忽然1周 742 期懷孕五月風騷晒命　郭可盈微波升兩cup @ 明星靚相大分享☆

34C
懷孕近 5個月的郭可盈穿上火紅 tube dress，雙峰呼之欲出，毋需烏低身已輕易露 3吋胸罅，身材與以前分別甚大。

今年 5月，林文龍和郭可盈捲入「桃色勒索案」中，先有一段疑似林文龍透露與內地演員董維嘉搞婚外情的聲帶外洩，繼而演變出郭可盈被內地經理人汪子琦滋擾和勒索，事件更驚動內地公安徹查。
當時，被指一再「偷食」的林文龍恍如被打落水狗，郭可盈惟有黑住口面拖實老公開記招，做場大龍鳳平息事件。而私底下為了挽救這段瀕臨崩潰?婚姻，兩人更加決心趕快生番個。
本周二（ 13日）晚，台慶劇《富貴門》全班人馬首度宣傳，懷孕近 5個月的郭可盈成全場焦點。穿上火紅短裙的她盡騷脹了兩 cup的胸，笑談懷 BB女心情，亦坦言老公好緊張自己，拍罷內地劇將會全面停工，專心陪她待產，風騷晒命。
本周二晚，《富貴門》強勁演員陣容晒冷宣傳，不過要數鋒頭至勁，則非懷孕近 5個月的郭可盈莫屬。 7時 45分，她乘坐七人車在最遲一刻才到場，隨即被記者圍住。薛家燕、呂良偉和 TVB高層梁家樹等人亦不時主動上前慰問一番。可盈每次上落樓梯，均有「左右護法」傍住，就連《富》劇監製莊偉建亦為她搬嘢，是晚可盈猶如女王出巡，即使影后袁靚靚及結婚不久的羅嘉良，鋒頭亦被比下去。

懷孕前 33A
未有餡的郭可盈，一向屬骨感美，身材平平無奇。

現青筋胸
現場所見，郭可盈胸部青筋暴現。為此關嘉美醫生指，可能是孕婦本身太瘦所致。

本周二（ 13日）晚 7時 45分，行頭十足的郭可盈是最後一位藝員到場，隨即引來記者採訪。她表示入場後才會換上高跟鞋，「因為我應承文龍平日要着平底鞋 o架，所以着對平底 boot嚟囉。」未入場可盈已率先晒恩愛。

LV絲巾約$5,000
Miu Miu手袋約$7,000
Chanel手鏈約$9,000

晚宴完畢，郭可盈由助手攙扶下落樓梯，之後乘七人車進入其父母的禮頓山寓所附近暫避，之後又在跑馬地兜圈，最後才返回大角咀豪宅「一號銀海」（右圖）。

Chanel頸鏈約$10,000
兩卡鑽戒約$10萬
Chanel 3吋高跟鞋約$5,600

郭可盈和林文龍自 06年尾用公司名義以 2千多萬購入「一號銀海」兩個相連單位後，金融海嘯爆發，一度慘變樓蟹。有傳兩公婆為供樓一事常有拗撬。至今年 9月，兩人見樓價回升隨即出售，帳面獲利 278萬，現時兩人暫租住另一單位。

避談老公風流帳

早前與林文龍一同捲入桃色勒索案而搞到貌合神離幾近婚變的郭可盈，這天明顯心情大靚，全程風騷晒命，更自言：「以前個人好急躁，要求又高，係個完美主義者，有咗 BB之後，成個人心態唔同、平和晒，每日瞓醒心情都好好，連老公都話我溫柔可愛咗！」
不過問到剛過去的桃色事件發展如何，她隨即伸手示意並打斷記者問題，收起笑容說：「法律過程係需要一段時間，但我依家唔想去諗啲唔開心嘅嘢，依家只係想諗啲開心嘢，以最愉快最輕鬆嘅心情去佗 BB！」明顯她對丈夫的風流帳，仍然耿耿於懷。

周二的晚宴上，大家明顯錫住郭可盈，影大合照時，只有她一人有櫈坐，更加由監製莊偉建為她擔櫈，認真夠面。

入產房拍片

《富貴門》乃郭可盈收山之作，她的演出亦搏到盡，除了有多場嚎哭和被掌摑場面之外，亦有一場趴街追車情節。

之後她亦食住個勢晒恩愛，大談老公如何體貼入微：「文龍就快拍完大陸劇，之後就會唔再接 job，專心陪我待產。佢又已經請咗個陪月，喺我生之前同坐月嗰陣陪住我。我預產期係 2月，決定咗會開刀同餵人奶，文龍仲話到時會入埋產房幫我拍 video呀！」可盈還表示，現時心情極之輕鬆，反而屋企人比她還緊張，自己亦打算稍後將專心湊女不再拍劇，「其實做埋下星期嘅台慶亮燈儀式，我就唔會做，專心安胎。《富貴門》去沙巴嘅宣傳我就唔到啦，怕麻煩到人，好似頭先影大合照，大家又擔張櫈俾我，特別照顧我，唔想帶俾人麻煩啦！拍劇始終太辛苦同困身，或者到時只係做啲好似廣告咁輕鬆嘅工作。（即係《富貴門》就係你最後一套劇？）都係 o架！」想不到以往對記者一副戰鬥格的郭可盈，會如此有問必答，笑容可掬。

奶當水飲

談到現時懷住 BB女的情況，郭可盈更加表現興奮，口若懸河：「早兩日照超聲波照得好清楚， BB輪廓好深 o架，個頭好圓，醫生話進展好好，無論 size、體重和胎兒都好正常，我佗得好舒服o架。」現場所見，以往微波兼瘦到凸胸骨的郭可盈，如今竟然升咗兩 cup， 3吋胸罅乍現，不過其手腳則依然十足火柴，為此她解釋：「其實依家我由朝食到晚，每日至少食 4、 5餐，食好多牛扒牛柳。以前我唔鍾意飲奶，但依家奶當水飲，至少飲 1公升鮮奶，但醫生話都係唔夠。我已經重咗 10磅，只不過係全部肥晒喺個胎度啫！」
一提起飲食習慣，可盈即連忙叫慘：「以往我好鍾意飲咖啡，但依家絕對唔可以掂，惟有文龍飲咖啡嗰陣，叫佢俾我聞吓囉，就算飲茶都係飲好淡好淡嘅鐵觀音。有時無端端會想食豬腸粉，諗起邊度最好食，幾遠都叫老公買俾我食 o架！依家文龍變咗我同 BB嘅專業攝影師，影住我個肚由扁到愈來愈大。」可盈無時無刻都將老公林文龍掛在口邊，狂晒幸福。

暫租單位安胎

《富》劇夜宴後，記者發現郭可盈乘坐七人車狂兜圈，欲撇甩記者，最後返回大角咀豪宅「一號銀海」寓所，至翌日仍未有外出。據資料顯示，兩人剛在今年 9月，成功把本來自住的兩個相連「一號銀海」單位售出，帳面獲利 278萬。日前亦已搬離該單位，不過為免可盈動胎氣，故在安胎期間不想勞師動眾搬家。一知情人士透露，「可盈佢哋因為放售得好急，所以未有時間去物色其他樓盤，依家雖然已經交吉嗰間屋俾新買家，但佢始終腹大便便，見『一號銀海』都住得幾舒服，咪暫時搵間已經裝修好嘅單位租住先囉。」據知現階段，郭可盈以月租約 5萬，暫時租住同一屋苑一個逾千呎單位，待樓價略為回落才出手置業。

桃色案始末

今年 5月郭可盈和林文龍面對「桃色勒索案」，事件爆出後隨即開記者會死撐。之後發展鋒迴路轉，二人到星馬散心大半個月後，一直不大情願生仔的郭可盈，先向周刊自爆在旅行期間成功造人，更表示該事件令夫婦感情更佳。

被指搭上林文龍的內地女星董維嘉樣子標致，年僅 25歲，事發後亦與林文龍畫清界線。

今年 5月 30日，郭可盈與林文龍舉行記者會交代「桃色勒索案」，但兩人貌合神離，關係大不如前。

郭可盈與汪子琦曾是「好姊妹」，想不到要訴諸法律。

5月 28日　本刊收到一張匿名光碟，內有疑似郭可盈、林文龍和內地經理人汪子琦的多段電話錄音，內容是男方向其經理人承認背妻偷嗒內地演員董維嘉。另一段電話內容則是疑似郭可盈聲音的女子，表示不能一下子原諒男方。
5月 30日　郭可盈、林文龍在所住的「一號銀海」 club house中舉行澄清記者會，雖然二人手拖手出現，但二人全無眼神交流。記者會內容全無提及電話錄音真偽，只表示事件涉及一宗刑事勒索，並已向香港警方和內地公安求助。聲稱其內地經理人汪子琦已被拘捕，並循法律途徑處理。林文龍首度回應之前曾跟郭可盈感情出現問題，但當中不涉及第三者，並表示現時感情穩定。
5月 31日　被指是第三者的內地新人董維嘉，在其個人網誌內發表「關於這幾天」一文，稱林文龍為林大哥，表示跟他相處就像一家人，一直視他為長輩和老師，拍劇後已甚少聯絡。
6月 4日　本刊再爆出匿名光碟內容，當中涉及疑似郭可盈聲音的女子，承認自己曾多番偷食，其中一位是已婚男歌手，並叮囑經理人不要告訴其丈夫。不過今次郭林兩公婆無再澄清。

公開安胎有營餐單

今年 39歲的郭可盈，懷孕前體重只得 98磅，屬於偏瘦型，現在懷孕 5個月的她，重了 10磅，坦言飲食要有營養而不油膩，令 BB增磅之餘，自己亦不致會太肥。她公開現時每日所遵行的「有營餐單」。
午餐：可盈表示慣常中午才起床，必飲一大碗營養湯水，如蟲草花膠燉烏雞、淮山杞子花膠燉螺頭、南瓜煲石崇魚湯，孕婦易吸收，皮膚亦較佳。
主餐：平日會吃吞拿魚治、腿蛋治（麥包同白麵包輪流食用）。每星期亦會去數次茶樓食點心，但高熱量煎炸的不吃，食點心會先拖滾水去油。
下午茶：高鈣低脂鮮奶、日本蛋（因含菌量較低）、四色水果士多啤梨、藍莓、橙（連渣食）及奇異果。
晚餐：少鹽少油是第一條件，主食以牛、魚類及蔬菜為主。

恩愛遊迪士尼
桃色事件雨過天青， 7月中兩人更被發現到香港迪士尼樂園遊玩。雖然可盈身形纖瘦兼着窄牛，但當時她已懷有個多月身孕。《壹週刊》圖片

玩咖啡杯時，每逢郭可盈上落，林文龍都扶實老婆。《壹週刊》圖片

醫生指可盈太瘦

關嘉美醫生指孕婦整個懷孕期，最好能重 30磅，可盈懷孕 5個月只重 10磅似嫌不足。
「依家好多潮媽成日話唔想太重，但係太輕亦唔好，始終 BB大過天，生完之後，再減其實唔難，好過影響 BB，特別係餵人奶同自己湊 B嘅婦女，好易減肥嘅。」對於可盈餐單，關醫生表示並無不妥，但提醒牛奶一定要煲熱至飲，否則易有細菌。

點睇可盈收山

郭可盈陀 B後表現得無心戀戰，坦言無意再拍劇，《富貴門》將成為她的告別作，一眾拍檔均大感可惜，高層梁家樹更即場力勸可盈唔好收山，可盈一臉尷尬回應：「我唔係講到咁實啫！」

贊成派
呂良偉：「女人唔使咁搏殺囉，尤其係有咗仔女之後，應該專心照顧屋企同仔女，啲辛苦嘢留番俾男人做囉，文龍做得 o架囉！我見可盈大肚後人靚咗，笑容又多咗，成個人容光煥發！咁好，生多幾個都無妨吖……佢個女同我仔相距七年咪o架囉，可以對親家嘅！」
袁詠儀：「雖然同可盈合作唔多，喺《富貴門》對手亦唔多，但自己都係人嘅媽咪，會尊重可盈決定囉！我有啲朋友都係 o架，生咗 BB之後，梗係成日掛住個 BB，乜都唔想做 o架！」

呂良偉

袁詠儀

反對派
羅嘉良：「可盈唔做戲好多觀眾會失落囉，我都會失落 o架！ 10年前拍《創世紀》拍咗 105集，同可盈拍足大半年，大家好有默契，如果佢唔做我又少咗個好拍檔囉！」
好姨一見郭可盈，即摸住對方個肚問候一番，對於可盈收山，她說：「可盈唔再拍劇太可惜喇，大家都會好掛住佢，今日見到佢飽滿晒，知佢一定好開心幸福，或者等佢個 BB大咗，有戲癮咪拍番囉！」
三嫂戚美珍笑說：「拍劇嗰時，佢都問我攞仔女經 o架啦。其實都唔使啦，佢咁叻女。（佢話唔再拍劇！）唔好唔拍，好似我咁，等啲仔女大晒，樣樣定晒，得閒咪出嚟拍吓劇囉，依家拍劇唔同以前咁辛苦 o架喇，我今次返番嚟都拍得好開心好舒服！」
梁家樹表示：「我反對佢收山 o架！之前我俾咗另一個劇本佢，佢答我有啲嘢未想通，事後至知原來佢係大肚喎……一於遲啲搵個好正嘅劇本引誘佢復出至得！」