我都驚出局呀！設計對白
英格蘭 2戰 2分︰成隊英格蘭踢到冇神冇氣，朗尼一個喺前面跑到隻狗咁都冇用，鬼咩，中場冇個 fit，邊有輸送啫！路透社圖片
世盃爆大冷
歐洲淪陷
2010年06月23日
世界盃踢咗十幾日，爆冷爆到七彩，就當法國出唔到線唔算爆，咁西班牙輸畀瑞士、開個 11.5倍客勝夠嚇死你啩？
狂牛走樣，原來首輪係威係勢嘅德國都唔掂，第一場對住澳洲完全唔留手狂炒 4球，以為中前場班 80後個個有速度有技術，點知對住塞爾維亞落後一球打少一個即時唔識踢，仲衰到十二碼都射唔入！英格蘭對住阿爾及利亞更加係零比零，歐洲列強攬住喪師南非。
互動片段
德國 2戰 3分︰傻仔高路斯（左）兩黃一紅早段出場都未算傷，最慘係普度斯基射失十二碼， 1分都冇得落袋！路透社圖片
踢完兩輪分組賽，竟然未有一支歐洲強隊有 6分，強如德國同西班牙都要輸畀塞爾維亞同瑞士，英格蘭俾阿爾及利亞守和兩戰得兩分，意大利對住魚腩新西蘭都係勉強迫和，法國更衰到 2場零入球得 1分咁大把，反而班南美兵就表現對辦，烏拉圭同墨西哥 1勝 1和，出線應該冇問題，阿根廷同巴西亦坐定粒六，唔似班歐洲富戶要愁出線。
話南非剋住歐洲絕對唔係吹水，唔計佢哋山長水遠去到非洲，南非唔少球場位於海拔千幾呎以上，雖然未至於有高山症，但對習慣喺平原比賽嘅歐洲球員，條氣始終唔多順。而溫差極大嘅天氣亦玩死班球員，最大問題班巨星個個踢到殘，對住啲好似爭佢錢咁嘅南美同非洲幫，講惡都輸晒啦！
希古恩定科蘭？
科蘭（烏拉圭）
科蘭勝在腳頭重，配合今屆個超快新波，分分鐘恰死龍門，難怪成為神射手次熱。法新社圖片
世盃開鑼前人人估荷蘭嘅尹佩斯好大機會做神射手，點知阿根廷嘅希古恩唔聲唔聲一場入 3球，家成為神射手大熱門，馬會賠率得番 2.9倍，而入 2球嘅巴西嘅法比安奴同烏拉圭前鋒科蘭就係次熱，即刻買都仲有 4.5同 10倍，係就係熱啲，冇計啦！
狂賀！法國係咁先
第二輪分組賽踢完，強隊如阿根廷同巴西要繼續留低冇問題，不過由「星座小王子」杜明尼治帶領的法國就可以訂定機票返歸。家陣法國踢兩場就得 1分，除非下場可以大炒南非 4球而墨西哥又咁唔好彩輸鑊甘畀烏拉圭，你以為有一線希望咩，上場法國對墨西哥踢到「劈」屎咁，對住主辦國南非肯定繼續冇運行，加埋杜明尼治嘅出色領導，不如開定香檳等睇法國出局。
呢鋪點拆？設計對白
法國 2戰 1分︰杜明尼治死都唔肯換亨利出去搏殺，唔怪得連施丹之前都鬧爆佢唔配做領隊！美聯社圖片
踢埋呢場我都唔教，話之你啦！設計對白
由上屆世盃開始執教法國嘅杜明尼治出名騎呢，用人唔係睇狀態而係睇星座夾唔夾，如果第三場對南非入唔到波，法國就會繼 08年歐洲國家盃後再次零入球！路透社圖片
保持 0入球︰安歷卡俾杜明尼治逐出國家隊，全隊又罷操，隊波散過蛋散，下場對主場南非，贏到咩？美聯社圖片
世界盃專用波測試 港版亨利：個波只適合勁射
今屆個官方足球 Jabulani，中文譯做「普天同慶」，不過好多龍門仲㷫，因為個波太飄令佢哋隨時甩手出醜，最經典梗係英格蘭龍門格連嗰下！「港版亨利」鄭少偉試踢呢個害人不淺嘅足球，佢都話個波：「感覺比普通足球輕咗 4分 1，呢個波用少少力已經好快，適合勁射啱晒科蘭呢類重炮，但要射香蕉罰球就好難，因為真係好飄！」有外國傳媒踢爆德國聯賽上年已經踢呢個波好着數，其實法國嘅聯賽一樣有得率先用，輸波，塊地梗係硬 o架啦！
「亨利」勁射中楣後，個波彈到上 9樓咁高。
格連世紀甩手俾人笑到面黃，所以英格蘭三個門將練波時狂練接波，下場咪再甩喇！美聯社圖片
送世界盃官方足球 Jabulani
Jabulani
重量： 440克
特點：由 8塊 3D面板嵌製，令表面更圓，大大減低風阻，號稱「史上最圓足球」。
只要答中問題，再填上姓名及聯絡電話，聯同書內印花寄回將軍澳郵政信箱 65207號《 FACE》編輯部，即有機會贏到今屆世盃官方足球 Jabulani，公價$799。
問題：英格蘭門將格連對哪隊國家隊時甩手？
A.巴西
B.阿根廷
C.美國
留言列表
