明星靚相大分享☆

媽咪姐手帳

袁詠儀（靚靚）為咗照顧4歲半嘅愛子張慕童（魔童），近年已鮮有喺幕前獻技，專職做一個好媽媽，去到邊都親自湊仔，從來唔假手工人。

早前媽咪姐悠悠閒闊太上身，去咗銅鑼灣嘆咖啡食cake，一入餐廳就見到靚靚。當日佢同魔童坐喺隔籬枱，同場仲有位auntie喺度。兩個大人一味掛住交流湊仔經，坐喺媽咪大髀嘅魔童閒極無聊，一時腳un un玩iPhone，一時手巾笠頭，非常調皮。不過講開又講，小魔童愈大愈靚仔，輪廓似足佢靚仔爸爸Chilam，果然虎父無犬子。

大約一個鐘頭後，靚靚飲飽食醉就一支箭飆出餐廳，魔童則由auntie抱住上車走人。總之全程魔童唔需要自己行路，真幸福！ ####

靚靚跟朋友吹水，囝囝魔童就喪玩iPhone。其實魔童都4歲咯，點解唔俾佢坐櫈呢？

玩完iPhone，魔童以手巾笠頭。但靚靚冇理過佢，可能對魔童嘅奀皮行為習以為常。

high完tea，靚靚一馬當先衝出門口，朋友抱住魔童緊跟其後。至爽就係魔童啦，全程抱抱，成個王子咁。

阿仔，你大個仔啦，應該落地行。（設計對白）