Diablo III 必先利其器　D3 打機配件大檢閱－明星靚相大分享☆

《Diablo III》全城狂熱，facebook人人洗版，勇士們日操夜操唔少已開始挑戰煉獄難度，game入面嘅裝備當然要升呢，最近亦愈來愈多同好四出尋找開戰新裝備，A君話要買打機耳筒跟戰友保持通話、B女話要買個gaming mouse捽得更爽手，今期推介gaming配件輔助大家屠魔打寶，新手老手都啱睇。

Part 1　耳聽八方　Gaming Headset
黑夜特效王　Philips SHG8200
《D3》聲效一流，出招下下嘭嘭聲，深夜練功唔想嘈到人；加上遊戲講求團體合作，但就冇內置語音對話功能，唔少玩家都鍾意開住Skype同戰友邊吹邊玩，冇一對靚聲打機headset，點做午夜屠夫呀？
Philips SHG8200用上SRS立體聲音還原系統，開咗之後音質明顯升呢，尤其係較低頻嘅特效聲特別出色，譬如話閃電轟擊聲音或者迷宮中偶爾傳出嘅風聲，都好似喺耳邊聽到咁。立體聲層次稍弱，但勝在特效出色令冒險氣氛高漲，加上經濟價錢，推介度最高。
單元：40mm
反應頻率：20-22,000Hz
阻抗：28 Ohm
靈敏度：100dB
平台：PC/Mac
售價：$699
查詢：永利 2407 1118
靚聲度：★★★★
臨場感：★★★★★
舒適度：★★★★
經濟度：★★★★

萬用靚聲　Steelseries Siberia V2
Gaming配件名廠Steelseries呢款Siberia V2，以音質嚟講，在多款測試機中層次最分明，打到嘭嘭聲都冇爆冇拆，出招同特效冇咁轟炸，適合長期作戰。缺點係價錢貴，如果你有其他遊戲機，V2對應多平台都抵玩。單元：50mm 反應頻率：18-28,000Hz 阻抗：32 Ohm 靈敏度：112dB 平台：PC/Mac/PS3/XB360 售價：$980 查詢：電氣良品 2359 7998 靚聲度：★★★★★ 臨場感：★★★ 舒適度：★★★★★ 經濟度：★★★

無線之選　Sony Wireless Stereo Headset
Sony出品，單係無線設計同埋靚仔外形已經引死人。加上超筍價錢，對於入門級用家嚟講確係好選擇。用喺PS3上有7.1數碼立體聲效，但用於PC上就冇喇，但出嚟音效一樣令人滿意，冇V2咁靚聲，但低音澎湃，特效震撼，意外地抵玩。單元：40mm 反應頻率：20-22,000Hz 阻抗：30 Ohm 靈敏度：100dB 平台：PC/Mac/PS3 售價：$579 查詢：電氣良品 2359 7998 靚聲度：★★★★ 臨場感：★★★★ 舒適度：★★★★ 經濟度：★★★★★

數位版冇炒即買
《D3》全城斷貨，早排《FACE》叫大家唔好團購，結果5千個買家得200個拎到game，真係喊都無謂。心急想玩，可考慮上網買數位下載版，美國帳戶可用美國信用咭直接購買，香港玩家較可行嘅方法係購買戰網咭，再上Battle.net入點購買。7仔、O記便利店啲戰網咭早俾人掃晒，但係去電腦game鋪或者V字頭便利店仲有機會買到，要今晚即玩都仲有辦法。

戰網咭買數位版流程

Part 2　殺神利器　Mouse & Keyboard
《Diablo III》遊戲操作簡單，1-4號掣加mouse左右click出招，最多㩒埋Shift掣企定加Q掣食藥水。不過玩到後期難度，技能配搭超緊要，出錯一招都即死，想精益求精，配合一套gaming mouse同keyboard可幫你連招更得心應手。

防滑手感　A4Tech G800V
好多FPS遊戲都係用A、S、D、W四鍵移動，所以G800V特別喺呢四個掣上用上防滑塑膠質料，打《D3》將技能設定喺呢四個掣就包冇認錯掣。另外亦有多達15個程式掣，用佢附送嘅軟件就可自行打造專屬連續技。$169（升科/3188 4983）舒適度：★★★★ 經濟度：★★★★★

單手鍵盤　Logitech G13 Gameboard
呢款G13採用符合手掌同手指形狀嘅貼服設計，長時間打機都冇咁攰，手指公位仲有個迷你搖桿，上下左右都可以當掣出招，點set都得，任何怪物都難逃你五指山。$699（Logitech）舒適度：★★★★★ 經濟度：★★★

無線之選　Logitech Wireless Mouse G700
高靈敏度的無線gaming mouse售價通常高昂，Logitech G700頂級滑鼠，有5700DPI靈敏度，加上13個自訂按掣。弱點係人體工學不對稱造型只為右手用家而設，對左手拎「劍」嘅朋友形成障礙。$699（Logitech）舒適度：★★★★★ 經濟度：★★★

快慢自如　A4Tech F4 V-Tracking Mouse
《D3》移動靠mouse，高難度下任何職業都要識避招，靈敏嘅mouse可以造就飄逸走位。呢隻F4 V-Tracking Mouse能夠自由調整4段靈敏度，總有一款啱你手形。加上手指公位兩個自訂掣，出招更便利。$189（升科）舒適度：★★★ 經濟度：★★★★★

美女秘法師Ayu親授操作心得
「我鍾意用遠程職業，平時會按住Shift掣企定攻擊，預防click錯位亂走。不過手指尾按住Shift食指按1,2,3,4出招幾易摸錯掣，都試過按錯Q掣食錯藥水搞到好危險。我建議攻擊招改做A、S、D、W近Shift一啲，食藥就改做space減少出錯。Mouse就最好用無線同細隻啲，啱番我手形。」

環球暗黑趣聞
性玩具公司　慰藉《Diablo》餘侶睇完硬件，又睇吓軟性趣事，法國性玩具公司Absoloo福至心靈，居然諗到送性玩具嚟慰藉呢排被《D3》騎劫另一半嘅餘侶。只要喺Absoloo facebook專頁上傳手持《D3》包裝嘅相片即可參加。仲要係唔分男女，但只准法國人參加，咁又係，《D3》銷量已過600萬，全球咁送就不得了喇。上http：//http://www.facebook.com/Absoloo就能睇到法國人用《D3》換性玩具盛況，睇真啲有唔少男人想玩玩具喎。

韓星男神也瘋《Diablo》娛樂圈也愛趕潮流，香港藝人有期興信主，韓國男藝人近期就潮跟《Diablo》，「SHINee」的鐘鉉、「FTISLAND」的崔鍾訓都紛紛表示要閉關打《D3》，「CNBLUE」成隊人仲話因為《D3》歸隊無期添，所以話，愛打機唔一定係毒男嘅。 ####

紅黑外形夠醒目，戴起上嚟頗為舒適，頭帶有彈性設計，但略嫌有點箍頭，骷髏骨都話戴1個鐘要除落嚟唞唞。