本月 9日啟播嘅 now 101台遊戲節目《撳錢》，最初兩星期免費畀客戶試玩，每晚送出 10萬獎金，當然非常吸引，觀眾爭相組智囊團返屋企等撳錢，高峯期參加者多達 60,866人，不過 now 101台前晚開始收費，捧場嘅觀眾就急降，前晚只有 11,719人加入戰團，比高峯期少咗近 5萬人，但就繼第二集後再誕生過晒 8關獨得 10萬嘅幸運兒。
少人爭益玩家 放大圖片 
主持黃婉曼早排去咗銅鑼灣宣傳《撳錢》，大受歡迎。資料圖片
《撳錢》搞免費試玩時好受歡迎，日前試過有超過 1,200位觀眾連過 8關，最終每人只撳得 79蚊得啖笑，本月中有一集因為答案出錯， now 101台為安撫被叮走嘅 12,231位觀眾，特別安排畀佢哋免費試玩多一星期，但前晚開始收費，觀眾只係過萬，計番仲有幾日免費試玩嘅觀眾人數，其實 now 101台一開始收費，明顯流失咗一班捧場客。由於少咗參加者，競爭嘅激烈程度亦減低，變相答中 8條問題就可以分多啲獎金，前晚有 6人闖入最後一關，結果一名幸運兒擸走 10萬。網友 Chun Fung就喺《撳錢》 facebook專頁留言話：「少啲人玩，多啲錢分呀，正呀。」
預咗人數下跌
對於《撳錢》收費後，前晚觀眾流失， now香港頻道副總裁杜之克噚日喺電話中回應：「要睇番數據先知，始終噚晚係進行收費模式後首晚節目，買台嘅未必一定玩，當中亦包括上次免費嘅觀眾，不過呢個數字係預計中，我哋仍然希望越多人玩越好。」 
《撳錢》前晚起要收費，令觀眾人數急跌。
全站熱搜
留言列表
