古仔心口個銀牌，同胡杏兒個囧樣成個餅印，雖則係搞笑，不過 FBI估杏兒睇到應該笑唔出喇！而吳君如嘅眼罩就離奇有喱士邊，似係底褲改造喎！
張栢芝復出頭炮畀咗黃百鳴套賀歲片《最強囍事》，仲搵埋甄子丹、劉嘉玲、古天樂群星拱照，未開拍已經贏晒。不過 FBI覺得最威始終係古仔，除咗喺《最》同栢芝有床上激戰搶晒鏡之外，同期仲有另一齣賀歲片《神奇俠侶》上畫。
古仔同吳君如喺《神》入面做退咗休嘅超級英雄， FBI睇咗第一輪劇照，發現飾演「炯炯俠」嘅古仔，變身後似足蝙蝠俠，不過最抵死係佢心口個鐵牌，睇真啲原來係個「囧」樣！反而做香香俠嘅君如，造型就唔夠古仔咁突出，只係得個喱士蝴蝶眼罩，蝕晒！套戲由陳可辛監製，做乜長毛唔益吓老婆呀！
笑到幾時呀？設計對白
擁有千里眼嘅古仔，收山後冇地方發揮絕技，惟有用千里眼刨吓報紙過日辰。
香香俠吳君如退休後轉行做大廚，仲開咗間叫「小甜谷」嘅食店。咦，原來係谷德昭做導演，唔怪得咁 hardsell幫侄女谷祖琳間甜品店賣廣告啦！
黑面神
古仔上週三（ 13日）出席 Fendi活動，搞手丁子高不停叫古仔與其他嘉賓影合照，由杜琪峯到黃偉文影足 7次，搞到古仔臨尾都忍唔住口噏噏呻：「影完未 o架？又影！」
全站熱搜
留言列表
