天后的後現代轉變忽然1周 844期 @ 明星靚相大分享☆

媽咪姐手帳

天後唔易做！呢個應該係人都知嘅，你估日日着靚衫，年年搵千萬真係咁易咩？好似Kelly（陳慧琳）咁，號稱係「幸福天後」啦！

但轉個頭，竟然不幸小產，啱啱又爆出佢個有米老公劉健浩（Alex）喜愛夜蒲，仲要一星期蒲足四晚，天後都要獨守空幃呀！好在Kelly嘅情緒智商同身高成正比，話自己都一星期行足4日街買嘢減壓，兩公婆要互相遷就喎。

都啱嘅。天後喎！要搵個襯得起（至少敢高攀）自己嘅人的確唔易，點都要珍惜另一半，先有光明嘅未來。呢幾日，媽咪姐頻頻陪天後出動，就發覺鄭秀文同楊千嬅真係唔同曬！

講Sammi先吖，一向係硬朗事業型嘅佢，依家變得溫柔如水，尤其見到小朋友嘅時候，完全係母性返曬嚟。尤其對住單眼皮嘅細路仔，笑得勁冧，講到明：「我鍾意單眼皮嘅男仔！」梗係！Honey許志安係單眼皮㗎！講真嗰句，Sammi今年都三十九歲嘞，話就話未ready結婚生「小安仔」啫，但生育deadline迫在眉睫，又點會唔諗呢？咁阿安仔未出聲，就惟有日日跑步，keep住個body，等啦！

改變生活等生仔

嫁咗嘅千嬅又點呢？今年三十七歲，細少少。不過點計都好，生得嚟，都係高齡產婦。所以，兩年前結婚，丁生丁太已經話想生㗎嘞！可惜，千嬅好忙，肚皮又無乜聲氣，丁子高都心急㗎！早排，佢先同本刊承認去驗精，依家仲成日捉千嬅去跑步狂操。丁太見老公咁積極，都唔敢怠慢！星期二（27日）出席公開活動，見到同場嘅李美鳳，即刻有偈傾！傾啲乜？「電眼美人」當年一擊即中，生咗對龍鳳胎喎！取吓經，沾番啲旺氣都好啦！而且，以前唔凍唔飲、最愛香檳嘅千嬅，依家日日飲清水養生。酒？睇吓咁啦。真係變幻原是永恆，天後都走唔甩！

見微知著　天後心

鄭秀文同楊千嬅都係微博粉絲，得閒就上去分享生活點滴。睇得細心啲，明白天後多啲啲！

情侶馬拉松

天後有相似

藍奕邦日前將梅酒相放上微博，徵求同好者，估唔到兩大天後Sammi同千嬅都立刻回應，前者話愛梅酒又愛清酒，丁太就話係至愛之一，不過依家要養生，唔敢飲嘞。

飲水保健

以前千嬅最鍾意飲香檳凍檸茶，但丁生一聲令下，要戒生冷嘢，丁太去佛山登台都只敢飲水，好乖！

丁生做辦

生仔嘅嘢，梗要共同努力！丁生得閒就將跑步相放上微博，平日去應酬又不近女色，真係留番啲精力嚟生仔。 ####

神啊！幾時輪到我？（設計對白）

母性突發

單眼皮囝囝上台送花，Sammi極佢都無反應，但天後依然笑曬！落咗台，一見鬼妹仔，就轉channel，用英文細路。有耐性到呢……點估到佢就係以前嗰個好易忟憎嘅鄭秀文？