第3類接觸　銀河母艦SIII駕到 Galaxy SIII－明星靚相大分享☆

超薄機身Galaxy SII吸引iPhone 4用家跳槽Android，Samsung成功打造Galaxy＝Android王者形象！加上韓系機強大動員力，近年來每個月推出2、3部改良版，整支銀河艦隊原來侵佔晒先達手機鋪領海，入屋程度足以動搖iPhone地位。
成功登上機王寶座，用家自然期待新王現身，食住iPhone 5現身前真空期，Samsung上月公布新戰艦Galaxy SIII，以4核U、超靚大芒收買人心。
網上人搞團購，OL、潮友齊齊話要出機；上星期四SIII到港，仲有電訊商搞凌晨開賣，排出香港第一條Android買機人龍。你仲未認識呢支銀河艦隊？一齊睇介紹啦！

《FACE》Gadget版監修人
903 DJ Donald
其實我屋企人都開始心郁想試吓部GSIII，旗艦機定價5千幾可以接受，上埋台又有plan慳唔少，差唔多啦！雖然話無LTE，不過𠵱家一街WiFi，有四核操作都已快咗好多，轉4G我就唔會住、轉四核我真係心郁呀！係要講弱點，Android機真心要搞好設計，否則功能點勁都冇得同鬥！

機王殺入MK　凌晨現人龍
Samsung成功唔單只係同鬥功能、鬥大芒，佢仲食腦咁學習賣機同時賣形象嘅公關手段，威脅高高在上形象！上星期四5月31日，Samsung唔單只在洲際酒店將倫敦嘅全球發布會搬到香港，宣戰儀式嘅排場同睇齊。估唔到連電訊商PCCW都落重本助戰，請晒《拳王》黃浩然同《心戰》黃德斌到場，喺旺角鬧市將一箱箱GALAXY S III搬入鋪。兩大猛男谷晒肌，即時搞到成班MK妹、MK嬸圍住狂嗌狂影，唔使排隊黨都夠熱鬧，氣氛一時無兩。記者仲留意到呢條Android人龍極少排隊黨，人人都係粉絲；相比下首賣嘅聯合國炒機團反而搞到件事cheap晒。買智能手機都係想型，咁樣搞一搞，好多用家都心郁郁想出部S3威吓呀！

冇南亞真心龍
不過講到尾，有冇買家先最實際！第一位死忠粉絲，早喺11點20分已經到場，知道冇得拎籌，就一直呆企鋪外，好有heart！直到12點，條人龍已經由銀行中心排到去兆萬中心，記者仲留意到條龍絕少南亞黨，大部分人都話係收到風凌晨有機賣，即時落嚟排嘅真心粉絲。Android機開賣都有人龍，真難得！

4台$0機價plan硬併
總結：3仔最抵
預繳價4台一樣，惟獨係3HK入場價最抵玩，送禮最重本，最緊要係多嚿原廠電，最實用。另加送戲院全年換票證，逢星期三請睇戲，抵！

叫我第1名！
我一直有用開Galaxy，聽到網上消息知道會出S III，即時留意香港幾時有貨到，想第一時間入手。我覺得S III定價合理，今次加到4.8吋大芒，睇得更舒服。同埋佢將Galaxy NOTE獨有嘅S MEMO擺埋入嚟，覺得好實用。做到第1個買家當然開心，仲有簽名tee做禮物，唔錯！

Samsung市務總裁 Lawrence ：藍機要等6月！
iPhone 4就白機delay，估唔到SIII剛相反，藍色機會遲出，Samsung市務總裁Lawrence解話：「因為機身塗層問題要有特別處理方法，所以藍色應該要等到6月先面世！之前網傳SIII生產鏈出問題，但香港會供貨充足，有信心可以滿足晒所有供應商。」

現貨小炒出機食骨
總裁話香港夠貨賣，但記者6月1日殺落旺角check行情，各大連鎖店完全冇貨，惟有一售嘅百記就學足賣iPhone 4S咁，出機要加多1K買埋個不知名品牌藍牙耳機，出機價要成$6,488！

先達價6K 2星期後會跌
去埋先達，G-World Lo哥話呢部機6月1號開始已唔夠貨賣，𠵱家回收價約為$5,800，賣街就$6,000，佢解釋：「因為收到風兩星期內會有貨到，如果唔係真係會好似S2頭幾日個勢咁勁。」

上手實試　銀河四核新功能
SIII主打賣點除了1.4GHz四核速度感，其實仲有一連串體貼用家嘅軟件新功能。其中同S-Voice話音介面同連機械式女人聲，跟4S個Siri餅印一樣。佢現時唔支援廣東話，嘗試以港式英文同S-Voice溝通，發現其語音操作功能不外乎講句open camera幫你開相機；如果想佢同你吹水，呢方面S-Voice表現就大失所望，問句Who are you都冇反應，更唔使旨意問佢人生意義。

Spec.
系統： Android 4.0 Ice Cream Sandwich 處理器： 4核心 1.4GHz、 1GB RAM 制式： 3.5G、 GSM 屏幕： 4.8" 720×1,280 HD Super AMOLED 鏡頭： 800萬（後）、 190萬（前）像素記憶：內置 16GB、 microSDXC（最高支援64GB）體積： 136.6×70.6×8.6mm 重量： 133g 售價：$5,598 查詢： Samsung（ 3698 4698）

畫中畫勁
畫中畫Pop-up Play可以喺同一畫面中一個小窗播video，一個窗用其他功能：打機、上網、WhatsApp都得。SIII果然係四核，咁樣同步多工都冇窒，彌補番冇4G上網嘅不足！

對話要短
用S-Voice試吓send短訊畀朋友，簡單叫句「text＋朋友名＋內容」，講句Hello S-Voice都仲認到，想講大串英文，就會出現下圖結果，話你知佢聽唔明。

開片唔窒
上網睇《蘋果動新聞》，都要分開睇片同睇字。有Pop-up Play，就可以將動新聞縮到一細角，甚至左拉右拉個畫面，然後繼續開網頁睇字。加上部機有成1.4GHz四核，load起上嚟絕對唔窒。

試相好靚
用佢同Galaxy Nexus影同一張相比併，SIII好易就影出前清後矇效果，細節位仲贏九條街。

銀河艦隊檢閱
《星球大戰》黑武士統領Galactic Empire，銀河艦隊船堅炮利，任你Jedi武士幾好揪，白兵一樣可以量取勝。而Samsung Galaxy系列亦配得上銀河艦隊呢個稱號，皆因其數目真係多得驚人，仲級別分明。SIII有如航空母艦，身邊仲有高中低價位嘅護航艦，各司其職圍攻對手，𠵱家就同大家回歸一下20大銀河軍艦。

Galaxy
當年Samsung仍有推出Symbian、Windows Phone，首部Android平台手機Galaxy（冇S字尾）只算小試牛刀，機身仍保留通話鍵，睇落唔多似smartphone，對戰iPhone 3GS，市場反應一般。

Galaxy S
Android平台逐漸普及，Samsung決定重鎚出擊，打造出4吋大芒加1GHz 嘅Galaxy S，同iPhone4同期推出之下都站得住腳，自此Samsung、Android締結最強聯盟，Samsung為集中火力，更「自宮」放棄自家平台Bada OS。

Galaxy S2
趁新iPhone未出之前先聲奪人，外形再次大執，4.3"大芒加最薄位只有8.49mm，視覺上帶嚟頗大震撼。由於後來4S公布後驚喜欠奉，不少人因此轉陣買S2，係Galaxy系列最重要之艦隻！

Galaxy Note
Steve Jobs討厭7吋tablet，Samsung就係都要對着幹，將大芒手機策略谷行到5.3吋，男人當佢大芒手機、女人當佢細芒tablet，喺業界反應冷淡之下推出，卻出奇好賣。

Galaxy Nexus
Nexus系列即Google自行設計之「親生仔」，GN作為第三代，由Samsung代工，因此組合埋Galaxy之威名。 GN乃全球首部Android4.0手機，設計大膽，機面飛走所有實體掣，但話題性都唔及推出4個月後大劈價咁厲害！

小兵炮艇
Android機喺中低價位市場相當吃香，Samsung起步較遲，憑財力迅速建軍，形成一片平價機海，款式睇落分別唔大，勝在較多。

Galaxy Ace
S成功後推出嘅第一部中價機，3000元不到但有3.5吋屏幕，頗為進取。

Galaxy Mini
最地獄級入門機，定價為$1,498，3.14吋芒輕巧機，開始大小通殺。

Galaxy Gio
2000元以內的低價機先鋒，跟Ace外形，機能都差唔多，細啲同相機弱啲就平幾嚿。

Galaxy Y
Galaxy陣容愈見鼎盛，整合後以單一英文字命名，Y系為3"屏幕及$1,400的入門機價。

Galaxy W
W以＄2,698攻中價市場，1.4GHz單核U性價比高，中價機無出其右。

翻生再戰
戰艦用得太耐都會改裝翻新再服役，Galaxy都喜歡挑選受歡迎機款推出upgrade版，攝吓啲旗艦機未現身檔期，保持新鮮感。

Galaxy S Plus
Galaxy S改版，CPU推上1.4GHz，配以當時最新2.3系統及高容量電池。

Galaxy R
雖叫R，但規格和S2極度相似，相機和屏幕規格稍弱，可視為Note登場後的平價S2。

Galaxy Ace Plus
11年一堆平民系列中以Ace最多人用，被睇起出改版，快U、大容量RAM，$2,000價位已備有iPhone4級數功能。

Galaxy Y Duos
低價Y系配上智能手機少見的雙咭雙待功能。將炮口對準神州市場。

Galaxy S2 LTE
趕潮流推出4G LTE機，比S2更大芒，U又快咗，但同四核嘅S3撞晒期，真係唔知點揀好。

逐吋平板
Galaxy Tab一樣用多方位圍攻，以多尺寸逐吋出為戰略方針，仲要唔鍾意出整數，7.7、8.9、10.1都有，可見研發人員致力研究出最適合Tablet尺寸嘅苦心。

Galaxy Tab
初代Tab同iPad故意走不同路線迂迴侵攻，玩7"細板加通話，成功得到回響。

Galaxy Tab 10.1
鞏固陣地後推10.1吋正面硬碰，主打雙核U同Android專為Tablet打造的3.0系統。

Galaxy Tab 8.9
可能係想話人知9.7吋iPad唔係最好，10.1後又推8.9吋版本，大少少細少少咁展開圍剿作戰。

Galaxy Tab 7.7
試過之後都係話單手用7.7"最好，首度使用Super AMOLED plus屏幕重鎚出擊。

Galaxy Tab 2
逐吋試之後反璞歸真，Tab2有10.1"、同7"兩個最普及版本，主打經濟價位。

黑武士真係用Galaxy
唔係我哋夾硬將黑武士拉埋落水，日本DoCoMo真係搵咗佢拍Galaxy S同Tab電視廣告，仲同渡邊謙做對手戲。

銀河戰線分析　官司和解失敗
睇完艦隊睇對手，同Samsung已係手機平板界兩大巨頭，唔單只fans有罵戰，兩間公司仲互相起訴對手侵權，展開咗長達一年嘅專利訴訟戰。連美國法院都嫌煩，叫崔志成同Tim Cook兩位CEO坐低和解。最新消息話兩位傾咗16小時都傾唔掂數，睇嚟一對寃家仲有排鬥。

Samsung CEO崔志成我判你抄我技術，有罪！設計對白 CEO Tim Cook 抄我哋樣，整咗容先同我鬥！設計對白

Samsung、有排打告Design Samsung告技術
早喺2011年頭指摘Samsung抄襲。寫咗38頁證詞，仲呈上3GS同Galaxy S力證喺軟硬件上嘅相似。Samsung就反指用咗佢哋專利嘅流動通訊技術。雙方由美國法庭鬥到去歐洲、澳洲、亞洲，展開曠日持久嘅訴訟戰。

唯一戰果德國禁售Tab10.1
初期處於優勢，荷蘭一度禁售Galaxy手機、德國就到目前為止仍然禁售Tab10.1。但從種種跡象顯示Galaxy新機改版後已告唔入，仍然咬住10.1唔放，難怪美國法院會要求兩位CEO和解。

影響A S誓必分手 LG成異數
Samsung 貴為全球大電零件供應商，處理器、屏幕同記憶體都靠Samsung提供，就算都要靠佢。分析指已決定分手，打算靠東芝、Sharp等日廠慢慢脫離Samsung。從訴訟戰嘅高姿態反擊睇嚟，Samsung都完全唔怕冇咗呢個大客，雙方決裂事在必行，咁如果唔同Samsung玩，下一代iPhone幾時面世？有傳LG已開始生產一批5吋芒，聽講就係為新iPhone 5而設，LG呢間韓廠，有可能影響到成個手機界！

展望：新Note鬥iPhone5
最後展望一下Samsung未來動向。唔少人評論Galaxy S3規格強，但就少驚喜。唔好忘記iPhone新機都未出，Samsung絕對有能力喺年底再出一部機王硬撼。 ####