Sony 3D BRAVIA LX900 HX900 世界盃 7月逼埋身 @ 明星靚相大分享☆

Sony事先張揚在今屆世界盃用3D攝錄機拍攝球賽，仲會出埋3D Blu-ray影碟，但到底幾時先會出到BRAVIA 3D電視？日前Sony便正式將BRAVIA LX900同HX900帶到香港，仲話明7月中登場！即時戴3D眼鏡試睇，顯示效果流暢度極高，而且眼鏡唔漏光，睇得舒服！

售價待定７月推出

撰文：布偉倫　攝影：盧展程　查詢電話：2345 2966

LX900功能體貼

即將面世的BRAVIA 3D電視分別係有52吋及60吋畫面的LX900，以及尺寸較細、只得46吋的HX900，都採用今年興起的Monolithic Design。講計畫質同技術，以HX900較好，相對LX900就有較多特別功能，比較適合一家大細，例如BRAVIA Internet Video & Widget網絡影像及資訊技術，可瀏覽YouTube、ontv等受歡迎網上資訊；加入熱感感應器以至光度感應器，冇人時會自動熄畫面以及自動調節光度；不過最得意係小童人臉偵測，如哄得太埋睇電視就會響警號。

機內設有不少3D顯示選項，可因應需要作出相關設定。

兩款BRAVIA 3D電視都支援2D轉3D功能，一按遙控上的3D掣就可切換。

HX900採用6度傾斜的Monolithic Design，甚有型格；而機頂外置式3D立體同步傳輸器亦相當易認。

HX900 3D畫質更暢滑

至於HX900就用上6度傾斜設計，外形出眾，不過機身太薄緣故，3D立體同步傳輸器變成外置式擺在機頂。HX900用上智能動態LED背燈技術，提升到Motionflow PRO暢動流400技術，有效減低動作與動作之間的模糊影像，當睇移動快速的3D影片時就最受惠。買電視機當然用來睇電視居多，配合Sony的2D轉3D技術就最Fit，識得自動辨認到主體再進行「3D化」，效果上佳；值得一提係跟機送兩副主動式快門技術3D眼鏡，仲可以配埋粉紅色或粉藍色的小朋友3D眼鏡，一家齊齊睇冇難度。

LX900備有52吋同60吋兩款，3D效果拍得住戲院。

既然出得3D電視，Sony當然亦順道出部3D Blu-ray播放機S470，支援BRAVIA Internet Video網絡影像功能，以及3秒鐘高速起動，6月中賣街。

買電視送PS3 3D Game

發布會同時宣布7月推出的4款PS3 3D遊戲，包括《PAIN 3D Bundle》、《Motorstorm Ⅱ》、《Star Strike HD》同《Wipeout HD》，全部都係舊Game翻做的3D版本，但好在買電視就會送，抵玩。而同場有得試玩的《GT5》3D Demo版，就第一次在香港亮相，唔知一再延期的《GT5》，會唔會係因為要3D化呢？嚟緊E3遊戲展可能會有答案！

《GT5》3D Demo算得上最有睇頭，如果真正出街版本《GT5》都係3D就最好！