明星靚相大分享☆

媽咪姐手帳

人前人後都chok爆嘅Laughing哥（謝天華），喺《潛行狙擊》入面着起套老西做Laughing sir，身形高高瘦瘦，睇到班師奶流曬口水，原來佢副fit爆身形其實得來不易。

早兩日，媽咪姐見到Laughing哥喺跑馬地寓所急步行出嚟，運動衫褲加跑鞋，手持皮手套，嘩，成副運動家格，斷估都唔係去wet，原來係去馬場跑圈。難得見到猛男跑步，媽咪姐梗係唔放過呢個機會，即刻坐埋一邊睇表演。一開跑，媽咪姐數住，Laughing哥跑咗4個圈，成8000米，對44歲中佬嚟講成績都算唔錯。不過4圈過後，Laughing哥就攬住欄杆，面青青踎喺度喘氣。起初媽咪姐都擔心佢會出事，好彩最後佢都識起身行返屋企。 ####

Laughing哥拎住手套跑步，最終都冇用到，真係令人費解。

係威係勢

44歲中佬連肚腩仔都冇，謝天華操得咁弗，當然係想Laughing哥長做長有啦！

攰死都chok

扶住欄杆不經意都擺到個chok甫士出嚟，謝天華同林峯有得fight喎！

踎低喘氣

跑完4圈踎低喘曬氣，Laughing哥即時失威。

媽咪姐勸Laughing哥一句，做運動要量力而為，如果唔係好易出事。