爭賭王壽宴頭啖湯　爆超瓊超雲擘面真相忽然1周 850期－明星靚相大分享☆

娛一叮

賭王何鴻燊家族的爭產風波經已降溫，但一家四房人幾十名成員，始終長爭長有。本月25日，賭王90歲大壽，各房爭相籌備壽宴，再掀起爭寵風波。

暫時最得勢的始終是四房梁安琪，可以在賭王生日正日為他在澳門設壽宴。既然正日已經被四房穩佔，二、三房就惟有發力爭壽宴頭啖湯。三房派出超雲做代表，宣布於21號慶祝賭王生日，不過二房超瓊卻突然提早於20號為賭王賀壽。超雲隨即暗寸超瓊打尖搞壽宴冇知會一聲。超瓊周二（8日）出席活動時，反擊超雲說︰「21號個日子其實係我哋讓咗俾佢（超雲）。」

兩姊妹針鋒相對，原來跟超雲和陳山聰今年8月返港後，頭炮活動並非出席由超瓊做搞手的活動。不和原來早有前科。

每年賭王何鴻燊生日，各房都出盡法寶為他賀壽，今年亦不例外。二房超瓊出錢出力，在本月20日於君悅酒店大排筵席，請來過百政商猛人出席世紀壽宴。向來高調的超雲，得悉二房安排後，即時出招。

暗寸超雲幼稚

超雲上周五（4日）出席「十大傑出衣着頒獎禮」，提到賭王壽宴，首先以受害者姿態博同情，「今年我好頭痛，我哋三姊弟（三房）想搞一個party，籌備咗大半年。我睇到新聞，20號原來有另一個派對，連續兩日都有party，驚爹哋會攰同辛苦。佢畢竟90歲，有少少擔心，希望佢20號晚休息多啲，應該會好啲。」當記者問她有否跟超瓊協調，超雲一輪嘴炮轟超瓊，暗指有人打尖，她說︰「幾日前我打俾家姐Pansy（超瓊），可能佢比較忙，冇聽電話，惟有慢慢等佢覆。」擺明寸超瓊避免正面跟她協調為賭王賀壽的時間。超雲這次的「申訴」辣㷫超瓊，即使事隔四天亦怒火難熄。周二（8日），超瓊出席雜誌周年派對時明顯有備而來，她說︰「我諗呢啲唔使喺度多作澄清，21號個日子其實係我哋讓咗俾佢（超雲），所以大家都好清楚大家邊一日做嘢！每一日都安排大家各自嘅時間，基本上都係根據番大家安排咗嘅日子，大家都有自己均等嘅機會。」當提到壽宴安排，超瓊多次強調二房處理得成熟，有意無意暗指超雲幼稚，「我哋比較成熟啲，因為我哋年紀比較大啲，主要都係食吓飯，唔會話好多節目。最重要係爹哋開心，同佢啲朋友聚一聚。（送咩禮物？）我哋比較成熟啲，準備嘅禮物一般都係啲比較有意義嘅嘢，爹哋鍾意支持社會！」

導火線忽然倒戈

超雲和陳山聰自返港後，一直成為傳媒焦點。不過超雲竟忽然倒戈，在現身超瓊搞的活動前，於8月17日偷步出席由丁子高做搞手的bauhaus活動。

一度扮friend

二、三房向來有芥蒂，不過在何家爭產風波上，兩房就聯手對付四房。當時賭王在三太寓所接受訪問，超瓊亦從旁實。

拖仔補鑊

激嬲超瓊，超雲於8月19日就拖埋陳山聰出席由超瓊做搞手的Gucci時裝騷補鑊。雖然事後大會發放三人的合照（右圖），但當日傳媒就發現超瓊超雲冇偈傾。

借老竇做戲

不過自從爭產風波完結，二、三房又疏遠起來。超雲經常借賭王力證自己得寵，就招來二房成員話柄。

拖山聰落水

其實觸發超瓊和超雲今次隔空罵戰，導火線可以追溯至今年8月。當時，超瓊早已收到風超雲和陳山聰今年中同遊英國，從事公關業務多年的她，預計超雲返港後定必成為全港傳媒焦點，於是吼實這個黃金機會，早於8月初就越洋致電超雲。「當時超雲拍心口應承超瓊，返港後第一個現身嘅公開活動，係由超瓊（天機公關公司）搞嘅。」不過超雲返港後卻出爾反爾，突然轉軚搶先現身出席由丁子高統籌的活動，「超雲事前完全冇通知超瓊去丁子高個活動，超瓊好嬲，喺電話不停炮轟超雲。超雲知驚，兩日後咪死死地氣帶埋山聰去天機搞嘅Gucci活動囉。」知情人士說。縱然超瓊和超雲表面上冇事，但二人一直為此而心中有刺，加上連月來超雲經常將自己和賭王的合照放上微博，力證自己得寵，間接將二、四兩房連消帶打，令作風向來低調的超瓊有微言。其實四房人一直明爭暗鬥，今次超瓊和超雲為了爭賭王壽宴頭啖湯，卻連戲都懶交，的確少見。 ####

周二（8日），超瓊出席活動前聲言不接受訪問，但當晚卻主動走近傳媒區，意氣風發地暗寸超雲幼稚。