漫遊毒物
3D裸視 任天堂 3DS驚爆 E3
2010年06月23日
立體大晒！一年一度美國 game壇盛事 E3遊戲展上星期結束，照例由微軟、 Sony及任天堂三雄逐鹿中原。
第一日，微軟宣布即日推出薄版 360，繼而將最強體感操作系統 Project Natal正名為 Kinect，鐵定 11月 4日推出，令 Sony隨後公布的 PS Move體感控制器變成雞肋。
之但係好戲在任天堂，第二日展覽會上，主席岩田聰拎出史上首部 3D手提遊戲機— 3DS，將 NDS變立體，打機睇戲都係立體，仲唔使戴 3D眼鏡就睇到 3D，任天堂好嘢，又行前大家一大步！
3DS打機姿勢有影響
唔使戴 3D眼鏡就睇到立體效果，業界稱之為裸視 3D，上年 Fujifilm推出的立體 DC Finepix Real 3D W1的背芒及其專用立體相架都係裸視 3D先鋒。
從現場採訪記者的反應，個個都話 work兼 amazing，不過視角以及玩家同鏡頭嘅距離都會有影響。視角偏離正面 30度畫面會出現疊影，離屏幕愈遠立體感亦會愈強，可惜大家睇書都係睇唔到效果。而 3DS同 iPhone4一樣，內建加速感應器同陀螺儀，可作六軸體感操作，可見任天堂先前話 iPhone係最大敵人呢番說話唔係講笑。 3DS未有發售日同售價，外間預計喺明年 3月前推出。
3DS環節由任天堂日本 CEO岩田聰用日式英語作介紹， E3一類重要演講向來由開發部總監宮本茂發表，今次由岩田親自出馬，外間有傳言指岩田不滿風頭被宮本茂搶過自己，所以擔正。
今次任天堂搵咗好多美女一跟一畀人試玩 3DS，除咗有人看住，每部機都俾繩綁住，驚死人偷走。
上屏幕先至有 3D顯示，任天堂話 3D唔夾篤芒，所以同舊版一樣得下屏幕有輕觸式功能。右側有調整 3D立體顯示景深強弱嘅滑桿，覺得 3D唔啱睇可以熄咗佢變回 2D。
加入咗類似 PSP隻「蘑菇」式類比控桿，試玩過嘅人話好用過 PSP嗰隻，打《街霸》出波唔使用十字掣。
可以影 3D相
機背鏡頭由 1變 2， 2個鏡頭可模擬人眼拍攝 3D照片，不過像素依然低，得 640× 480（ 30萬像素）。
仲戴眼鏡？發表 3DS之前，任天堂先寸其他友廠搞非裸視 3D老土兼核突，好似加黑 bar做嫌疑犯咁肉酸。
廠商力撐 勁 game晒冷
3DS畫質方面比舊版 DS強得多，坊間大讚有 Wii或 iPad嘅質素，機能好可能比 PSP更好。好多廠商已經宣布會將家用機大作移植到 3DS上出 3D版，好似《 Metal Gear》同《 Bio Hazard》都會出 3DS遊戲。
暫時示範嘅 demo大多數都唔係可玩版，得畫面睇，睇吓有咩勁 game陣容先喇。
《任天狗/貓 3D》
少數可以立即在場內試玩嘅 3DS遊戲，隻狗仔咬起飛碟交畀主人的動作好似伸出屏幕交畀你咁震撼。只係玩法分別唔大，只有畫面係全新製作，同加入養貓玩法。
《 Kid Icarus Uprising》
任天堂力 sell大作，由《大亂鬥》班底製作，《 Kid Icarus》呢個系列對上一隻 game係 91年嘅 Gameboy遊戲。今次主角一樣有個有翼嘅男天使，暫時只有 trailer睇，估計係有飛行要素嘅動作遊戲。
《 Metal Gear Solid Snake Eater 3D》
即係 PS2舊作，《 MGS》第三集。 E3公布嘅版本唔可以玩，不過就重製咗開場嘅場景，可以自由轉鏡頭觀賞，好似睇緊《阿凡達》，個個睇完都力讚 3DS機能。
PSP壓力好大
電器良品店長 文哥
個個都話 3DS係 E3最大亮點，遊戲店老闆文哥都係咁話。「以香港嚟講， NDS個勢早就下滑，一來市場飽和，二來遊戲愈出愈無睇頭， PSP反而因為多勁作而愈戰愈勇。今次任天堂先出招明顯對症下藥， 3D係好玩，但係最正都係機能大躍進，本來怕畫面爛，唔敢喺 NDS出 game嘅大作都紛紛埋堆。暫時睇 3DS好完美， PSP遲啲出新機壓力會好大。」
留言列表
