試大聲公
本周一（ 27日）下午，袁彌明和慢咇陳志全到深水埗鴨寮街路邊攤檔試用各款大聲公，最後購買了四個不同大小的，價值約 500元。
兩年開四舖賺完女人錢的袁彌明，最近搞埋政治，聯同 DJ「快慢口必」等 6名成員組成「選民力量」，狙擊民主黨，矛頭更直指甘乃威。為了宣傳，他們下周日（ 10月 3日）更直踩旺角行人專用區吶喊嗌口號，呼籲市民登記做選民。
袁彌明初入政壇，經費、助手乜都冇，周日（ 26日）她就孖住「慢口必」陳志全闖入品流複雜的深水埗鴨寮街，買大聲公兼印埋宣傳單張，仲要四圍格價一腳踢。香港小姐突變政壇新星， 30歲的袁彌明向記者說：「搞政治冇番咁上下人生閱歷當然唔會出色，但都冇理由唔俾年青人參與，政壇都需要後生女！」果然語不驚人誓不休。
早前袁彌明、 DJ「快慢咇」和社運人士「星屑醫生」歐陽英傑開記招宣布組成「選民力量」，目的是狙擊早前轉軚撐政改方案的民主黨。會上袁彌明一度鬧爆民主黨，她說：「我杯葛所有無誠信嘅人，好似喺娛樂圈，有啲人整咗容唔認，呢啲就係冇誠信，我就要鬧。」
買耳機
之後兩人到多個售賣無線耳機的檔口格價，又即時測試耳機質素。
出自己錢
記者發現購買兩部耳機時，袁彌明自掏腰包，身旁的慢咇還用手提電話計算價錢。
趕印傳單
最後袁彌明和慢咇到一間專門印製卡片和宣傳單張的地舖，為其「選民力量」印製傳單，趕及在下周宣傳活動時派發。
上周一（ 20日），「選民力量」主席林雨陽率領袁彌明、快慢咇等成員召開記者會。他們聲稱沒政黨背景，揚言積極參選明年區議會選舉。《蘋果日報》圖片
「選民力量」主力狙擊民主黨，活動當日，「社民連」成員黃毓民亦前來撐場，他批評民主黨支持政改方案，未向選民交代，是「投共」的表現。《蘋果日報》圖片
周日首次見市民
雖然「選民力量」有不少知名人士參與，但始終成立只有兩個月，冇 noise唔使旨意有運行。於是七名成員經過商量後，決定每星期搞活動宣傳兼籌募經費。頭炮是下周日（ 10月 3日）下午在旺角行人專用區舉行的選民登記活動，屆時袁彌明等人會落旺角派宣傳單張向市民推銷政綱，兼嗌口號狙擊民主黨。
周日（ 26日），袁彌明和慢咇就先直闖鴨寮街選購無線耳機和大聲公。其間二人在街邊一間舖頭試機時就出師不利，袁對住咪講「 testing」時，立刻發出吵耳的迴音，有麻甩佬因認得袁而停低狂。袁彌明見音色效果普通，就乘機問老闆：「買兩部有冇折頭？」最終袁彌明在銀包拎一張五百蚊出來找數。之後他們再到附近的印刷公司格價，在門外望住價目表討論良久才扑鎚。
袁彌明從商成績不俗，在銅鑼灣和旺角投資鬆餅店（左圖）外，售賣化妝品、健康食品的「生活百貨」，上月在尖沙嘴開分店，開張當日，其男友亦大方撐場。《蘋果日報》圖片
墊支經費
事後記者致電袁彌明，她承認今次搞「選民力量」的經費暫時由她和其他成員墊支。她說：「搞呢個組織冇錢冇人工 o架，暫時我哋自己拎住啲錢出嚟先，我哋遲啲都會搞多啲街頭活動籌募多啲經費。人手唔係好夠，所以我依家好多嘢做，除咗每星期同成員開兩次會，覆 e-mail買大聲公都要自己落手落腳搞。我亦做埋公關負責聯絡傳媒，不過冇所謂啦，自己不嬲都有意從政。依家自己舖頭啲生意都叫上咗軌道，唔使為口奔馳，可以嘗試吓政治。」
望解決貧富問題
今年 30歲的袁彌明浸過鹹水， 07年與 TVB反面後就開舖搞生意，收入穩定。她乜都敢講，擔任過電台時事評論節目，對政制發展亦頗留意。她解釋今次成立組織，主要原因是想懲罰民主黨，「我追求真民主，我睇唔過眼民主黨轉軚支持政改囉！要求佢哋對當初投咗佢哋一票嘅選民公開道歉。我哋希望可以多啲人參與政治，多啲獨立候選人落區選區議員，狙擊民主黨部分票源，等佢哋驚下！我係政壇新丁，雖然搞政治冇番咁上下人生閱歷，冇四、五十歲當然唔會出色，但冇理由唔俾年青人參與，政壇都需要後生女！」
問到有什麼政治抱負，她說：「我希望可以幫到人，解決貧富懸殊呢啲民生議題，亦會積極考慮選區議員，希望幾年後可以入立法會，幫大家有機會投票選特首！」斷估若袁彌明順利當選議員，冇人會唱佢 please die啩！
記者亦曾致電「慢咇」，他說：「今次加入呢個團體，希望為市民盡一分力，還當日投票俾民主黨嘅市民一個公道。我哋未知最終結果成唔成功，但多啲人落區選區議員，至少可以分散啲票源啦，希望大家支持。」
留言列表
