"著住軍裝出席范范生日 party，小 S同老公許雅鈞全程十指緊扣反駁家暴婚變醜聞。由於事件令名譽受損，兩公婆已經委託律師，要求有關報館賠償 1億台幣，約 2,500萬港元。"
國台扮
傳遭老公虐打 小 S婚變大龍鳳
2010年03月25日
上個禮拜日（ 3月 14日），小 S同老公許雅鈞（ Mike）升呢登上港聞版頭條，當然同貪污無關，而係有傳兩夫婦月前在家初則口角，繼而動武，小 S不忿做人肉沙包被打，於是打電話去「全國婦幼保護專線」求助，有關社工仲將小 S列為高風險家庭，並知會警方協助調查事件。
報警求助
講到似層層，人人都以為許雅鈞「贏咗場交、輸咗個家」，點知新聞見街同一日，小 S同老公拖手攬腰去警署接受傳媒訪問，否認家暴醜聞。
「我們兩個已經彼此相愛跟珍惜到覺得此生在一起已經不夠了，絕對不會浪費多餘的時間去傷害對方。」小 S再次強調，成世人都未遇過好似佢老公咁溫柔嘅男人：「他（許雅鈞）絕對沒有對我動粗，抱我都來不及了，怎可能傷害我？」
家暴事件曝光同一日，小 S同老公馬上去到屋企就近警署澄清事件，而該警署負責人（右一）更強調從未收過許家任何家暴求助。
即將拉埋天窗嘅范范同「黑人」陳建州，唔相信許雅鈞會出手打老婆，范范仲講笑話小 S出手打老公機會高啲。
無仔生
否認還否認，奇就奇在新聞見街後，大部分人都信以為真，認為「無風不起浪」。既然學陳總話齋，真的假不了，假的真不了，外間對今次婚變解講，全部歸咎小 S一人身上。
頭號罪狀指，小 S嫁入許家五年，連生兩胎都係女，未能為許家添番個「慈姑椗」簡直罪大惡極，奶奶開到聲投訴，令許雅鈞左右做人難。
除咗個肚唔生性，小 S曾經俾觀眾批評「人妻不像樣」，經常响節目《康熙來了》中，對靚仔嘉賓又摸又攬又擒，淫妻不能移。
已經無仔生，仲要見男人就攬，出身上等人嘅許家，對新抱仔放蕩行為一直有彈無讚，唔願意收斂嘅小 S，搞到老公許雅鈞聽埋唔少閒言閒語，恩愛關係亦逐漸轉淡。舊年年尾，許雅鈞仲俾人影到攬辣妹夜蒲相，自此，婚變傳聞愈傳愈像真。
生完兩胎都係女，小 S個肚唔生性，據聞奶奶無男孫抱，同新抱仔關係麻麻哋。
屋企相當有米嘅許雅鈞，家住台北十大豪宅之一「宏盛帝寶」，當年人人羨慕小 S釣到超級金龜，下半世無憂。
派對來賓仲有近日傳分手嘅張惠妹同何守正。當日阿妹以「爆乳」裝現身，刻意同范曉萱行孖咇，但據講响 party入面，阿妹同男友何守正依然咁 sweet，仲坐埋一二邊飲酒談心。
封嘴唔答
為咗身體力行證明美滿婚姻，上個禮拜許生許太手拖手現身范瑋琪（范范）生日派對。
配合大會制服主題，小 S同老公以軍裝亮相。在場記者再提起婚變事件，兩公婆全程笑而不答。
當事人封嘴，壽星女范范變成「代言人」，但佢嘅答案相當反高潮：「很荒謬，真要家暴也是小 S老公被她家暴吧！」咦！聽落幾有道理喎！
稍後要飛去北京演出《康熙盛典》嘅小 S，連日同拍檔蔡康永密密為《康熙來了》錄定存貨。
知道有記者在場，見慣風浪嘅小 S，再次拒絕接受訪問，仲同電視台反映「希望記者都離開攝影棚」。
唔想講多錯多，小 S只係响節目中攞家暴事件搞吓笑：「不要推擠到我！我現在身上不能有一點瘀傷，如果有傷就會被誤會。」噢！所以陳總响 ICAC剃鬚剃損面，都要戴口罩囉！
小 S多次响節目中攬擒摸啜挨一眾靚仔嘉賓，受害人包括近排人氣爆燈嘅趙又廷；就連王菲，小 S都唔放過，夾硬捉人嘴對嘴，男女通殺，難怪俾人話佢「人妻不像樣」。
舊年年尾，許雅鈞同成班麻甩佬加辣妹夜蒲，被路人拍下攬辣妹纖腰偷食相（右圖），當時小 S挺身力證老公只係禮貌扶一扶對方過馬路，仲話：「讀者報料比不上我和老公的愛和信任。」
近月不斷傳出婚變消息，咁啱，小 S响《康熙來了》節目上訪問劉家昌，聽對方講當年點樣苦追甄珍嘅陳年愛情故事，小 S忽然崩潰落淚，搞到拍檔蔡康永都忍唔住問：「你哭什麼？你婚姻怎麼了？」再次惹起婚變揣測。
留言列表
