明星靚相大分享☆

杜麗莎與陳潔靈，十年前合作過《麗花皇宮》，但自此卻成為絕唱，皆因杜麗莎覇道個性並非人人接受。原來，兩人當年合作，曾經因為爭戲份、爭排位而擦出火花。知情者話：「 01年，高志森先搵咗 Elisa（陳潔靈）做舞台劇《麗花皇宮》，因為 95年佢哋已經合作《我和春天有個約會》，後來再搵 Teresa（杜麗莎）。兩個阿姐碰頭，當然各有意見。 Teresa初時對 Elisa蓮茜個角色好有興趣，但因為製作人高志森一早已定角色，咁佢惟有叫對方加番啲戲份俾佢。」
「雖然 Teresa個角色婉碧係配角，但佢對排位都好緊張，次次都要當眼位置，連拍海報都唔例外。女主角 Elisa見佢頻頻搶鏡，亦不是味兒，兩個次次排戲都唔順超 o架，加上 Teresa喺片場當正自己係女主角，對人呼呼喝喝，台前幕後都唔鍾意佢。翌年再做第二輯時， Elisa曾向高志森詐型，最後，咪搵咗關菊英代替 Teresa，亦因為咁，連劇本都改埋。」

辭演換機票

據知，當年的杜麗莎已經好識為自己傾條件，試過在公演期間，以當時身處加拿大嘅老公病咗為由，突然辭演。高志森為了息事寧人，專登買了兩張商務機票，接其丈夫及女兒來港，她才答應繼續演下去。
本刊記者向陳潔靈求證當年恩怨，她想了想便說︰「嘩！咁耐嘅嘢我真係唔記得晒。至於我做嘅角色蓮茜，係成個故事嘅骨幹，佢想做都做唔到啦！（點解之後第二輯冇再同佢合作？）嘩，我真係唔記得喇……唔係你同我講，我都唔記得有第二輯㖭！」話唔記得就怪，皆因陳與丈夫張耀榮，都是因為拍這個舞台劇認識而結婚，而她亦在過去訪問中講過，該次表演是她一生中最難忘的。
陳潔靈話唔記得，不過，搞手高志森則答得可圈可點︰「個劇我係搵咗 Elisa先，就算有人要求都唔會換人。至於話 Teresa要加戲份，咁耐嘅嘢邊記得呀，都係照劇本分配啫！其實 Teresa份人不嬲都係率直鬼婆性格，佢一嘢『辦』落嚟唔會解釋 o架，你接受到就接受，接受唔到咪覺得難頂囉。」
問到當年海報爭排位一事，他說︰「咁海報真係拍咗兩次嘅。（係咪拍多張遷就兩位阿姐？）咁排位嘅嘢一早定好晒，總之係一早安排好啦。（公演時 Teresa係咪突然辭演，搞到你要送咗幾張機票俾佢老公同個女？）當時 Teresa情緒好失控，如果要換人兼再排過戲，我會好大鑊，咁做係大家同意嘅。（咁點解 02年再做第二輯，原班人馬上陣，你要搵關菊英頂佢個位？）都係想多啲新鮮感，咁轉吓囉。」
記者搵過當事人杜麗莎，可惜佢身在多倫多，於截稿前仍未回覆。

何麗全撐腰

今年 54歲的杜麗莎，十年前有風駛盡，近日更變本加厲，惡婆形象深入民心，不但連環插爆參賽者，喝駡主持森美及 TVB Music揸弗人，還句句窒住死敵陳潔靈，如此囂張，皆因有高層撐腰。
知情者爆︰「 Teresa（杜麗莎）同何麗全好 friend。佢數口好精，唔單止企硬每次收一萬亮相費，仲主動提出話搵班巨聲幫落佢 studio拍《巨聲工房》，每日收番 5千蚊租 o架！佢有高層撐，咪橫行無忌囉，郁啲就鬧到人狗血淋頭，所以大家都怕鬼咗佢。依家佢俾人圍插，上頭咪叫佢過吓冷河，等風頭火勢過咗， 8月再返嚟做。咁大舊肥豬肉佢點會放過，佢仲可以乘機宣傳佢間唱歌學校㖭！」
對於杜麗莎辣火頭遭圍插被飛一事，陳潔靈息事寧人話：「我查實唔睇報紙，唔睇電視，《巨聲工房》都冇睇過，係傳媒話我哋不和、有是非，我哋無嘢，你一句我一句呢啲係互動，個節目出嚟先好睇……」
問到知唔知 Teresa用粗口鬧隊 band，她說︰「咁……如果隊 band出錯，我都會出聲 o架﹗（用粗口當場鬧喎﹗）我唔知！（知唔知杜麗莎八月回歸？）真係唔知，我每次入到廠先知有咩人，我只會專注做好自己嗰 part！」

不過，提到杜麗莎酬勞一萬蚊一集，陳潔靈亦愕然地停頓了五秒才說：「 TVB肯俾咪得，代表佢叻囉，可以 fight到。（其他評判只收車馬費？）每個人 case唔同，我不便評論。（會唔會幫自己 fight番高啲酬勞？）我答應去呢個節目都係為興趣……呢件事報道出嚟……其他評判睇到會覺得唔公平，個心一定唔舒服。」
另一位評判趙增熹，聽到杜麗莎收每集一萬蚊酬勞時，亦呆了數秒：「吓，我唔知！（咁你收咩價？）（口窒窒答）嗯……之前收開咩價咪咩價囉！（係咪五百蚊車馬費？）同之前一樣咁多！無特別調整。（有傳杜麗莎有何麗全撐腰，八月可以回歸﹗）我唔清楚！」，至於何麗全，可能見風頭火勢，搵足一天都沒回覆。