娛一叮
9月以五百萬賣身「環球唱片」的吳雨霏（Kary），新歌〈我本人〉派台短短兩個月，播放指數竟撼低Eason、Joey，成為全年之冠。Kary貴為親生女，環球對她當然投放無限資源。月中出新碟，環球即花五十萬為她炮製唱片封面。此消彼長，環球即向一姐謝安琪開刀，將原先投放在她身上資源撥落Kary身上。謝安琪為養家爺仔乸，惟有疊埋心水北上搵人仔。
阿Kay無奈
陳慧琳半退休湊仔，原本坐穩環球一姐位的謝安琪，眼見新丁Kary被公司力捧，自己就要返內地賺錢養家，唔心酸就假，對此她回應時說：「呢啲都要等公司安排。」超無奈。
微博自救
近日長駐大陸拍內地劇《敦煌傳奇》的謝安琪，上月出國語碟，由於零宣傳下，她惟有在微博拎住新碟自我宣傳。
25歲吳雨霏（Kary）九年前以妹妹仔組合Cookies入行，繼而玩轉rock妹憤世嫉俗。轉會環球第一擊的她，反而還原基本步，新歌半滲女人味，在新碟封面中，力sell 40吋長腿，更罕有曬微波。「其實係人都知我以前細路女扮大人，唱歌聲嘶力竭，依家反而會唱得淡淡然，形象亦會性感，始終25歲已經大個女。」據知， Kary今次頭炮出碟，即獲公司以近百萬製作費打造。轉會短短兩個月，除獲公司派往韓國參與「環球唱片高峰會」及任表演嘉賓，公司更安排她分別與Eason和吳尊開音樂會，明顯搵紅星托起她。
蠶蟲師爺累事
Kary受力捧，相反以往貴為環球一姐的謝安琪，上月出了張幾乎零宣傳的國語碟《你們的幸福》後，便要長駐大陸拍劇，至於原定下年二月推出的廣東碟，至今依然毫無聲氣。謝安琪遭環球開刀，其中一個原因是她身邊有個蠶蟲經理人。「其實環球同阿Kay關係唔錯，弊在佢身邊經理人夏森美意見多多，一向講到明阿Kay要走王菲路線，要顧形象唔可以上遊戲節目。依家阿Kay同傳媒關係唔好，公司諗辦法想修補，經理人又話由得記者寫乜 ，叫阿Kay做番自己唔使理。森美試過鬱手打記者，佢梗係話唔使理記者啦，但阿Kay就俾佢累死囉！其實環球都試過同佢傾，不過森美根本聽唔入耳，冇偈傾好耐。」知情人透露。
謝安琪：公司主意
環球與謝安琪經理人關係惡劣，兩邊唔討好。慘成三文治的謝安琪，周日（6日）到亞視出席星光大道活動。對於遭Kary攝一姐位，她酸溜溜表示：「近排係多咗返內地做嘢 ，拍劇屬初哥，叫做嘗試 。呢啲其實都係等公司安排，佢哋揸主意。（覺唔覺Kary分薄你資源？）Kary""把聲幾好聽""總之各有各做啦！」至於環球高層黃劍濤，至截稿前未有回覆。未來數月，謝安琪將長期留在內地拍劇，想出碟遙遙無期，反而Kary攝到位，新碟今個月出，下一張碟據知已落實下年二月推出。環球肯為邊個落重本，一睇就知。
05年粗眉豬膽鼻
Kary初出道時，五官平凡加上粗眉豬膽鼻，在Cookies隊員中並不顯眼，好彩Kary歌藝了得，Cookies拆夥後，即變身rock女殺出血路。
11年變索
以往走rock妹路線的Kary，新碟轉玩女人味，影封套的衫件件有睇頭，其中一件Kary更罕有露肩曬微波。
十人侍候
Kary拍唱片封套當日，攝影師加助手超過十人，場面墟冚。 ####
騷曬40吋長腿得環球睇得起，Kary單影唱片封套都要豪使50萬，更着上高衩緊身衫，大騷40吋誘人長腿。
當日Kary所穿靚衫，大部分穿窿兼少布，因此她預早帶定肉色Bra打底。
周一（7日），Kary拍住Eason舉行音樂會，其間她擘髀、跪地兼倒掛金鈎做出多個高難度動作，盡顯一姐功架。
吳雨霏除了事業得意，亦有傳她與周柏豪（中）正蜜運中。人逢喜事，早前連Eason亦嗌她做「霏姐」。
有指謝安琪經理人夏森美（前）與環球關係惡劣，令謝慘成犧牲品，原本安排明年2月出的廣東碟，極有可能胎死腹中。
留言列表
