星B寫真
明星生B熱潮停不了，統計過去一年，有超過十位明星榮升星爸星媽，令原本充斥離婚、分手新聞的娛樂圈，變得一片喜氣洋洋。這班無添加明星小BB，今期齊齊登場，為大家展示趣致純真一面，之但係個個都屬節瓜手、米芝蓮重量級身形，要估係出自何家品牌，確實有難度，就等大家做吓B家偵探，估吓佢哋嘅星爸星媽喺邊個！（答案後頁揭曉）
A. 電眼Laughing哥 兩個半月
我一出世就有9.2磅重，講肉地，我冠絕成個娛樂圈呀，連初生嘅BB衫都全部唔啱着，講高度，好明顯係遺傳我媽咪優良嘅傳統啦。媽咪呢排為咗湊我，冇乜喺電視同大家見面，但私底下就教識我表情多多囉！
B. 金叵羅 七個月
你睇我眼仔睩睩鼻高高，就知我有個大美人媽咪啦，媽咪知我鍾意沖涼嗰陣玩泡泡，仲幫我搞咗個泡泡party㖭！
C. 節瓜男 三個月
我對上有兩個家姐仔，媽咪話生完我後，仲想生多兩個，等爺爺開心下，唔怪得媽咪一個月之內要食一百隻雞補身啦！
D. 港姐公主 兩個月
我個乳名叫多多，媽咪同爹哋想我多多健康同多多快樂嘛。媽咪係港姐冠軍嚟㗎，我瞓都瞓得咁有儀態，就知平時訓練有素啦！
E. 紅蘋果 六個月
我成日喺電視見到爸爸㗎，隔一陣就會有佢嘅電視劇播出嘅，早排做完律師，近排又轉咗做拳王，班auntie好鍾意佢㗎，仲話爸爸係新一代師奶殺手㖭！
F. 瞇眼chok神 三個月
我媽咪細個係童星嚟㗎，Daddy就係舞台劇搞手，話曬係演藝世家，我自細已經識自動波轉樣，仲會發埋啲怪聲引媽咪注意㖭！
張智霖MV 大曬明星kids
初為人父人母嘅喜悅當然難忘，但由BB到小朋友、小朋友到學生哥，每一個成長階段，對父母來說，都是有血有汗彌足珍貴的。近日張智霖新歌〈反鬥奇兵〉，描述父子情，MV入面仲有唔少星爸大曬同仔女嘅溫馨照㖭！（想睇呢個MV，就上Youtube搜尋啦！）
張智霖 爛玩爸爸
張智霖同老婆靚靚的乖仔魔童，今年四歲，遺傳了父母的靚靚五官，貪玩性格同老竇十足十，搞到一向做嚴母嘅靚靚都要同人呻：「我喺屋企局住做魔鬼，老竇就做天使，個仔依家淨係黐曬老竇咋！」
郭晉安 慈父教練
同老婆歐倩兒生咗個「好」字嘅郭晉安，原來經常帶仔仔令山去泳池遊水，仲兼職做埋仔仔嘅遊水教練。見佢攬到個仔實一實，就知佢有幾緊張乖仔。
譚耀文 餅印父子
近排經常在大陸搵食嘅譚耀文，一返香港就會全職做湊仔公，陪五歲餅印仔仔皓哲到港、九、新界參與各類型課外活動。
陳錦鴻 光豬父子
煮飯湊仔樣樣掂的陳錦鴻，每朝都會為四歲仔仔駕樺煮定愛心早餐，近排愛上同仔仔玩泡泡浴，增進父子情。
張晉女扮葉問
張晉同蔡少芬寶貝囡囡楚兒，得七個月大人仔，竟然夠膽同爸爸切磋功夫，一招天殘腳，更將老竇KO㖭！「嗰日天氣熱，我哋留喺屋企冇出街，爸爸同Zoe攤喺地上唞涼，突然見到Zoe握緊拳頭仔，做咗個『請請』手勢，爸爸即時向佢回禮，佢哋之後玩埋摔角，Zoe仲識得望鏡頭交戲，真係俾佢笑死。BB大得太快啦，如果平時唔影多啲相，將來點拎出嚟回憶呀！」
陳倩揚B仔人細鬼大
「佢得三個月大，但見到個大佢少少嘅姐姐，眼仔睩睩，望住人哋傻笑，平時我最鍾意用電話，影佢瞇起隻眼笑嘅樣，即使佢唔喺身邊，見到張相都甜曬。」
姚嘉妮女做攝影師
「Kyra今年兩歲，我買咗部即影即有相機俾佢，依家喺屋企佢當正自己係攝影師，仲叫我同爸爸擺甫士俾佢影。」
名模趙嘉懿仔甫士王
「最近有個廣告搵我同囝囝一齊拍，可能平時影慣相，依家先歲半，但佢一望鏡頭就自動插褲袋擺甫士！」
胡諾言女大笑姑婆
「個女出世之後，我買咗部單鏡反光機，仲去咗上堂學基本攝影技巧，個女由細到大俾我哋影慣，所以一見我拎相機出嚟，就會起嘴仔笑。」
答案：
A. 姚瑩瑩
B. 李嘉欣
C. 徐子淇
D. 曹敏莉
E. 黃浩然
F. 唐寧 ####
留言列表
