cover face
楊千嬅 犀利人妻
齊家、治國，甚至平天下，家陣做女人，何止撐起半邊天？
楊千嬅曾言，能有今日，全靠心口有個「勇」字。的確，勇者無懼，護士變天后，勇往再直前，榮升影后，更是標誌着人生又走到另一個里程碑。
事業、老公、乖仔一箭三鵰，天倫照片 instagram騷不停，證明這個「勇」字，連家庭都照顧埋，大至兩脇插刀助夫公關生意，小至親自出馬精挑食材餵飽全家，一女當關。
看官總說丁子高旺妻，不如話，千嬅早着先機，懂得適當時候做適當決定，入行唱歌、轉型拍戲、結婚生子，手起刀落絕不優柔，儍大姐就憑一股勁，得天下。
幸福心情日日鮮，我唔恨得咁多喇！未來，更多心願有待達成，但通通跟家庭有關，昔日烈女，今日人妻，變了。
Profile
Miriam Yeung
出生日期： 1974年 2月 3日（水瓶座） 出生地：香港 身高： 5呎 4吋 體重： 110磅
簡歷： 95年，就讀護士學校時，參加第十四屆新秀歌唱大賽並獲季軍，簽約華星。 00年，憑《少女的祈禱》一曲走紅。
主要作品：唱片《狼來了》（ 96），《到此一遊》（ 98），《 Miriam》（ 01），《原來過得很快樂》（ 09）；電影《百分百感覺 II》、《玉女添丁》（ 01），《行運超人》（ 03），《千杯不醉》（ 05），《每當變幻時》（ 07），《志明與春嬌》（ 10），《曼珠莎華》、《單身男女 2》（ 13）。
微博： http://weibo.com/lovemiriamyeung 
盡主婦責任
一副有仔萬事足的樣子，每提起 Torres，千嬅就如食咗十粒軟骨散，但慈母、事業誓不兩立，趕緊戲，女強人口硬死都唔認掛住個仔，「睇手機相， FaceTime都得啦！」咁冷靜？「香港拍戲有樣好，時間梗就到。
「每晚我返到屋企，個仔都未瞓，就算瞓咗，第朝起身又見到。」講多兩句，軟骨散藥力終發作，「不過，兩套戲輪住拍，再唔放假真係會癲！捱更抵夜，好傷身，今時唔同往日。」口講唔掛，個心最老實，唔到你死撐，肯博見稱的她，今日，居然嘆口氣說出這番說話；講到尾，咪就係怕見少咗粒仔囉！
「小朋友呢個階段好緊要，要陪住佢，見證住佢每個小進步。
「唔係話入學讀書呢類實質問題，而係每個成長細節，好似學行路，對佢對我，都係一個學習過程，一項見證。」貴為天后，變回尋常阿媽，煞是可愛。
Quality time，正是現代父母親子教育最重視一環，尊小為大，阿仔至係老細。「有咗頭家，放假就唔係好似以前咁簡單，我話要放假，唔係為自己去旅行、去開心，係想俾多啲時間照顧屋企。
「唔一定圍住阿仔轉，我都想執吓間屋，學吓煮嘢食……」忙過拍戲？「唔一定自己做得晒！煮餸媽咪負責，洗衫、清潔工人主導。」咁你呢？「我去買餸，食材揀好啲、新鮮啲，大家食得均衡啲咁啦。」由內至外，做個丁家揸 fit人。
「我好想一盡家庭主婦責任。」問責制壁壘分明，最後，佢只需負責攬住個仔。
當年唱《飛女正傳》，自認《野孩子》，家陣，《烈女》去買餸，真令我目眩。
13年奪得最佳女主角，乜嘢叫四萬咁口？自己睇。《蘋果日報》圖片 
13年三人世界好幸福，因為咁樣，丁太 instagram更新都密咗！《蘋果日報》圖片 
13年多次被影到同媽咪一齊買餸，購物籃清一色蔬菜，果然夠健康。《蘋果日報》圖片 
13年廿四孝阿媽為愛兒，努力做織女亦冇計。《蘋果日報》圖片
想做好母親
怪獸家長，千嬅唔認，相反，最想做個開明媽媽，跟小朋友做 friend，「依家唔係靠鬧靠罰就行得通，小朋友喺你面前扮乖，一閂房門，另一回事啦！
「我只想做好母親角色，由細開始跟佢 friend，之後至易溝通。」自己事業有成，梗想個仔青出於藍，「虎母無犬子」嘛！「唔想太刻意。
「 Torres聽貝多芬之類鋼琴音樂，冇乜心機，節奏強勁敲擊樂，一聽就郁手郁腳，真人版兒童節目，有人又唱又跳，佢仲跟埋一齊玩。
「初步睇，佢坐唔定，我估可能要活動教學……不過仲細，再觀察吓啦！」小朋友可塑性無上限，梗係睇定啲好。
一派大總管口吻，嫁人了，仍女權獨大——起碼外人如我係咁諗……「我跟老公唔同分工咋！佢做公關，時間比我有規律，家事由佢負責，湊仔返 playgroup；「老公又比較細心，特登揀上晝班，諗住預早俾個仔適應日後返幼稚園甚至小學時間。」好明顯，這是男主內的表現。
「乜嘢男主外、女主內講法，有啲過時，大家盡可能兼顧工作又照顧到家庭啫！」
老婆事業凌厲，老公追到氣喘，幸好，潮州女人眼中，男人第一，難怪她開口埋口讚住丁生。
「在家唔講公事係我哋共識，外面成日以為我同佢返到屋企仍然大把生意要傾，邊有咁好精力呀？寧願睇吓電視啦！」 Quality time，我明白。
力保公私分明，烈女上身，老公搞活動，也要照足程序攞人，「好多人以為我哋兩公婆，做事係咁易單聲就掂，喂！公司唔係我開，我唔可以幫林生（林建岳）揸主意㗎！
「跟規矩去度期囉！」訪問至此，我誠心封千嬅為偶像，作為人妻/人母，好有台型呀！
Miriam's tips
Q：秋冬轉季，哪些衣衫是 must have？
A：皮褸，厚薄不同配合不同天氣，我梗係最鍾意紫紅色，好搶眼。
Q：手袋又點？
A：做咗媽咪，鍾意又大又多內袋款式，分門別類一眼睇晒，出街最方便。
後記
以前，千嬅成日大笑笑到碌地笑到見牙唔見眼……但遠不及今日開心。
講家事，開籠雀，連隨生活形態也變了，為家庭而變，愈講愈冧，我都幾乎忘記關心一下其近況如何？「都係咁啦！好忙囉！」就咁兩句，跟之前口若懸河滔滔不絕講仔講老公，判若兩人。
所以話，女人再強，只為撐起頭家，心大心細追多個女的她，笑言老公鍾意小朋友，只待佢點頭。可見，頭家愈大，丁太應變的能力就愈強。
Shop List
bauhaus銅鑼灣駱克道 496-498號地下 2838 6228
Elite銅鑼灣時代廣場 603號鋪 2506 9333
Salad尖沙咀漢口道 28號亞太中心地下 9號鋪 2723 7600
撰文： Nicola Lai
形象： Annie Hung、 Ricky Shum
攝影： Eric Seto
化妝： Ling Chan@Zing the makeup school
髮型： Vic Kwan@ii Hair Nail
鳴謝： Salad
留言列表
