PS3雖然係日系主機,但首隻破百萬銷量嘅遊戲,就係鬼仔主導嘅原創FPS《Resistance》,故事講述二戰時期歐洲同美國被高科幻異形入侵,單單玩1P睇主線劇情已經超正斗,難怪PS3連出3集仍叫好叫座。
今次《Resistance》正式登陸PS Vita,邊行邊打都保持到暢快感覺,仲加入爽手篤芒操作:掃芒上彈、篤敵人放手榴彈,用盡PS Vita功能!怕且紅完家用版,又幫PSV增加銷量啦!


廠商:Nihilistic Software
平台:PS Vita
類型:FPS
售價:$298

照抄復仇者?
有別於XB360星戰式科幻射擊《HALO》,《Resistance》係以架空嘅地球歷史做背景,正傳《Resistance 3》已經玩大到1948年二戰結束,外星人奇米拉入侵美國領土,手提版外傳主角Tom Riley係美國東岸一名消防員,喺一次大型救災行動中撞見外星來客大舉入侵,嗱嗱臨執起外星槍械殺怪,但以救人為己任嘅Tom,撞着有死傷者仍然會放低軍火,行埋去扶起傷者逃離災區,相當有意思。雖然背景係舊時嘅美國,今集美軍已經偷取到外星人科技,打打吓你會執到一種藍色能量方塊(唔知係咪睇完《美國隊長》照抄呢?),可用來強化槍械嘅火力、射程,見到記得飛身去執!

篤芒殲敵易
唔少FPS老手,打機仍然喜用keyboard+mouse,揀PC都唔玩PS3,更何況手提機操作按鈕比家用機更少,同FPS遊戲永遠八字唔夾,向來冇乜遊戲廠落力大搞。但PS Vita版《Resistance》卻同時擁有雙joystick、touch-screen操作,角色移動轉向靈活,篤芒又模擬到滑鼠之作用,篤一篤芒即可拋手榴彈,瞄準時間都慳番。配合科幻情節,廠方仲為唔同款式嘅外星武器設計別出心裁嘅指控操作,比如兩隻拇指向外掃就張開防護屏障、連按畫面瞄準多重目標、仲快過facebook tag朋友,操作上記者真係畀極高評分,好期待Vita出《COD》呀!

多人對戰:不過不失
此game只能碰口碰臉以Ad Hoc對戰(2至8人對戰、不可WiFi找對手),對戰時一邊陣營做人類、一邊揀奇米拉,能力分別唔大,玩法不外乎求生、搶地盤等等。可能隻game啲槍實在太好屈,有時勝負太過睇你執到乜槍,玩起來唔算爽,個人比較喜歡單機過版睇故事多啲! ####


消防員拎斧頭搵食,怪物埋身時可篤芒出斧,小兵一斬即死!


長按△走入輪盤型武器選單,推joystick方向揀武器,按select就可以動用能量方塊強化槍械,建議主攻呢支牛眼衝鋒槍,至實用!


遊戲廠求求其其,整到主角老婆好似祥嫂洪金梅,個女又不男不女,完全失去救老婆仔女嘅爆機原動力,專心打怪獸算數!


牛眼槍有乜好用?篤吓畫面上敵人,就可以lock-on鎖定,射出會轉彎嘅追尾子彈,強化能力後仲可以一次射3隻,抵用!


呢支散彈槍連十字弩,散彈係R掣發射,但大招要斜下捽一下入箭,連射慢但威力高。


奧格能量槍唔只可以按L掣開透視眼射穿牆,雙指同時向外扯,仲可以打開防彈屏障。

arrow
arrow

    stacylife 發表在 痞客邦 留言(0) 人氣()