明星靚相大分享☆

睇完豪宅又撐完枱腳後，心情靚靚嘅薛嘉麟就拖住諸葛公主離開晒恩愛，只見公主左手中指已戴上 4卡訂婚鑽戒（小圖），難怪笑得咁冧。

諸葛梓岐同 32歲 Neway二少薛嘉麟拍拖 2年，早前雖爆出薛二少跟 o靚模開船 P，但諸葛一句：「我信佢，唔想將事情放大」，對男友撐到行後， 2人感情有增無減。據知薛二少最近更向諸葛公主求婚成功。
上週六，本刊直擊戴住 4卡鑽戒等嫁的諸葛公主，陪薛二少到油麻地睇中醫，二人連 1分鐘的「程」都要攬到實，之後更孖住去九肚山睇豪宅，公主嫁入豪門又邁進一大步。

上週六（ 16日），諸葛梓岐出席時裝騷時，提到近期日本反中情緒高漲，一度延遲赴日宣傳日語唱片，其間亦不忘將男友掛喺嘴邊：「男友（薛嘉麟）都係家人一分子，不過佢都好忙，最近好少時間見面。」

16/10老閉睇晒

公主箍實
去油麻地睇中醫，入後諸葛梓岐就鬼咁熱情攬實男友唔放，十足浣熊一樣。

二少啜頸
之後薛二少亦忍唔住，啜向諸葛梓岐條頸，煙韌到死。

連體互抱
到中醫診所前， 2人即停止癡纏，但依然好似連體嬰咁抱住唔放。

攬完去睇樓

口話少見面，但本刊直擊諸葛公主完騷後，即踩上薛嘉麟的 Alphard 7人車會合男友，然後陪薛二少到油麻地永星里睇中醫。記者從閉路電視所見， 1分鐘程 2人亦爭取時間在內攬埋一嚿。
纏綿過後，睇完中醫的薛嘉麟即與諸葛公主直踩去沙田九肚山寶柏苑睇豪宅，準備將來婚後築愛巢所用，之後更孖住一齊去九龍香格里拉酒店撐枱腳。記者直問二少是否與諸葛梓岐睇樓，但薛二少扯開話題答：「食飯！」之後記者再問諸葛公主同一問題，她一直封口不作回應，只講句：「 please! please!」請記者讓路。但撐完枱腳後， 2人態度突然合作，唔只十指緊扣任影，記者還發現諸葛公主的左手中指上戴上 4卡訂婚鑽戒，睇來好事近。

睇定豪宅
上週六（ 16日）下午，薛嘉麟就帶埋諸葛梓岐到九肚山寶柏苑、面積約 2,000呎面向馬場景的獨立屋豪宅，現市值約 4,000萬睇樓。雖然貴但近住薛家位於九肚山的大宅。

直踩同居竇
睇完樓、撐完枱腳後，薛二少即載諸葛公主返回 2人現居的寶馬山花園愛巢。

微博爆喜
上週二，諸葛在微博上以英文強調自己準備好重大嘅轉變，暗示自己將會結婚。

唱 K爆求婚

據稱身為保良局總理的薛嘉麟，於 2星期前約咗班保良局好友唱 K時，將向諸葛公主求婚一事爆響口，據知情人士透露：「嗰晚 Ernie（薛嘉麟）飲到醉醉哋，突然搶咪大嗌：『我已經求婚成功啦！』之後班 friend仲追問佢幾時擺酒，仲話要儲定人情，跟住 Ernie就大笑咁答：『快 o架啦！』」睇嚟諸葛公主好快要叫法拉一聲「大嫂」喇！

又有是非
法拉：我呢世人都唔放料！

諸葛梓岐冧掂薛老太好事近，但據知佢嘅未來「妯娌」陳法拉就激嬲薛家兩老。話說本月 7日，薛世恒同薛嘉麟兩兄弟夾份以 130萬買咗部 Porsche Panamera畀薛老爺作生日禮物，點知兩日後（ 9日）即被狗仔隊影到法拉同男友坐住呢部新波子，薛家中人即質疑法拉放料。本週一，記者向法拉提起新波子係咪兩位薛少爺送畀薛老爺作為生日禮物，近排爭視后士氣高昂嘅法拉笑住回應：「總之部車唔係我嘅，你問番佢哋啦……我呢世人都唔會放料。」諸葛梓岐準備同薛嘉麟結婚喎？「傳聞或者唔係事實嘅嘢，我都冇回應。」

法拉回應諸葛同薛二少準備結婚時皮笑肉不笑，即係學《讀心神探》姚 Sir話齌，佢唔係真係笑緊囉。

薛家部新波子喺本月 7日首次登記，本月 11日見報後再查過該車牌，但即於當日下午 4點幾已不見該車牌的登記，薛家做嘢都幾快手。《蘋果日報》圖片