明星靚相大分享☆

陳山聰在《女王辦公室》中飾演的辦公室助理雷宇，因為集集出動私伙潮服而上位，仲俾網友封佢做「潮山聰」。事實上佢唔止打扮潮，就連拍拖 10年的同居女友 Ponny Yeung都潮過人。早前本刊拍得陳山聰帶女友和朋友燒嘢食，當時 Ponny一頭金短髮，一身黑衣打扮，甚有東瀛味道，直至最近 Ponny才染回啡黑髮，和陳山聰到圓方的貴價日本潮流家品店 BALS TOKOYO為新居掃貨。從外表看來 Ponny非常後生，與陳山聰非常合襯，想不到她已 46歲！

購物狂一拍即合

據知情人士透露，陳山聰與 Ponny10年前開始這段姊弟戀，「山聰同 Ponny10年前喺朋友聚會認識，好快就一齊。當時山聰得 24歲，仲係 o靚仔一名，而 Ponny打扮好潮，份人好 nice兼玩得，唔講都唔知佢當時就快 4張嘢！山聰知道 Ponny真實年齡都嚇咗一跳，不過佢唔介意個女仔大過佢，佢哋兩個都係購物狂，唔貴唔新嘅衫唔買，一年仲去日本潮聖幾次，好鬼夾！」
陳山聰與 Ponny除了同愛潮服，兩人又曾從事時裝設計，所以完全唔會有代溝，早年山聰更與女友於尖沙嘴開時裝店。知情人士說：「佢哋拍拖冇耐就開時裝店，不過山聰始終覺得自己喺娛樂圈仲有得發圍，而時裝店又賺唔到錢，最後佢執咗間舖簽番 TVB博一博。最初幾年佢做埋啲二打六角色，月薪得 6千咁大把，嗰幾年山聰好失意，但 Ponny都對佢不離不棄，真係好難得。不過山聰屋企有錢，而 Ponny亦有米，所以女方唔使做，都可以同山聰喪買名牌。」

買樓屋企俾首期

據知陳山聰父親在澳門經營運輸生意，港澳兩地都有不少物業，山聰 4個哥哥都繼承父業賺大錢，惟獨山聰對做生意冇興趣，甘願做小演員，雖然搵得唔多，但有家人撐腰，亦唔使憂茶憂米。不過最近他開始醒覺，公開表示搏殺多兩年儲夠錢就會同 Ponny結婚，仲講到明唔想使屋企錢，不過最近榮升業主的他原來全靠二哥幫忙。
陳山聰本來與 Ponny租住九龍灣麗晶花園的五百多呎單位，最近為方便返將軍澳電視城開工，買入清水灣半島一個約值 300萬單位，而 90萬首期由二哥支付，陳山聰負責供樓。終於有個屬於自己的家，陳山聰下一步是計劃結婚，至於生仔，他曾公開說：「女朋友唔鍾意小朋友，我一定唔會生，你話我大唔透又好、唔肯承擔責任都好啦！我真係未玩夠。」
對於女友大自己十二年，陳山聰只透過經理人表示：「一切私人嘢唔答。」玩姊弟戀啫，又唔係做壞事，唔使咁避忌喎！

玩完識返屋企

早前記者見陳山聰去尖沙嘴夜蒲，有揸車嘅佢飲完酒最後搭的士離開，返回當時與女友同住的九龍灣麗晶花園。