日本恐怖片玩貞子女鬼feel，西洋就崇尚活死人喪屍，㗎仔近年愈玩愈喪，喺喪屍片中融入秋葉原萌系女生元素，溝埋嚟做出一杯重口味Bloody Mary，衍生出一大堆美女喪屍動漫同遊戲！６月大作《Lollipop Chainsaw》可謂集各家大成嘅喪中之霸，金髮孖辮啦啦隊長索過模，佢唔會陪球星爆房，只喜歡拎電鋸切爆喪屍，《Bio》玩得多你哋又話悶，呢隻夠喪未？
機種：PS3、XBox360 廠商：Grasshopper Manufacture 類型：動作遊戲人數：1人售價：待定推出日期：6月14日
怪雞game王又一嘗試
本作由炮製過Wii《No More Heroes》嘅鬼才須田岡一揸fit，上回玩宅男惡趣味，今次狂喪程度繼續爆燈。故事發生於一間加州高中，騎呢學生拾獲古代魔導書搞到喪屍橫行。索爆啦啦隊隊長Juliet乃係喪屍獵人世家二女，啦啦隊舞蹈配電鋸打喪屍未夠喪，男友被咬冇得救，索性鋸甩個死屍頭，掛喺身邊留念，絕對有力挑戰史上最cult怪雞game之稱號。
生劏女主角
女主角Juliet芳齡18歲，校園啦啦隊隊長，真正身份係喪屍獵人世家二女，老豆家姐細妹都會一齊客串打喪屍。
死人頭男友
男主角阿Nick個死人頭，長掛Juliet腰間，因為已變喪屍，全程有講有笑，間中仲做埋女友件兵器。
白眉師父
Juliet有位日本老伯師父，拎刀斬喪屍，睇落仲有啲似《Kill Bill》個白眉添。
喪粗Band友
喪屍敵人都好風趣，全部都以rock友姿態登場，仲識玩樂器添。
港日美模女郎大比併
女主角Juliet係遊戲最大亮點，美國同日本都有搵image girl做代言 ，美國嘅Jessica Nigri為著名cosplayer，日本嘅川本Mayu乃空手道黑帶高手，仲贏過世界大賽冠軍。香港方面就搵咗Jessica C.同陳七爆房模Emily參加試玩會，就咁睇美、港兩個Jessica有警鐘胸加持最富原作神髓，改名話唔定對發育甚有影響。
電鋸劈炮玩人頭 動作要素滿點
雖然隻game賣囡囡同惡搞，但唔代表佢冇內涵，作為一隻動作遊戲，Juliet有相當多姿多采嘅招式同連續技，比如用啦啦隊花球（細攻擊）駁電鋸重斬，招數似《無雙》絕不馬虎製作；升呢後仲可以將電鋸變做大炮玩掃射，最離譜係可以扮阿七，將男朋友阿Nick死人頭當波咁踢，招式誇張爽快；出招時仲成日露出打底小褲褲，好玩好睇，包冇悶場。
隱藏小玩意夠耐玩
遊戲玩法主要都係過關式邊行邊打喪屍，不過過程絕不枯燥，喺好多地方都會加入惡搞小遊戲，例如用推土機碌喪屍、或者表演鋼管舞邊跳邊鋸絕技。另外隻game亦有育成要素，可以儲Juliet最鍾意啜嘅棒棒糖升level學招。會有好多隱藏收集要素等玩家發掘，唔好當佢係一般得個樣嘅廢萌遊戲。
東瀛索女喪屍文化
洋人都鍾意搵靚女俾喪屍追吓咬吓，《Lollipop Chainsaw》偉大之處係將日式萌少女同鬼妹仔完美融合，展現東西文化交流之美。其實仲有好多日式美女加喪屍嘅例子，不妨趁機會同大家搜奇。
漫畫代表 校園默示錄
又係話忽然喪屍襲地球，一班高中生絕境求生，女主角們個個發育良好，被喪屍咬爛衫又剛好唔露點。女主角唔再花瓶，識拎槍、日本刀打喪屍，靠血腥戰鬥風格上位，《Lollipop》都會同佢crossover，畀錢買DLC可將Juliet打扮成漫畫女主角。
《Lollipop Chainsaw》同其他四款動漫作crossover推出DLC衣着，呢個係《校園默示錄》入面主角毒鳥牙子造型。
遊戲代表 玫瑰姐姐
論惡搞程度唔輸《Lollipop》，女主角阿彩戴西部牛仔帽着比堅尼，手執日本刀同喪屍肉搏。本來係D3推出嘅2000日圓以下SIMPLE系列平價作，計晒咁多個版本總共出咗9集之多，仲有真人電影版，似荷里活B級低成本恐怖片刀仔鋸大樹。
真人版電影仲要出咗兩集之多，其中第二集女主角為寫真女星手島優，擁有I級上圍。
電影代表 Zombie Ass
專拍校服美少女+喪屍作品，喺鬼仔cult片界紅返去日本嘅井口昇，絕對Boss級惡搞美女喪屍王，新作講述一班後生仔女去露營，有個靚女無啦啦走去生吞怪蟲，之後肚痛大解，竟然屙咗隻喪屍出嚟，極盡騎呢無厘頭。戲入面仲有大量屎尿情節兼養眼性感場面，女主角中村有水手裝索爆，cult片迷一定要搵隻返嚟睇。
套片成日影住女主角pat pat，大灑鹽花場面唔少得。 ####
港女代表香港搵嚟Jessica C.同陳七緋聞女友Emily，陳七去維記無咗份工，Emily反而多咗工作機會！
㗎妹代表日本代表川本Mayu樣雖然唔太似，勝在卡哇依、有靚腰，仲識打空手道。加上佢係美籍日本妹，返美國谷game就唔使雞同鴨講。
日版仲搵來新一代動漫宅女神配音員喜多村英梨聲演主角，呢位眼鏡御姐把聲出名夠SM㗎！
洋妞代表 Jessica Nigri由美國網站IGN選出，勝在堅係金毛巨胸美少女，佢平時仲成日cosplay其他遊戲角色，形神俱似。
重攻擊用刀鋸，速度唔算快，但配合連續技使用可以一次過斬殺多隻喪屍，斬手斬腳場面絕唔少得。
阿Nick亦可以變換成不同武器，見唔見到支炮隔籬個人頭？其他攻擊方式包括踢人頭、fing人頭，癲得嚟又唔算血腥嘅。
電鋸可以變身做榴彈炮，唔係一味齋劈咁悶，打唔同關唔同boss都會有新招變化。
唔好問啦啦球邊度變出嚟，但輕攻擊出手快，可以裝敵人推埋一堆再鋸，仲露出小褲！
可以儲棒棒糖同金幣upgrade技能學新招，好似RPG。
隻game會插入好少遊戲，有時會玩番2D時代橫向動作玩法。
用推土機碌喪屍，感覺似《Dead Rising》 ，但用索女做主角玩落比控制男性主角更開心。
留言列表
