娛一叮
有線、now及城市電訊成功申請加入免費電視台行列，與大婆台無綫正面交鋒。近日「城市電訊」掌舵人王維基，高調向無綫大肆挖角，六嬸方逸華慌忙下旨救亡，電視台正式進入戰國時代。
無綫形勢立立亂，本刊收到消息，早前離巢返內地搵食的佘詩曼，竟然趁機搏亂，暗幫所簽的華誼兄弟公司，私下向娘家相熟花旦、小生甚至甘草埋手，遊說過檔。其中與阿佘份屬老友的楊怡，坦言收到call，至於與她私交甚篤的陳豪亦向本刊透露：「我都有聽聞過。」
雖則話掉轉槍頭啫，有好路數梗係要益自己友，阿佘你話係咪？
自now、有線及城市電訊成功申請成為免費電視台後，一哥無綫已不再獨大。三家電視台各自招兵買馬，不約而同瞄準無綫台前幕後。不過數最高調的，首推城市電訊掌舵人王維基，近日他公然向無綫上至包薪藝員，下至幕後編導人員等大肆搶人，一班小生花旦如陳豪、楊怡、鍾嘉欣等統統承認收到挖角SMS。
電視台大戰一觸即發，出名孤寒的無綫，今次亦要出動銀彈政策，製作資源部總監樂易玲揚言：「六嬸話個個都要留！總之個個都會傾，要將藝人薪酬提高。」據知為挽人心，部分一線小生花旦會加兩倍人工。
搵自己友鞏固勢力
其實，未開始挖角潮前，效力無綫14年的佘詩曼，率先離巢北上掘金，以1,500萬人民幣包薪兩年，加盟內地龍頭娛樂公司華誼兄弟新成立的經理人公司「藝人村」。她跟無綫，就改簽兩年部頭合約，每年替娘家拍30集劇。
據知，阿佘雖然貴為無綫一姐，但到內地發展，始終人生路不熟，更要面對公司一班拍慣大片的趙薇和張涵予等一線紅星，搵自己友鞏固勢力是阿佘當前急務。「阿佘之前已經搵咗廖碧兒加盟，佢知公司睇中黃日華同楊怡，就搵經理人Tina遊說黃日華過檔。不過華哥唔想長期留喺大陸拒絕咗，剩低楊怡，阿佘就自己打電話俾佢。」據知，阿佘在電話中，向好姊妹開出12萬一集電視劇的超筍價，比起楊在無綫的一萬蚊一集電視劇，足足高出12倍。日前楊怡出席活動時，承認收過挖角電話：「我最向錢看，都有心鬱㗎。（會開咩價？）諗到幾大就開幾大。」但當記者問她是否阿佘找她時，楊怡沒有否認，但稱要保密。
至於跟阿佘私交甚篤的陳豪，亦向本刊表示：「我都有聽聞過（指阿佘挖楊怡過檔）。（阿佘有冇搵你？）我同阿佘都唔會傾公事，只會傾閒偈。我本身係一隻牛，我嘅工作係努力拍戲，唔識追求名利。」
價高者得
淡泊名利
百萬包甘草
阿佘除窺伺無綫的小生花旦外，連甘草亦不放過。據知，近日她委派Tina四出物色人選。最先一批是一眾曾與她合作《宮心計》的演員，當中包括關菊英、蔣志光和李國麟等人。而本刊收到消息，周日（25日）晚，Tina便相約郭峰，漏夜到西貢一酒吧，傾談合作事宜。席間，Tina代公司向郭峰開出「三萬一集大陸劇及包薪百萬兩年」作利誘，郭峰當晚表示「有興趣」，但要回家跟老婆商量。
記者事後致電郭峰，他亦承認考慮過檔：「Tina係有接觸過我，不過唔止佢，加加埋埋都有四間公司搵我傾，間間我都會考慮。依家好似啲餸攤曬喺度俾我揀，但我唔急嘅，咪慢慢等吓先囉。其實珍姐已經搵過我，但未有時間傾住，佢承諾會加50%人工。」
經理人雙重身份
不過，最吊詭的是，Tina一方面是阿佘經理人，但她同時亦隸屬王維基旗下城市電訊的經理人部門，而近日王維基跟華誼兄弟的子公司「天意」已傾掂數為合作夥伴。換句話說，與王維基有着千絲萬縷關係的阿佘，分分鐘掉轉槍頭，替無綫現時最大的敵人反攻娘家。對於與阿佘是否有合作關係，周三（28日），本刊致電王維基，他連說「對不起、對不起！」便收線。至於阿佘與她經理人Tina，本刊至截稿前仍未有回覆。
甘草吃香
「城電魔童」王維基高調吸納無綫一班台前幕後的電視精英，唔止花旦、小生成搶手貨，連帶一班實力派甘草也扯高身價。捱足咁多年，終於守得雲開。
五台混戰
明年三間免費電視台鬥餐死，積弱多時的亞視唔在講，就連獨大多年的無綫亦有排震。五台大混戰，首先出擊的城市電訊，除本身水頭充足，加上有內地龍頭娛樂公司華誼兄弟的子公司「天意」幫手，未開戰已搶頭威。
無綫 個個都留
本着六嬸「個個都要留」旨意，無綫一改以往縮皮政策，人工奀、時間長，將會成為過去式。近日樂易玲已四出相約合約或部頭約的藝員，傾加薪及續約事宜，每位員工平均加薪百分之三十至四十。除小生花旦外，就連甘草亦一視同仁。
城市電訊 寧濫莫缺
王維基努力挖角，為明年電視台作好準備，有傳王透過曾拍《怒火街頭》的前無綫監製唐基明，穿針引線下，成功撬走無綫50名編導，唐更落實出年為王維基開劇。王維基不單向幕後埋手，早已相約了不少藝員會面，有傳廖碧兒已與王會面，而楊怡及林保怡更是王頭號挖角對象。
Now TV 主打綜藝
無綫前高層，現任now TV製作部總經理何麗全，早前遊說梁榮忠和王賢誌加盟，就連剛與無綫約滿的王喜，亦將加盟now主持節目。now現時主打綜藝及音樂節目，拍劇反而次要。
有線 玩偏門
來年有線電視亦是其中一間免費電視台，不過有線未有大灑金錢向無綫藝員挖角，只會加重娛樂新聞、風水玄學及《怪談》等收視有保證的節目，以不變應萬變。
亞視 多外購劇
向來收視一般的亞視，近年投資拍劇愈來愈少，水頭充足的董事王征，寧願買外購劇來播也不投放資金來拍劇。不過近期亞視拍攝嘅綜藝節目《香港有飯開》，收視理想，算是近年佳作！ ####
有着數梗益自己友！（設計對白）
在挖角潮之前，阿佘已離巢加盟內地娛樂公司龍頭華誼兄弟，但其實近日華誼與王維基緊密合作。有指阿佘為鞏固勢力，撬走娘家人。
六嬸高調下令加薪給旗下藝人，大派定心丸。周三（28日），她陪六叔出席「邵逸夫獎」頒獎禮。對於無綫遭對手空前挖角，只說了句「Thank you!」便離開。
近日，城市電訊主席王維基大舉向無綫台前幕後進行挖角，其挖角短訊更瘋傳，無限轉發，保證人人都收到。
王維基
人人有份，永不落空。（設計對白）《蘋果日報》圖片
阿佘經理人Tina（左）由阿佘未紅時已開始追隨，早前相繼離巢。二人現時兵分兩路，一起撬娘家藝人，合作無間。
call過我！（真實對白）
雖然楊怡力撐娘家好，但亦不諱言「會向錢看」。對於有否收阿佘電話？楊怡冇正面回應，但就坦言：「係有人call過我！」
前年阿佘與楊怡合作《宮心計》後成為好友，有好嘢梗係益好姊妹。
有聽聞！（真實對白）
陳豪與阿佘多次合作後成為老死，雖然陳強調與阿佘只講閒偈，但對於楊怡獲阿佘挖角一事，他表示「有聽聞過件事。」而對於挖角一事，陳豪表明唔會追求名利。
係傾過！（真實對白）
郭峰是無綫較多演出機會的綠葉。他透露現時有四間公司正洽談他過檔，而他更承認阿佘經理人Tina曾搵他傾合作。《蘋果日報》圖片
誓死效忠 樂小姐唔走我唔走！（真實對白）
身為無綫契仔的林峯，強調自己會誓死效忠無綫。「我覺得TVB對我哋好好，樂小姐亦好幫我哋，總之只要有樂小姐一日，我都唔會離開。」
留低 唔會忘本。（真實對白）
對於王維基挖角，徐子珊表明不會考慮。「我有收過SMS，但公司俾咗好多機會我，我唔會忘本。」
留低 最好個個加人工。（真實對白）
鍾嘉欣坦言與無綫還有漫長合約，所以不會考慮過檔，但就希望人人有人工加。
吊高嚟賣 冇人搵我。（真實對白）
近年，馬浚偉覺得被公司忽視，已多番萌去意，日前六嬸點名挽留他，但馬仔卻表示：「冇人搵過我，不過依家拍劇好忙，連陳志雲同珍姐（曾勵珍）搵我，都唔得閒傾。」
未諗 許紹雄 嘆慢板
「我同TVB份約仲有一段時間，唔止王生一間接觸過我，仲有幾間，不過家陣响上海拍緊戲，所以未得閒覆住，返嚟先算。」
未諗 羅樂林 搶手唔憂
「有幾間好早已經接觸過我，不過怕出面環境唔穩定，同TVB仲有年半先到期，到時先考慮。」
留低 薛家燕 想賺人仔
「同TVB出年先完約。有收到王生嘅SMS，樂小姐一早搵我傾，我同佢講我一年先幫公司拍一套劇，但之前有大陸劇搵我，但公司嗰時未開劇都唔批。樂小姐承諾會向公司反映。」
留低 韓馬利 太快續約
「有收到王生嘅SMS，不過我啱啱先同無綫續咗兩年約，所以其他人加幾多人工都唔關我事，恨唔到咁多。呢度做咗咁多年，TVB俾到我歸屬感。」
長命約 夏雨 冇人搵我
「暫時冇人搵我，同TVB份約仲有排，其實電影、電視都應該要加吓薪，良性競爭係好事。」
未簽 林漪淇 珍姐留人
「王生係親自打俾我，不過我同TVB份約到出年，珍姐已經搵咗我傾但未簽，加薪都約有50 %，同TVB有感情，會優先考慮。」
早前李國麟炮轟無綫似難民營，事後樂小姐及珍姐即出面安撫並加薪續約，成功挽留。
留言列表
