明星靚相大分享☆

近年球壇講到好波，你會即刻諗起美斯；但講到吸金能力，你就會諗起碧咸、全球最高身價嘅 C朗。邊個估到美斯原來喺呢方面都封王，更難估嘅係，佢喺廣告上搵到嘅錢，比喺足球場上賺取嘅薪酬同獎金仲要多。

場外搵錢叻過場內

雜誌《法國足球》日前公佈 09年全球最賺錢球員龍虎榜，美斯竟然以半爆冷姿態，以年收入 2,970萬鎊（約 3.4億港元）成為球壇吸金王。睇番美斯嘅收入分佈，以佢嘅級數兼上季幫巴塞橫掃歐洲，基本薪金加獎金合共有 1,250萬鎊唔出奇；奇就奇在，佢其餘逾 1,700萬鎊嘅收益，竟然全部嚟自商業贊助，真係令人大跌眼鏡。不過講番轉頭，雖然美斯身高唔夠 1米 70、樣又唔係生得靚仔兼出場例牌唔 gel頭；但憑佢嘅神級腳法，加上包辦歐洲足球先生同世界足球先生大獎，證明冇樣有料一樣魅力四射。咪以為美斯來來去去都係得 adidas、 Konami（ Winning Eleven間公司）同百事可樂，其實美斯仲有大把廣告喺手，又內衣褲、又航空公司、又鬚刨，加加埋埋十幾個，真係數都數唔晒，只係呢啲品牌港人唔多熟啫。至於對上兩年嘅吸金王碧咸，就以年收 2,730萬鎊排第 2； C朗雖然係全球周薪最高足球員（除稅後周薪 20萬鎊），但其餘收益唔夠碧咸多，僅以 2,700萬鎊屈居第 3。美斯近年 hit爆，入球停不了，個個都讚到佢天上有地下冇，但巴西球王比利偏偏唱反調，話美斯一離開巴塞就踢唔到咁高水準，所以佢今夏代表阿根廷踢世盃，都唔會有好成績。計我求大俠話，比利都唔知係咪唔抵得死敵馬勒當拿有個咁好球員，先突登講反話。不過美斯聽到應該開心，因為比利出名「烏鴉口」，佢話你得，你就唔得；佢話你唔得，你反而得。

美斯廣告成籮

放大圖片

足球

放大圖片

內衣褲

放大圖片

遊戲

放大圖片

汽水