Rainbow踩新八模粗製濫造

因寫真大戰而互辣火頭的o靚模組合Donut（冬甩）及新八模，罵戰持續升級！以胡心諾（Rainbow）為首的冬甩，狂數新八模寫真「六宗罪」，寸爆她們的寫真粗製濫造，似趕交功課，又大彈八女身材普通，認真唔畀面！

Ar Yu（左起）、Rainbow與Irene睇完死對頭新八模本寫真勁笑，Rainbow仲笑到掩住個嘴。

冬甩本月初推出《夏の日記》寫真集，強搶寫真頭啖湯而辣興新八模，兩派o靚模爆發罵戰，新八模出口術「祝賀」冬甩早登極樂，成員何佩瑜更指冬甩肥膩不健康；而八女的師姐周秀娜亦出言力撐，毫不留情反問甚麼是冬甩，火藥味亦愈來愈濃！

自讚真材實料

慘遭新八模狂踩的冬甩，則連珠發炮還以顏色！大師姐Rainbow聯同曾寶玲（Ar Yu）和許麗燕（Irene），欣賞新八模的寫真《8模美女館寫真集Vol.2》，惟她們力數對手寫真「六宗罪」，大彈慳皮兼單調！

Rainbow賣花讚花香，指冬甩的寫真比新八模抵睇，她說：「除咗本書平十元之外，我哋仲去到宿霧取景，有靚人靚景；反而新八模本寫真就好似『遠赴』澳門取景，啲景來來去去都係酒店房，好單調。」Rainbow又表示不認識新八模的Hidy（余曉彤），她揶揄：「封面個女仔係Hidy？我睇完呢本寫真先識佢。其實兩本寫真都好，但我哋本好啲囉。」

擁「大C Cup」身材的「翻版蔡依林」Ar Yu，亦不留情喪踩：「新八模本書有啲『私影』，即係龍友搵model求其影吓相，唔夠專業；同埋佢哋身材好鬼普通，我哋真係真材實料，睇吓Caroline（冬甩成員朱裕琳）就知啦。」

在寫真集與Rainbow玩斷背共浴的Irene亦寸爆：「佢哋本寫真好似趕住出咁，好似影咗唔夠一個月就出，啲相又普通，而且佢哋好似乜都係贊助，唔似我哋真係投資好多錢。」

Mia：多謝支持

對於冬甩的「指控」，新八模作出大反擊，成員陳靜儀（Mia）說：「多謝佢哋支持我哋本寫真，如果想知我哋係咪粗製濫造，買嚟睇吓就可以印證佢哋啱唔啱。」另一成員黃雪瑩（Suki）亦「回敬」：「多謝佢哋買我哋寫真，但係我冇買佢哋本寫真睇，唔識回應。」新八模的經理人Roy則說：「係呀，多數喺酒店影，所有飲食同住宿都有贊助商支持，我哋非常尊重客戶，而且酒店房好靚，所以主打酒店影相。」言語間似暗示冬甩沒有贊助商支持。

寫真6宗罪

今夏寫真戰況激烈，冬甩和新八模都率先推出寫真，不過冬甩成員大彈「死敵」寫真集，指出六大罪狀，火藥味濃。

Rainbow（中）與師妹Ar Yu（左）及Irene（右）大彈新八模本寫真慳皮兼單調。

罪狀一：取景單調

Rainbow表示新八模本寫真澳門的酒店和沙灘取景，景色單調。

罪狀二：欠知名度

Rainbow表示不認識新八模︰「Hidy（余曉彤）都係睇咗寫真先識佢。」

罪狀三：缺乏心思

Irene覺得新八模寫真製作倉促，相片普通，她說︰「我哋寫真靚景靚甫士，佢哋好似趕住出咁。」

罪狀四：似靠贊助

Irene指新八模本寫真好似咩都係sponsor，而冬甩本寫真就投資咗好多錢。

罪狀五：相片似「私影」

Ar Yu覺得新八模寫真似「私影」，她說︰「似龍友影，唔夠專業。」

罪狀六：身材普通

Ar Yu表示冬甩身材真材實料，她說︰「新八模身材就好普通。」

罵戰鬥出火

過往o靚模在寫真戰中各出奇招望突圍，戰況愈鬥愈激，火藥味濃，發生口舌之爭在所難免。

趙碩之

周秀娜、趙碩之

去年七月周秀娜推出噴血寫真，其中把牙膏和雪糕滴落心口，被趙碩之取笑及批評有教壞細路之嫌，周秀娜反擊「寫真唔係教科書」，只用來紀念。

周秀娜、冬甩

今年五月周秀娜接受本報訪問，對於有指由Rainbow率領的Donut在夏天出寫真狙擊她，她說︰「打贏新八模先講，猜皇帝都要排隊。」

新八模、冬甩

本月初，新八模被Donut搶頭啖湯推出寫真，眾成員並不睇好Donut的寫真，寸爆表示︰「祝佢哋早登寫真極樂！出海順利，千祈唔好沉船。」

取景論級數

今年寫真戰參賽o靚模都出盡法寶發力上位，當中她們的拍攝地點及製作成本亦各有等級。

周秀娜今年重錘出擊，到蒙地卡羅拍攝寫真。

Angelababy

地點：關島

日本人製作班底，費用約$600,000

周秀娜

地點：蒙地卡羅

名攝影師CK操刀，費用約$600,000

新八模

地點：澳門

五星級酒店取景，費用約$100,000

Anjaylia及Evelyn

地點：泰國

靚人靚衫，費用約$400,000

冬甩

地點：宿霧

揼本拍攝，費用約$300,000