我只係買一隻中國人壽就賺到咁多錢，雜誌將我嘅說話扭曲咗。當然我自己都有唔啱，因為唔講得同黃有龍嘅關係，所以至有咁多誤會。

翠翠由地獄回到人間，以事業為重，積極學做人。
翠翠由地獄回到人間，以事業為重，積極學做人。

當時我哋已經有結婚打算，所以就夾錢買樓，我嘅資金主要嚟自買香港同內地股賺番嚟嘅錢，但有人攻擊話我對股票唔認識……事實上，當時有好多錢都係靠男友畀貼士賺番嚟嘅，但又唔講得出嚟，我都覺得好徬徨……每個人都會做錯，依家我好積極去學做人，亦不斷磨練演技，希望觀眾睇到我呢幾年嘅努力同改變。

不是拜金女……只想有好歸宿

人哋覺得我嘅形象同錢掛上，覺得我好物質主義，但我唔係咁嘅人，我都唔知點解會建立咗個咁嘅形象。其實每個女仔都想搵一個照顧到自己嘅人，唔係話要大富大貴，起碼唔使日日為口奔馳，每個女仔都會咁諗，點解喺娛樂圈有咁嘅諗法，人哋就覺得係貪慕虛榮呢？

翠翠希望找個可付託終身的人。
翠翠希望找個可付託終身的人。

我都係一個普通女仔，雖然會買名牌，但日常生活就好簡單、平淡，只同屋企人一齊，我都希望有個好歸宿，唔做傷害人、踩低人嘅事，好似我之前男朋友，佢有成就、有事業，我又未結婚，佢又未結婚，大家嗰刻又好鍾意對方，點解要形容到我係一個十惡不赦嘅人呢？我唔係貪慕虛榮，係嘅話已經同佢結咗婚，如果話我被人包，咁我呢幾年一定會不停畀人影到，事實上呢幾年我一單呢啲新聞都冇喎。

翠翠與李逸朗曾傳緋聞，但不介意拍住工作。
翠翠與李逸朗曾傳緋聞，但不介意拍住工作。

選美出身多緋聞

葉翠翠屬港姐冠軍級人馬，樣靚身材正，入行多年除緋聞男友李逸朗外，尚與不少男士傳過緋聞。

李逸朗

06年翠翠與李逸朗傳緋聞，有指她因緋聞影響事業，直至07年她回應李逸朗網誌箍煲時才坦言：「我冇睇過，可能係寫畀第二個睇呢！」漏口風指對方已有新女友。

高鈞賢

翠翠入行前已認識港男高鈞賢，08年翠翠被揭與內地富商外遊，緋聞男友高鈞賢亦留有餘地：「翠翠係個好積極、好進取嘅人，至於感情事，我唔可以干涉咁多。」

韋家雄

今年翠翠拍劇集《4 In Love》與韋家雄傳緋聞，大讚雄仔專業，但她說：「我揀男友條件好高，否則都唔會幾年冇拍拖，蘇民峰話我姻緣未到，所以唔使諗咁多。」

李丞責

翠翠與玄學家李丞責去年因合作《中華福地》傳緋聞，事業有成的李丞責，與翠翠擇偶要求接近，但隨着月前李丞責與另一港姐冠軍劉倩婷戀情曝光，翠翠緋聞女友身份即時玩完。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄