揞名爆

「肥女婿」自從同「有錢女」結婚後，身形一日比一日發脹，足足比做仔時脹咗三個碼有多，近睇成條雞泡魚咁。最近媽咪姐再見佢，竟然瘦到回復番做仔嗰陣，靚仔番好多。本來呢啲係好事嚟，畢竟年紀漸大，太肥對身體唔係咁好。有二五話佢老婆「有錢女」唔係咁諗呢。



二五話﹕「『肥女婿』雖然花花弗弗咁，查實佢嘅wet友，來去都係『靚仔早』、『搵女圍』呢幾個半唐番，所以一直以嚟『有錢女』對佢都好放心。但近排情況唔同咗，每次見到『肥女婿』，身邊必定有『有錢女』。」為乜突然咁恩愛？

「恩愛？梗唔係啦。早排『有錢女』咪搞咗間電影公司嘅，最近佢將間公司交咗俾『肥女婿』揸fit，嗱，煩惱就係咁嚟啦。一來『肥女婿』有間電影公司揸手，二來瘦身後靚仔曬，於是引埋一班求名又求利嘅妹埋身囉。『有錢女』收到風，梗係驚啦。為咗杜絕呢啲浪蝶，惟有採取『人釘人』策略，『肥女婿』去到邊，佢就跟到邊。」

嘩，咁搞法，「肥女婿」想作反都難過登天咯。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄