重返樂壇出Hi-Fi碟　黎瑞恩三不做拒宣傳忽然1周 844期 @ 明星靚相大分享☆

娛一叮

昔日「寶麗金三小花」之一的黎瑞恩，01年跟金利來太子爺曾智明結婚退出娛樂圈，育有一對子女。有傳老爺曾憲梓不想媳婦拋頭露面，故小恩子（黎瑞恩暱稱）不但安心在家相夫教子，剛入門時更刻意與歌手好友疏遠。

其實，離開樂壇十年的小恩子，歌癮未減，近日眼見昔日同屬寶麗金（環球唱片公司）的王馨平出Hi-Fi碟，翻唱國語老歌反應不俗，即蠢蠢欲動出碟止歌癮。不過夫家向來低調，所以復出前，小恩子已一早向唱片公司環球列明「三不做」拒宣傳的條件，避免辣㷫夫家。

黎瑞恩婚後鮮有露面，專心做湊仔婆，全天候貼身照顧一對仔女（八歲的女兒凱栭及七歲兒子浩儒），閒時陪老公打golf 度日。雖然闊太生活愜意，不過小恩子歌癮不減，幾年前在一個名人場合重遇昔日寶麗金另一小花王馨平，兩位退休的闊太旋即混熟，閒時更相約唱K頂癮。

雖然退出樂壇，但小恩子其實與寶麗金的舊同事及高層一直有聯絡，最近老友王馨平復出出碟，也由小恩子一手促成。據知在一次K局中，小恩子約了K友王馨平外，還請來環球舊同事、唱片公司高層黃劍濤（Duncan）。

極少量宣傳

知情者話︰「當晚小恩子幫王馨平line up，咁就成事，Duncan亦打蛇隨棍上，力勸小恩子重出江湖。小恩子怕出碟要做大量宣傳，會被老公詐型，於是佢向對方列明『三不做』條件。即唔做雜誌宣傳，唔會做簽名會，亦唔會上《勁歌金曲》，而錄音時間亦要就曬佢，唔可以影響佢日常湊仔嘅日程。」

小恩子條件辣，更講到明絕不讓步。唱片公司人員透露：「本來公司話點都要有一次簽名會，但小恩子諗都唔諗就拒絕，更話極其量只係做一次發布會及少量相熟記者訪問。而且為就佢湊仔，每日只能騰出四個鐘錄音，但唱片公司計過條數都有着數，所以全部妥協。」

據知小恩子的唱片，明年1月才開始錄音，大約4月推出。為了保證優質，小恩子指定要金牌監製杜自持負責，而十首歌曲還在商議中，但〈一人有一個夢想〉及〈發誓〉等經典歌當然包括在內。

志在過歌癮

據知小恩子今次出碟，志在一過歌癮，賺錢是其次，但唱片公司對她復出卻寄予厚望。發燒碟製作成本較高，平均批發價較普通碟每隻貴５蚊右左，但零售價可提高20至30元以上，利潤可觀，所以差極都唔使蝕，歌手嘅分紅亦比普通大碟多10%。而且小恩子婚後極為低調，今次出碟本身已有一定noise及新聞價值，加上又有一批耳熟能詳的經典歌，銷量定有保證。

就小恩子明年出Hi-Fi碟一事求證Duncan，他表示︰「我冇回應。（咁即係有興趣？）有實力嘅歌手一定有興趣。佢（黎瑞恩）咁多金曲，出碟一定有巿場。但唔係你想合作人哋就一定應承，人哋都有自己家庭。（小恩子好難度期宣傳？）每個歌手合作形式都唔同。」說罷即表示要趕住開會匆匆收線。

發燒碟有市場

香港的唱片業銷量整體下降，但靚聲發燒碟銷量卻在淡市中殺出一條血路。流行歌手出發燒碟，除本身fans捧場，還可吸納一些愛好玩音響發燒友。而發燒碟的顧客，聽歌講究音質、肯消費，不屑下載歌曲，堅持買正版碟，因此不少歌手翻唱舊歌一樣有市場。

趙學而（1萬）

08年趙學而為圓夢想，自資六位數字出靚聲廣東碟《聽》，翻唱別人歌曲，隨即斷市加印，不但封了蝕本門，更有錢賺。不足一年，即推出翻唱國語歌發燒碟《聽聽》，奠定她發燒天後地位。本月推出第三張發燒碟《Trinity》，全碟在日本混音。

記者到尖沙嘴的唱片舖視察，發現趙學而的Hi-Fi碟（左）賣到220元一張，比一般的唱片貴出一倍有多，而店員亦表示︰「呢啲Hi-Fi碟好好賣，多數係熟客幫襯，近期最好賣就係趙學而呢隻。」

張學友（20萬）

學友一直是賣碟神話，高峰期的大碟《真情流露》賣過8白金。去年一月，學友推出首張爵士發燒碟《Private Corner》，於亞洲銷量高達20萬張，是近年罕見的廣東碟銷量。

李克勤（9萬）

克勤是環球最賺錢的歌手，唔少歌手只賣數千，但他平均銷量達三萬以上。05年尾推出的《演奏廳》，環球投資過百萬，將錄音室移師到音樂廳，一氣呵成現場灌錄全碟全新歌曲，一星期內兩度斷市，全年總銷量近9萬。翌年遠赴韓國錄製《演奏廳II》，兩碟成為06年度IFPI「十大銷量廣東唱片大碟」。

林子祥（3萬）

去年11月推出《Lamusique》發燒碟，翻唱舊歌，一出銷量即達3萬。半年後再添食推出《Lamusique vintage》，同樣翻唱自己舊歌，一樣賣個滿堂紅。 ####

急上車避記者

9月14日下午三時許，小恩子親自到沙田國際學校接仔女放學，可能因怕仔女上鏡，當她發現記者即匆匆拖住女兒急步上車。

當日黎瑞恩以Audi房車接仔女返家，記者跑上前想訪問幾句，但她已快手快腳拖仔女上車絕塵而去。