Mercedes-Benz近排頻頻為旗下不同級別推出低容積引擎嘅新型號，今次輪到久未出新款嘅 B Class。全新 1.7公升引擎嘅 B 180，靚仔依然、大尾廂依舊、冠絕同級嘅配備又一件不漏，加埋 Benz牌頭嘅號召力， 25萬新門檻，衝破埋心理關口，真係好大誘惑。記者：許維雅攝影：伍慶泉Model： CC
其他副刊影片 門檻拉低 6萬 放大圖片 
■ B仔操控輕巧靈活，馬力減低亦無損行車時嘅活潑表現。
自從 Mercedes-Benz推出 A Class及 B Class後，做 Benz車主再唔係遙不可及嘅事。以細容積引擎、較經濟價錢搶攻車仔市場，實在令唔少人棄日從歐，揸 Benz嘅人又多唔少。雖然 A仔同 B仔都屬新手入門至愛嘅車仔類型，不過我會較喜歡多了一個車尾較長嘅 B Class，除了車身外形感覺更大體，高達 2,245公升嘅尾廂容量又夠晒實用，加埋地台又夠平坦，帶小狗出遊都好方便。只可惜車價「三字頭」始終係心理關口，好多人寧願唔要尾，揀二十萬出頭嘅 A仔。不過，今日開始可以重新計數啦！因為全新 1.7公升引擎嘅新成員 B 180，容積比之前嘅 B 200細 336cc，但車價就成功打破「三字」關口，降至二十五萬幾，門檻大大拉低 6萬蚊，誘惑度再升級！跟最基本嘅 A 160相比，變成二十二萬同二十五萬嘅分別時，呢 3萬蚊應該大把人會畀。
放大圖片 
■車身懸掛比一般車仔高，睇位更容易。
放大圖片 
■摺埋後座，尾廂容量可達 2,245公升。
高科技配備同級之冠
容積縮水嘅 B 180可以輸出 116匹馬力，比 B 200少 20匹，但拍攝時沿淺水灣道上斜落斜，坐了三人嘅 B 180仍表現出力量充沛，有埋 AUTOTRONIC無段變速波箱，可自然流暢地轉波，表現令人滿意。要暢順自如咁喺淺水灣道穿梭，輕巧嘅車身、靈活嘅操控都應記一功，即使新手入赤柱都唔會腳軟。雖然車價降至二十幾萬，但外形、配備一啲都無降格，跟 08年出嘅 B仔 Facelift版大致一樣，內櫳有真皮及大量電鍍邊點綴，多功能軚環、免提藍芽電話、 17吋合金輪圈、自動調光倒後鏡、定速巡航系統等高級配備應有盡有，就連 B Class嘅響朵作 PARKTRONIC自動泊車輔助系統亦一概保留，裝備如此豪華，又對新手咁貼心，同級車款而言，大家試數數有邊架做得到？
放大圖片 
■二十多萬車仔嘅中控台亦有大量銀色電鍍邊點綴，保持一貫 Benz愛豪嘅作風。
放大圖片 
■真皮混帆布後座簡潔舒適。
規格 放大圖片 
引擎： 1,699cc，直四馬力： 116ps/5,500rpm扭力： 155Nm/3,500-4,000rpm傳動： AUTOTRONIC無段變速，前驅售價：$255,000查詢： 2895 7339（仁孚行）
尖沙嘴晒冷 放大圖片 
■頭燈霧燈都加上大量搶眼電鍍飾邊，加埋型仔側鏡指揮燈，同級最強。
想親身接觸呢部 B 180車仔，感受一下佢有幾討人歡心，今個周末帶埋屋企人去尖沙嘴海運就可以慢慢玩，同場展出車款仲包括 E300 Estate、首次展出的 ML300及環保新貴 CGI BlueEFFICIENCY系列，即場選購其中的 C200 CGI B.E. Saloon，更可以特惠價$398,000出車（原價$411,500）。日期： 3月 27日至 28日（星期六及日）時間： 10am-7pm地點：尖沙嘴海運大廈展覽大堂 
■全新 B Class型號 B 180馬力細咗，不過外形不變，二十多萬元車價可以招攬更多哥哥妹妹入場。
留言列表
