明星靚相大分享☆

15位準港姐本周一（ 7日）第一次正式見傳媒，即有人爆料指「的骰湯唯」李文萱（ Elle）是內定冠軍。由張天愛提名、有個身家過億父親的她，畢業於諾貝爾物理學獎得主高錕就讀的英國倫敦帝國學院（ Imperial College London），質素咁高當然有爭冠軍條件。
而另一位大熱莊思明（ Lisa）亦唔弱， Lisa畢業於理工大學設計系，有個身家 8億拿督老竇全力支持，仲有模特兒家姐莊思敏教路㖭！近日本刊於莊思敏 facebook內發現，她與細妹孖女莊思明及莊思華，突然由山頂道 4千呎一億獨立屋搬往貝沙灣新居。雖然她並未透露原因，但據知此舉是為細妹 Lisa參選港姐鋪路，希望以風水屋助妹奪冠。

搵高人睇風水

據知莊家三姊妹搬屋前曾搵高人指點，知情人士透露：「莊思敏早前搵風水師睇過，話住緊嘅獨立屋漏水情況嚴重，漏水即係漏財，對家人名利都有影響。有錢人唔多唔少都信風水，加上 Lisa又選港姐，佢梗係想個妹贏，但獨立屋要重新執過等唔切，於是就用 6萬蚊喺貝沙灣租咗個千幾呎單位暫住。 5月初莊家三姊妹齊齊搬入貝沙灣風水新居，之後 Lisa即成港姐入圍大熱。 5月 27日，莊思明同家姐莊思敏更去咗旺角花墟行街，為新屋買花，兩人逛了多間花店，最後訂了兩棵矮樹，以及幾盆蘭花。

旺桃花利選美

本刊記者致電玄學家麥玲玲，她指在家中種樹有助催運，「喺屋企種樹係可以催旺名氣運，而蘭花則可以催人緣及旺桃花。貝沙灣嘅向海單位，西南見水，東北見山，風水由 2004年好到 2023年。加上莊思明今年 23歲，勁旺桃花，對選美有利。」
本周二（ 8日），已被通知入圍嘅莊思明未有回應擺風水陣一事。記者其後致電莊思敏，她承認最近搬新屋，「原本間屋已經漏水半年，初時淨係露台漏，依家所有房都浸濕埋，裝修師傅話一定要大修，要整成年先至得，所以暫時咪同細妹租屋囉。（係咪想搬風水屋等 Lisa贏港姐？）呢啲唔講，總之我對佢好有信心！」正所謂一命二運三風水， Lisa條命肯定生得好，但擺陣作用有幾大，就要拭目以待喇！

張莉莎鬼祟避傳媒

本周一（ 7日）下午 2時，港姐 15名入圍佳麗首次到電視城報到，早前被本刊踢爆離奇鼻高胸變大的張莉莎（ Suyen），卻向大會表示家中有急事而延遲 4小時到場，她對傳媒提問一概無回應。晚上 11時，一班佳麗乘坐無綫專車到調景嶺，下車時張莉莎表現得相當鬼崇，與另一位佳麗 Toby極速乘坐一部私家車離開，成功擺脫不少傳媒追蹤。兩人在油麻地下車後再轉乘地鐵，張莉莎在灣仔下車後，再跳上的士離去。呢位是非港姐，為避傳媒認真費心思。