上年《那些年》旋風襲港，令港人個個「發台瘟」。今年台灣眾星包括S.H.E的Ella、賀軍翔、蕭敬騰同林宥嘉等，都已經準備好响6月登陸香港，定必再次掀起一場暴風雨。而飲食界亦不遑多讓，有多間新開的台式食店同便當鋪，仲有闊別港人多年的台灣食街亦係近期吹到埋身，大家係時候做好防「瘋」措施了。
最地道台灣風味 炸雞扒最脆口
雖然主廚唔係台灣人，不過老闆同廚師特別去到台灣拜師學藝一個月，所以台式風味十足，當中以炸雞扒最為有特色。一般台式雞扒都以size取勝，不過呢度啲雞扒除咗塊塊都有120克重，最緊要跟足台式醃法，唔用港式的生抽、老抽，而用洋蔥、胡椒、黑糖同5-6款台式香料，再用100%台灣地瓜粉來炸，所以顏色比較白，面層凹凸不平卻唔嚡口，加上台灣地道的檸檬椒鹽，少少酸好開胃，食落煙韌好Q，再配埋用港式拉茶方式處理的珍珠奶茶，茶味特別香濃，是最好的3點3下午茶！
Check！
台式風味：★★★★ 抵食：★★★★ 食物種類：正統台式美食都有，小食、特飲同套餐加埋過三十款。評：珍珠奶茶必飲，茶香口感夠醇。炸雞扒同肉燥飯都好有台灣風味。
食客Teddy 廣告
牛肉麵好好食，啲湯唔會太鹹，牛炆得入味有咬口。
小台北
營業時間：11am-10:30pm 電話：3514 4068 地址：旺角亞皆老街8號朗豪坊4樓F1號鋪
叮得台式便當 最方便抵食
Lunch time想喺金鐘搵食真係有難度。幸好老闆Danny引入台灣外賣概念，選用日本珍珠米溝台灣芋香米製作便當，有米飯香味亦更有口感，而外賣木飯盒喺台灣入貨，硬淨企理，仲可以入微波爐。最新推出的嘉義手撕雞便當，瞬間成為食店主打。唔好睇啲雞肉「白晒晒」以為無咩味，其實師傅先用薑、蔥、八角同炸乾蔥配雞胸肉熬1個鐘，再焗30分鐘至入味，淋上雞湯，精華盡吸。不過，成個飯最重要係炸到脆卜卜的台灣紅蔥，因為台灣紅蔥的香味比較重，配合手撕雞肉來吃，增加口感外亦提升雞肉鮮味。
Check！
台式風味：★★★1/2 抵食：★★★★ 食物種類：主打日台菜式，台式便當加埋唔過廿款，不過勝在製作精美。評：食店只做外賣生意無座位，不過價錢夠實惠，主食仲可以自由配搭2款小食，魯肉飯同手撕雞係必試。
老闆 Danny
我哋仲有下午茶時段，有細分量的鹽酥雞同紅燒牛腩便當。
便當工房Bentopia
營業時間：星期一至五 11am-8:30pm、星期六至日 11am-7:30pm 電話：2804 1111 地址：金鐘遠東金融中心地下D鋪
牛肉麵最出色 湯底熬足16小時
由歌手傅珮嘉同台籍老公Steven開的台灣食店，無論係網絡定明星界都有一定知名度，Michael、蔡瀾同徐濠縈等食完都大讚好味。其實Steven的屋企人在台灣已經擁有薄有名氣的台灣食店，香港的招牌牛肉麵湯底就跟足台灣配方熬製，用2斤牛筒骨、台灣豆瓣醬、洋葱、蘋果同差不多10種藥材熬足12小時，再加入秘製醬汁煲多4個鐘，所以牛味突出，不過就一啲都唔油。
Check！
台式風味：★★★★ 抵食：★★★★1/2 食物種類：唔只有地道台菜，仲有粵菜fusion台式煮法，選擇最多。評：明星力撐的台灣麵店，招牌牛肉麵湯底出名夠香濃，熬足16小時，絕對要飲個清光。
左起：Jasmine 舞蹈員、Luna、李生 舞蹈員
我地最鍾意食下午茶，好抵食，牛肉麵湯底夠牛味。
Michael推介
嚟呢度一定食招牌牛肉麵，麵身夠彈牙，湯底牛味足，非常對辦的台灣風味。
三星牛肉麵
營業時間：11am-8:30pm 電話：2866 6699 地址：上環孖沙街1-3號地下
台灣人氣食街 旋風襲港
想食最地道的台灣小食，唔使請假book機票，因為闊別港人多年的台灣美食節再度回歸。今次台灣觀光協會邀請了來自台灣七大縣市的12間特色食店到港，當中包括首次到港的周氏蝦捲、熊家萬巒豬腳，將台灣總店的風味搬到香港。𠵱家《Face》同你率先睇有咩必試小食。
熊家萬巒豬腳餐廳 食足60年 蒜味豬手
呢間餐廳的豬手在屏東縣車城鄉賣足60幾年。餐廳選用最紥實的豬前腿，放入-40度的凍庫，外皮經過冷凍後，就更有咬口，再用60年的陳年中藥滷水醃製2至3小時，淋上用蒜蓉秘製的醬油，香而不油。
周氏蝦捲 台南之寶 虱目魚
台灣虱目魚是台南人的「賣飛佛」，雖然虱目魚魚身細，魚骨亦比較多，但虱目魚魚油多而香，用魚肚位加少許鮮蚵仔、蒜頭酥同香菜末，就成為台南人的傳統特色早餐。
台中寧波風味小館 新派台式點心
食店的泡菜黃金筍是台灣年輕人的新潮小食，選用台中大坑太平山區的麻竹筍，口感比普通竹筍更細嫩，味道更清甜。
宜蘭中山 休閒農業 香口綠茶糕
宜蘭除咗有金棗糖同鴨賞等特產之外，原來仲盛產茶樹。宜蘭中山休閒農業區水源充足，又係宜蘭的保護林地，綠茶生長得很好，用來做綠茶糕特別芳香，是當地的特色零食。
「2012玩轉全台灣－寶島好味道」
日期：6月16日（星期六）至17日（星期日）時間：星期六：12nn-7pm、星期日：12nn-6pm 地點：東港城商場一樓展覽場入場費：需購買$20慈善美食券 (所有善款收益扣除成本後將全數撥捐港澳台灣同鄉慈善基金會) ####
鹽酥雞扒 $22 珍珠奶茶 $16 雞扒啖啖肉，灑上特有的檸檬椒鹽夠香口。由於茶葉無用明火加熱，飲落一啲都唔澀，但比街外的茶味更濃。
豆乳雞飯 $42 台灣腐乳加面豉發酵，再混入酒釀來醃製雞粒，味道鹹鮮，腐乳味輕身易入口，有特色。
滷水拼碟飯 $40 台灣秘製滷水包的香料味重，入味卻不會太鹹，最好食是豬耳，超級爽口。
紅燒牛肉麵 $44 特別用牛、牛筋同坑腩3個部位，加上熬足24小時的牛骨湯，非常入味，清湯唔鹹，絕對可以一口氣飲晒。
嘉義手撕雞便當 $45 手撕雞胸肉入口唔嚡，淋了雞汁的飯有油香，輕鬆K.O.一盒飯。
傳統魯肉便當 $42 用1:5的肥瘦比例，溝出有咬口的魯肉，最重要係當中加豬皮令油香更明顯，加入冰糖的魯肉味道偏甜，非常開胃。
蜜酥香炸雞排便當 $46 將洋蔥同青椒打成蓉，醃雞髀肉一晚，炸香後掃一層麥芽糖，令外層更脆身。
清燉半筋腩刀削麵 $42 台灣的牛骨湯包空運到港，配合炆焗3小時的紅燒牛筋牛腩，香料味唔算好濃，易入口。
三星牛肉麵 $50 日日賣出過百碗的牛肉麵，湯清牛味重，麵條夠彈牙，記得飲晒啲湯唔好嘥呀。
脆皮炸蠔餅 $38 街市新鮮買入的蠔仔，脹身肥大，炸香後蘸點台灣鹽酥粉，嗜辣的更可加點豆瓣醬，更覺惹味。
魯肉飯 $32 手切的五花腩夠咬口，經慢火炒1小時後，完全入味，香料味比甜味重。
店中有唔少明星親筆簽名的湯碗，Hanjin同徐濠縈都留下真跡。
留言列表
